भांगरभूंय | प्रतिनिधी
डॉ. देविया राणेः 15 जूना मेरेन कांक्राची ओपीडी सुरू
भांगरभूंय । प्रतिनिधी
वाळपयः पिरायेचो विचार करिनासतना दिसांतल्यान इल्लो तरी वेळ व्यायामा खातीर दिवप खूब गरजेचें आसा. एका काळार पिरायेचीं 50 वर्सां हुपले उपरांत भलायकेच्यो समस्या निर्माण जाताल्यो. पूण आयज परिस्थिती पुराय बदल्ल्या. तरणे पिरायेंत लेगीत भलायकेच्यो समस्या निर्माण जावपाक शकतात. ते खातीर दरेकल्यान व्यायामा वांगडाच आहाराचेर लेगीत तितलेंच नियंत्रण दवरप गरजेचें आसा. कोणेच भलायके कडेन आडनदर करची न्हय, असो सल्लो आमदार डॉ. देविया राणे हांणी दिलो. ती पर्ये पंचायत वाठारा खातीर आयोजीत केल्ल्या मेगा वैजकी शिबिराचें उक्तावण केले उपरांत उलयताली.
ह्या वेळार माचयेर भलायकी खात्याची संचालक डॉ. गीता काकोडकार, डॉ. गीता देशमुख, पर्येंची सरपंच रती गांवकार, उपसरपंच आत्माराम शेट्ये, सांखळी सरकारी समाजीक हॉस्पिटलाचे भलायकी अधिकारी डॉ. अतुल पै बीर, संयोजक विनोद शिंदे, एएसजीआय हॉस्पिटलाचे डॉ शॉन डिसोझा, पंच हेमंत लक्ष्मणराव राणे सरदेसाय, विदीशा गोसावी, दत्ता रावजी राणे, दीपा नायक, उमेश राणे, अमिषा गांवकार, लक्ष्मीकांत शिरोडकार हाजीर आशिल्ले.
गोंयांत भलायकेच्यो दर्जेदार सुविधा निर्माण जाल्यात. ग्रामीण भलायकी केंद्राच्या माध्यमांतल्यान बऱ्यो सुविधा दितात. फुकट वखदां दिवपी गोंय एकसुरे राज्य. फुडारांत कांक्रा सारक्या दुयेंतींचेर उपचार करचे खातीर सरकारान बांदिल्ल्या हॉस्पिटलाचें उक्तावण जातलें. 15 जूना मेरेन कांक्राची ओपीडी सुरू करतले. ताका लागून कांक्राच्या दुयेंतींनी मुंबय सारकिल्ल्या वाठारांत वचपाची मातूय गरज पडची ना. भाजपाच्या डबल इंजीन सरकाराक लागून गोंयचे उदरगतींत गतीन भर पडटा. हाचो गोंयकारांनी लाव घेवचो. गांवगिऱ्या वाठारांतल्या लोकांची भलायकी घटमूट उरची हे खातीर मेगा वैजकी शिबिराचें आयोजन केलां. म्हालांतल्या दरेका पंचायत वाठारांत अशे तरेच्या शिबिरांचें आयोजन केलां, अशें डॉ. राणे हांणी सांगलें.
गांवगिऱ्या वाठारांतले लोक सोंपेपणी आपले भलायकेची तपासणी करून घेनात. गोमॅकाँतल्या तज्ञ दोतोरां वरवीं तांची तपासणी करून घेवपा खातीर केल्ले यत्न तोखणायेचे आसात, अशें डॉ. गीता काकोडकार हांणी सांगलें. सरपंच रती गांवकार हांणी येवकार दिलो. ह्या वेळार तांणी सांगलें, अशे तरेचें शिबीर आयोजीत करून भलायकी खात्याक गांवगिऱ्या वाठारांतल्या लोकांचो आशिल्लो हुस्को स्पश्ट जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
