भांगरभूंय | प्रतिनिधी
…. आनी राश्ट्रीय एकात्मतेचो संदेश प्रत्यक्ष अणभवतात. शिबिरांनी निर्माण जावपी इश्टागत आनी देशभक्तीची भावना आयुश्यभर तांचे कडेन उरता.
भारत सरकाराच्या संरक्षण मंत्रालयाच्या आदारान वावुरपी नॅशनल कॅडेट कॉर्पस (एनसीसी) ही देशांतल्या तरणाट्यां खातीर एक प्रभावी आनी प्रेरणादायक संस्था आसा. ‘अ’, ‘ब’ आनी ‘क’ प्रमाणपत्रां आशिल्ल्या कॅडेटांक सरकारा वतीन वेगवेगळीं शिक्षणीक, रोजगार आनी करियर सवलती दितात. पूण एनसीसी ही फकत सवलती मेळोवपाची येवजण न्हय तर तरणाट्यांच्या सगळ्या वटांनी व्यक्तीमत्व उदरगती खातीर एक राश्ट्रीय चळवळ.
शिस्त, फुडारपणाची शाळा
कॅडेटांक शाळांनी दोन वर्सां आनी म्हाविद्यालयांत तीन वर्सां नेमान प्रशिक्षण दितात. दर सप्तकांत बटालियनाच्या पीआय कर्मचाऱ्यांच्या मार्गदर्शना खाला आनी संघटनेच्या एएनओच्या मार्गदर्शना खाला परेड घडोवन हाडटात.
ह्या प्रशिक्षणांत ड्रिल, शस्त्र हाताळप, नकाशे वाचप, फील्ड क्राफ्ट, झुज क्राफ्ट, आडमेळीं प्रशिक्षण, सायकल चलोवप, ट्रेकिंग, आपत्ती वेवस्थापन ह्या लश्करी विशयांचेर सैद्धांतिक आनी वेव्हारीक मार्गदर्शन मेळटा.
हाचे वांगडाच झाडां रोवप, नितळसाण मोहीम, रगतदान शिबिरां, तंबाकू आनी ड्रग्स विरोधी जागृताय, एड्स जागृताय, ध्वज दीस रॅली, कारगिल विजय दीस अशा राष्ट्रीय कार्यावळींनी सक्रीयपणान वांटो घेवन समाजीक बांदिलकी वाडयतात.
खऱ्या जिविताचो अणभव
वर्सुकी प्रशिक्षण शिबिरांनी (एटीसी) कॅडेटांक तंबू उबारप, गार्ड ड्युटी, फायरिंग सराव, रातचें नेव्हिगेशन, शिस्तबद्ध शिबिरजीण अशा खर कार्यावळींचो अणभव दितात. वर्गाच्या चार वण्टीं भायर मेळपी हो अणभव कॅडेटांत धैर्य, आत्मविस्वास, सहकार्याची भावना आनी फुडारपणाचे गूण तयार करता. ह्या प्रशिक्षणाक लागून ते ‘अ’, ‘ब’ आनी ‘क’ प्रमाणपत्र परिक्षेक सक्षम जातात.
एनसीसीचें बोधवाक्य
एनसीसीचें बोधवाक्य म्हणल्यार – “एकवट आनी शिस्त”. वेगवेगळ्या राज्यांतले, भास, धर्म आनी संस्कृतायेचे विद्यार्थी एकठांय रावतात आनी राश्ट्रीय एकात्मतेचो संदेश प्रत्यक्ष अणभवतात. शिबिरांनी निर्माण जावपी इश्टागत आनी देशभक्तीची भावना आयुश्यभर तांचे कडेन उरता.
एनसीसीचीं तीन मुखेल उद्दिश्टां म्हणल्यार – 1. तरणाट्यां मदीं चारित्र्य, शिस्त, फुडारपण, धर्मनिरपेक्षताय आनी धैर्याची भावना वाडोवप. 2. संघटीत, प्रशिक्षीत आनी प्रेरीत तरणाट्यांक राष्ट्र निर्मिती खातीर तयार करप आनी 3. तरणाट्यांक सशस्त्र दळांत येवपाक प्रेरीत करप.
