भांगरभूंय | प्रतिनिधी
करियराचेर सदांच उलोवपी आसूं वा आयकूपी आसूं, ताका वेवसाय करपाचें मानांत आसूं येता. घरच्यांचो वेवसाय आसूं वा ताका स्वताक तो सुरू करचो कसो दिसता. पूण ताका गरज आसता ती योग्य त्या मार्गदर्शनाची. कारण वेवसाय करपाक भांडवल, अणभव लागता. धाडसी सभावूय जात. ताका उर्बा दिवपीय कोण तरी जाय. जर ताका हें योग्य पिरायेचेर मेळ्ळे जाल्यार दुदांत साकर. सांखळेचो चेतन सालेलकार हो तरणाटो करियर मार्गदर्शन करता. तो विद्यालयां, म्हाविद्यालयांनी वता. तांकां उर्बा दिता. आपल्योय गजाली सांगता. वेवसाय करतना तुमी दुसऱ्यांक समाधानी करतात, नोकरी दिवन. तुमी नोकरी दिवपी जातले काय घेवपी? आतां तर कांय जाणांनी दुकानूच मांडलां, चड पयशे कोण दिता ताकाच नोकरी दिवप. पूण सगल्यां कडेन खंय पयशे आसतात. ते सांगतात तितले दिवपाचें जरी मनांत हाडलें जाल्यार आमची जीण सोंपतली. पूण जर तुमी वेवसाय सुरू करशात तर जायते जाण तुमकां मजत करूं शकता. थळाव्यो बँको तर तुमकां रीण दिवपाक एका पांयाचेर तयार आसतात.
सालेलकार सांगतात, वेवसायांत येवपाक धाडस जाय पडटा. कारण कसलीय अडचण येत तें सांगपाक शकनात. सद्या झूज चलता, इराक अमेरिका, इझ्रायलाचें, पूण आमकां गॅसाचो प्रस्न सतयता. हाची तयारी जाय. सध्या न्हय, तर सदांच कुशळटायेक मागणी ही आसतातूच, हें कोणेच विसरचें न्हय. म्हूण तर काॅलेज जाले उपरांत रोखडीच नोकरी मेळना. तुमी जर तांत्रिक संस्थेंत शिकून भायर सरिल्ले आसात, तर तुमकां खात्रीन आपोवणे येताच. आतां म्हजेंच पळयात, सेसाचो डिप्लोमा केलो, तांचे तांत्रिक शाळेंतल्यान… आनी नेस्ले हे आंतरराष्ट्रीय कंपनींत हांवें काम केलां. तुमी अपडेट कशे रावप हें हांव सांगतलोच. अपडेट रावप हें सगल्यांकूच जाय. हे तुमी घरचे घरा करूंक शकतात. समजा गोंयचो राज्यपाल कोण, असो जर कोणें प्रस्न विचारलो जाल्यार तुमकां ताची जाप येवपाक जाय. ती आसा भौमानेस्त पी ए गजपती राजू. हो राज्यपाल निवडून येना म्हूण आमकां खबर आसता अशें ना. खेरीज तो बगर बगर बातमेंत आसतलोच अशें ना.
समजा तुमी 28 फेब्रुवारीक मुलाखतीत गेले आनी तुमी त्या दिसाक कितें म्हणटात, अशें विचारलें तर तें सांगपाक येवपाक जाय. तशें पळयत जाल्यार वर्साचे सगलेच दीस कसल्या ना कसल्या कारणा खातीर प्रसिद्ध आसतात. संवसारीक ना जाल्यार राष्ट्रीय ना जाल्यार प्रादेशीक पांवड्यार. तुमकां ताची खबर आसपाक जाय. केंद्र सरकार सगल्यां खातीर येवजण्यो हाडटात. तातूंत राज्य सरकार लेगीन केन्ना ना केन्ना तातूंत भर घालता. तरणाट्यां खातीर येवजण्यो आसतात, तश्यो बेरोजगारां खातीरुय आसतात. तुमकां वेवसाय सुरू करतना बऱ्योच अडचणी येवंक शकतात. जश्यो की गिरायकां कडेन संपर्क करप, तुमच्या वेवसायाक लागपी म्हाल खंयच्यान हाडप, खंयच्यान हाडप, वेळाची- अर्थीक अडचण, धोको. हाचेर जाप आसा. प्रत्येक प्रस्नाक जाप ही आसताच. ते खातीर तुमकां भायर चवकशी करची पडटली. कायद्याच्यो अडचणी, सरकारी नेम, कोणे कागाळ केल्यार वेवसाय करतना येवपी अडचण, तुमच्या वेवसायाक लागपी मनीसबळ ते प्रशिक्षीत नासल्यार अश्यो जायत्यो अडचणी आसतात. तेन्ना तुमी कायम सादूर रावंक जाय. तुमी कामा निमतान वा सुटयेर खंय गेले जाल्यार तुमचे फाटल्यान तुमचो वेवसाय बरो, प्रामाणीकपणान चलपाक जाय जाल्यार विश्वासू मनीस जाय. जो बदल जाता, ताका तोंड दिवपाची तयारी जाय. अश्यो जायत्यो अडचणी येतात. सगल्योच गजाली तुमकां मार्गदर्शनान मेळटल्यो अशें ना. अणभव गरजेचो. तो तुमी स्वता घेवपाक जाय.
वतां वतां ः गोंय शालांत मंडळान घेतिल्लो धावेचे परिक्षेचो निकाल ह्याच म्हयन्यांत लागपाचो आसा. तो मेरेन विद्यार्थ्यांनी कितें ना कितें शिकचें. पूण मेळिल्लो वेळ कसोच फुकट वगडावचो न्हय.
डाॅ. रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
