भांगरभूंय | प्रतिनिधी
हालींचे व्यस्त जिणेंत स्वता खातीर वेळ दिवप खूब कठीण आसलें तरी वेळ काडप खूब गरजेचें. विसव घेवप, नव्या सुवातींक भेट दिवप, सदां परस कितें तरी वेगळें करप हें तुमचे मानसीक भलायके खातीर खूब म्हत्वाचें. देखूनच हे खातीर भोंवडी हो एक व्हडलो अणभव, जो दरेकल्यान अणभवपाक जाय. भोंवडी केल्यार तुमचो ताण उणो जाता तशेंच तुमकां दिसपट्ट्या कार्यावळींतल्यान विसव मेळटा. तशेंच प्रवासाचे हेर फायदेय आसात….
१. मानसीक भलायकी सुदारपाक मजत
प्रवासांतल्यान मेळपी एक व्हडलो फायदो म्हणल्यार ताचो तुमच्या मानसीक भलायकेचेर खूब सकारात्मक परिणाम जाता. नवे मनीस, नवे सुवाती आनी नवे खाण लेगीत तुमकां सामकें वेगळेपण दिता. तुमकां उदासीनताय वा हुस्को आसल्यार भोंवडी करून तुमकां बरें दिसूं येता.
२. संवाद वाडटा
तुमी जर पयलींच तुमचें जिवीत गर्दीच्या सुवातेर जगतात जाल्यार तुमी ह्या सगळ्यां पसून पयस वचून एक शांत सुवात वेंचून थंय कांय दीस सारपाक जाय. प्रवास केल्यार तुमची भास सुदारपाक मजत जाता. तशेंच नवें सुवातींनी नव्या मनशांक मेळ्ळें उपरांत तुमचो संवादय वाडटा.
३. संस्कृताय शिकात
भोंवडी म्हणल्यार फकत नव्या सुवातेर वचप वा पयलीं पळोवंक नाशिल्लीं नवीं सुवाती पळोवप इतलेच न्हय, तर हेर लोकांची संस्कृताय आनी इतिहास जाणून घेवपाची एक नवी संद. तातूंतल्यान तुमकां दुसऱ्यांची संस्कृताय आनी परंपरा आपणावपाक संद मेळटा. वेगवेगळ्या संस्कृतायेंतल्या आनी फाटभूंय आशिल्ल्या वेगवेगळ्या लोकां कडेन तशेंच सुवातींक भेट जाता.
४. परिस्थिती प्रमाण जुळोवन घेवप
प्रवास तुमकां पर्याय सोदून काडपाक आनी दरेक परिस्थितींत जियेवंक मजत करता. तुमी ज्या देशांत आसात ताचे कडेन कशें जुळोवन घेवप? परिस्थिती कशी हाताळची? अपरिचित समजुती आनी परंपरा आशिल्ल्या लोकां कडेन कशें उलोवप? तुमकां मेळपी खंयचेय प्रस्न कशे सोडोवचे? ताका लागून तुमकां तें शिकपाक मजत जाता.
५. स्वताक समजून घेवपाची संद मेळटा
भोंवतना अनोळखी मनशां कडेन कशी वागणूक करची? नव्या संस्कृताये कडेन कशें वागचें हें शिकपाक मेळटा. नवे परिस्थितीचो सामनो करप, खास करून तुमी एकलेच भोंवतना, तुमकां स्वताक समजून घेवपाक आनी तुमचीं बळगें सोदून काडपाक मजत जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