संरक्षण सेवांनी खाशेले फायदे
‘सी’ प्रमाणपत्र आशिल्ले कॅडेट अधिकारी पदां खातीर थेट एसएसबी मुलाखती खातीर उपलब्ध आसा.
भारतीय सैन्य (आयएमए/ओटीए – 10% जागे राखीव)
भारतीय नौदल, भारतीय वायुसेना तशेंच प्रजासत्ताक दिसा शिबिरांत वांटो घेवपी कॅडेटांक भरती प्रक्रियेंत खासा प्राधान्य दितात. केंद्रीय सशस्त्र पुलीस दळांत: शिमेचेर सुरक्षा दळ, केंद्रीय राखीव पुलीस दळ, केंद्रीय उद्देगीक सुरक्षा दळ, भारत-तिबेटी शिमेचेर पुलीस.
एनसीसी प्रमाणपत्रधारकांक अतिरिक्त गूण आनी पिराय मर्यादेंत शिथीलताय दितात. जायतीं विद्यापिठां आनी राज्य सरकारां ‘ब’ आनी ‘सी’ प्रमाणपत्रधारकांक प्रवेश प्रक्रियेंत अतिरिक्त गूण दितात.
तशेच सहारा शिश्यवृत्ती येवजण, एनसीसी कॅडेट्स वेलफेयर सोसायटी शिश्यवृत्ती आसा. उत्कृश्ट कॅडेटांक रोख इनाम, शिबिराच्या काळांत अपघाती विमो ₹2,00,000 मेरेन कव्हर करता, वेगवेगळीं सुविधा उपलब्ध आसात.
राष्ट्रीय आनी आंतरराश्ट्रीय संदी
प्रजासत्ताक दिसा शिबिर, थल सैनीक कॅम्प, युवा विनिमय कार्यावळ, पॅरा प्रशिक्षण शिबिर (आग्रा),
राष्ट्रीय साहस शिबिर, राष्ट्रीय एकात्मता शिबिर (एनआयसी), एक भारत श्रेष्ठ भारत शिबिरां.
ह्या शिबिरांनी कॅडेटांक राश्ट्रीय एकात्मता, संस्कृतीक आदान-प्रदान, फुडारपणाची कुशळटाय आनी आंतरराश्ट्रीय अणभव मेळटा.
सक्षम नागरिक घडयता
एनसीसी कॅडेट शिस्तबद्ध, आत्मविस्वास आशिल्ले, प्रामाणीक, कर्तव्यनिश्ठ आनी देशभक्त नागरिक जातात. लोकशाय, एकचार आनी धर्मनिरपेक्षतायेचो आदर करपाची वृत्ती तांकां तयार जाता. हीं मुल्यां जिवीतभर यशस्वी आनी मानाची जिणेची घट्ट बुन्याद तयार करतात.
एनसीसीचीं चार मुळावीं तत्वां
1. हांसऱ्या मुखामळान आदेश पाळा
2. वेळाक खरपणान पाळो दिवप
3. मना पसून कश्ट करात
4. निमतां दिवं नाकात आनी फट उलोवंक नाकात
एनसीसी गीत
हम सब भारतीय हैं, हम सब भारतीय हैं, अपनी मांझील एक है…
हें गीत राश्ट्रीय एकात्मतेचो संदेश दिता आनी दर एका कॅडेटांत देशाची सेवा करपाची भावना प्रेरीत करता.
निवृत्त अधिकाऱ्याचो संदेश
एनसीसी कडेन बरोच तेंप संबंदीत आशिल्ल्यान एनसीसी ही फकत वर्दी घालपाची संद न्हय तर जिवीत घडोवपाची प्रक्रिया अशें म्हाका खरपणान दिसता. परेड मैदानाचेर शिकून घेतिल्ली शिस्त जिणें खातीर मार्गदर्शक जाता, जाल्यार शिबिरांत मेळिल्लो आत्मविस्वास येसस्वी जावपाचें दार उगडटा.
विद्यार्थ्यांनी एनसीसींत वांटो घेवचो आनी हे भांगराळ संदीचो लाव घेवचो अशें आवाहन केलां.
(लेखक 1 गोंय बटालियन एनसीसीचे निवृत्त मुख्य अधिकारी आसात.)
राधाकृष्ण विद्यालय, दिवचल
77985 34186
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
