भांगरभूंय | प्रतिनिधी
म्हाशिवराती दिसा पुराय गोंयभर श्रीमहादेवाची पूजा जाता. आपल्या गांवात वा वाठारांत आशिल्या देवळांत ल्हान भुरगीं पांया पडटात, जाल्यार आंकवार चलयो, चले आपल्या इत्से प्रमाण आपल्याक घोव वा बायल मेळची म्हूण देवा लागीं मागतात. जाल्यार जोडपीं पिंडयेचेर अभिशेक करतात. पूण शिरोडें, रामनाथी गांवातल्या लोकांक जात्रेची उमळशीक आसता. शिरोडें गांवात श्रीकामाक्षी देवीची जाल्यार रामनाथी गांवात श्रीरामनाथ देवाची जात्रा आसता. दिवजांच्या लखलखत्या उजवाडान देवळां झगमगता.
पूण शिरोड्यां दिवजां वांगडाच दनपारच्या वेळार श्रीकामाक्षी देवळांच्या प्रांगणांत आशिल्ले तळयेच्या देगेर ‘वोवर’ ची प्रथा रिती प्रमाण मनयतात.
ज्या घराण्यांची कुळदेवी कामाक्षी देवी आसा त्या घरांत जर कोणाचे नवेंच लग्न जाला, त्या जोडप्यांक ही रीत पाळची पडटा. म्हाशिवरातीच्या दिसा सावन घरांतल्या बाकींच्या सवाशीण बायलां वांगडा जीं देवीक दिवजां पेटयतात ताचेच वांगडा नवें व्हंकलेन पसून उपास धरप. मागीर दुसरें दिसा अमास येता. त्या दिसा आपल्या घराण्याच्या पुरिसाच्या नांवान उपास धरप आनी ताचे देवळेर म्हणल्यार पेडयेर दिवजां पेटोवप. कांय कडेन ही दिवजां दनपारची पेटयतात जाल्यार कांय कडेन तीं रातचीं पेटयतात. तिसरें दिसा सकाळचीं सगळीं नवीं जोडपीं तळयेच्या देगेर बसून, मंत्रोच्चारण करून कामाक्षी देवीक, बाकीचें हेर पंचायतन, स्वताचें बरें मागून पूजा करतात तशेंच देवांक होरायतात. अभिमंत्रीत दोरो वा वाती उदकांत सोडटात. घरातल्या सगळ्या जाण्ट्यांचो आशीर्वाद घेतात आनी हांगाच वोवराची सांगता जाता. त्याच दिसा राती कडेन दिवजां आसतात. सगळीं दिवजकांन्नी शिरंगार करून हातीं पांच माल्याची मातयेचीं वा पितळेचीं दिवजां घेवन देवळां भोवतणीं पाच फेर मारतात. नवे व्हंकलेचे दिवज चडसो ताचो भावो ना जाल्यार मानलेलो भाव धरता. कांय व्हंकलेचे दिवज तांचे घोवच घेवन भोवता.
ताचे उपरांत ही जात्रा षश्ट मेरेन चलता. फाल्गून शुद्ध पाडवो तें फाल्गून शुद्ध षश्ट मेरेन हांगा जात्रा चालू आसता. दर दिसा विंगड विंगड रथांतल्यान श्रींची मिरवणूक काडटा. मयुरासन, विजयरथ, अंबारी, अश्वारूढ, लालखी अशें तरेन देवीची मिरवणूक काडटात.
हांगा सरली आनीक एक प्रथा म्हणल्यार गांवा भायल्या लोकांनी दिवजां पेटोवन रोखडीच गांवा भायलीं शीम पार करपाक जाय. तांणी गांवांत रावप ना; पूण हो नेम गांवात रावपीं लोकांक लागना.
शिरोडें गांवातल्या ‘थळ’ या वाड्यार कामाक्षी देवीचें सध्याचें देवूळ आसा. कामाक्षी देवीचें देवूळ प्रशस्त आसा. ताचो सभामंडपय खूबच सोबीत आसा. गाभाऱ्यांत भव्य सुशोभीत कोरीव शिंवासनाचेर बशिल्ली श्रीकामाक्षी देवीची मूर्त चतर्भूज आसून तिच्या हातांनी त्रिशूळ, खड्ग (तलवार), ढाल अशी आयुधां आसात. शिंवासन रुप्याचें आसून कामाक्षीची मूर्त राकेसाचो वध करता अशी आसा. तिचें तें तेजिश्ट मुखामळ मनाक खूब खोस दिता.
आकृती नायक
721865944
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
