भांगरभूंय | प्रतिनिधी
12 जाणांक मरण, खूबशे जखमी
मरण आयिल्ल्यां मदीं बायलां चड
धक्काबुक्की जाल्ल्यान मोडलें रेलींग
खबरां संस्था
श्रीकाकुलम : आंध्र प्रदेशांतल्या श्रीकाकुलम वाठारांतल्या काशीबुग्गा व्यंकटेश्वर देवळांत शेनवारा एकादशीक जाल्ले खेटाखेटींत 12 जाणांक मरण. खूब जाण जखमी जाले. रेलींग पडिल्ल्यान ही दुर्घटणा घडली.
जखमी भाविकांक हॉस्पिटलांत व्हेले. मरण आयिल्ल्यांचो आंकडो वाडपाक शकता असो भंय अधिकाऱ्यांनी उक्तायला. मरण आयिल्ल्यां मदीं चडशीं बायलां आसात. खेटाखेटीचे खूबशे व्हिडियो व्हायरल जाल्यात. तातूंत देवळाच्या सोंपाणांचेर बायलां, भुरगीं आनी जाण्ट्यां सयत लोकांची खूब गर्दी दिसता. ह्या वेळार रेलींग कोसळ्ळें आनी जाल्ले खेटाखेटींत खूब जाण चिड्डले. बायलां आनी भुरगीं भायर सरचे खातीर आड्डतना दिसलीं. खूब जाण स्वताचो जीव वाटावपा खातीर लोकांचेर चडटना दिसले.
आंध्र प्रदेशाची गृहमंत्री अनिता हांणी सांगलें, दर सप्तकाक सुमार 1500 ते 2 हजार भावीक देवळांत येतात. एकादस आशिल्ल्यान भाविकांची चड गर्दी जावपा फाटलें म्हत्वाचें कारण आशिल्लें. देवूळ पयल्या माळ्यार आसा. वयर वचपा खातीर 20 सोंपाणां आसात. हे मजगतीं धक्काबुक्की जाली आनी रेलींग मोडलें, ताका लागून खेटाखेट जाली.
श्रीकाकुलम व्यंकटेश्वर देवूळ हें आंध्र प्रदेशांतलें एक फामाद आनी प्राचीन देवूळ. ताचें स्वरूप आनी पुजा पद्दत तिरुपती बालाजी देवळा सारकीच आशिल्ल्यान ताका उत्तरा तिरुपती, म्हणल्यार उत्तरेचो तिरुपती अशेंय म्हणटात. थंय व्यंकटेश्वर (विष्णू) हाची पुजा करतात. जाका थळाव्या पांवड्याचेर श्रीनिवास, बालाजी वा गोविंद अशेंय म्हणटात. हें देवूळ 11 व्या- 12 व्या शेकड्यांत, चोल आनी चालुक्य राजवटींत बांदिल्लें अशें सांगतात. दर वर्सा एकादस, कार्तीक म्हयनो आनी हेर सणांच्या निमतान हजारांनी भावीक थंय जमतात. देवूळ वाठारांत पुजा, नैवेद्य आनी धर्मीक सुवाळे आयोजीत करतात. थंय दर्शन घेतिल्ल्यान खोस, समृद्धी आनी शांती मेळटा अशी भाविकांची श्रद्धा आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
