भांगरभूंय | प्रतिनिधी
दोतोरकीचो वेवसाय सदांच पवित्र मानला आनी मानतात. दोतोराक धर्तरे वयलो मनीस रुपांतलो देव मानतात. समाजांतल्या दरेका वर्गाक, खास करून गरीब आनी वंचीत लोकां खातीर दोतोर हो देवदूत.
पूण आयज ह्या पवित्र वेवसायाचेर भ्रश्टाचार, सुवार्थ आनी वेवसायीकतायेची सावळी पडल्या. हाची सगल्यांत म्हत्वाची देख म्हळ्यार सरकारी सेवेंतल्या दोतोरांनी खाजगी क्लिनिकां चलोवप, जें फकत नैतीक नदरेन चुकीचें न्हय, तर कायद्याचे चौकटींत आक्षेपार्ह आसा. सरकार दोतोरांच्या वैजकी शिक्षणाचेर लाखांनी रुपया खर्च करता, तांकां बरो पगार, भत्तो, नोकरी सुरक्षीतताय, पेन्शन मेळटा. ताचे फाटलो गांवगिऱ्या गरीब लोकांक फुकट दर्जेदार भलायकी सेवा दिवप हो हेतू आसता. पूण जायते सरकारी दोतोर फक्त नांवान सरकारी हॉस्पिटलांनी वतात आनी प्रत्यक्षांत तांचें लक्ष तांच्या खाजगी क्लिनिकांचेर आसता.
सकाळीं उसरां पावप, बेगीन घरा वचप, वेळार दुयेंतीक पळोवंक हजर नासप, थारावीक क्लिनिकांत वचून गरजे भायल्यो चांचण्यो करूंक लावप, वखदांचो उणाव दाखोवप वा सरकारी वखदां बदला म्हत्वाच्या वखदांचे रशेद बरोवन खाजगी वखदां हाडपाक सांगप. सरकारी हॉस्पिटलांत येवपी दुयेंतींक थेट आपल्या खाजगी क्लिनिकांत धाडप हें वेवसायीक अधाशिपणाचें स्पश्ट उदाहरण. वैजकी सेवा हो समाजसेवेचो एक भाग मानताले. पूण आयज तो एक धंदो जाला. हॉस्पिटलां, डायग्नोस्टीक सेंटर्स, वखदां कंपनीं, वैजकी प्रतिनिधी सगले एकठांय येवन दुयेंतींक गिरायक करपाक वावुरतात. सरकारी दोतोरांक लेगीत हातूंतल्यान सुट मेळूंक ना.
उपचारा परस चांचणी, चांचणे परस वखदां आनी वखदां परस शुल्क आनी बिलां वाडोवप हांकां प्राधान्य दितात.
दोतोर दुयेंतीचे भलायके परस ताचे अर्थीक क्षमतेक आदारून वखदां दितात. केन्ना केन्नाय गरजे भायर शस्त्रक्रिया, खर्चीक चांचण्यो वा दीर्घकाळ उपचार येवजण्यो दुयेंतीचेर लादतात. हाचे फाटलो एकूच हेतू म्हणल्यार फायदो मेळोवप. वैजकी सेवा नियमना प्रमाण सरकारी दोतोरांनी खाजगी प्रॅक्टीस करप हो शिस्तभंग आनी कायदेशीर गुन्यांव. सरकारी वेळार दोतोरांनी खाजगी दुयेंती पळयल्यात, खाजगी क्लिनिकांत सरकारी वखदांचो वापर केला, खाजगी दुयेंती खातीर सरकारी सुविधा वापरल्यात अशें जायते फावटीं उक्तें जालां. हाचे आड कागाळ केल्यार लेगीत खरपणान कारवाय जायना. कारण दोतोरांची संघटणा, राजकी दबाव वा भ्रश्ट वेवस्था हें सगलें एकामेकांक पालव दितात. देखून अशा दोतोरां आड निलंबीत वा हेर खर कारवाय करपाचीं उदाहरणां उणीं दिसतात. ह्या सगल्यांचो सरळ परिणाम सामान्य मनशाचेर जाता.
एक गरीब मनीस सरकारी हॉस्पिटलांत वता तेन्ना ताका थंय फुकट आनी बरे उपचार मेळटले अशी अपेक्षा आसता. पूण प्रत्यक्षांत ताचेर खाजगी क्लिनिकांत वचपाचो दबाव येता. इतलेंच न्हय तर खाजगी दोतोरा कडेन वचप सगल्यांक परवडना. आडनदर, गैरहाजर रावप, दारांत दुयेंतीक पयस करप वा दुयेंतींची फकांडां करप सरकारी दोतोरां मदीं वाडत आसात. हाका लागून दुयेंतीचो वेळ, पयशे आनी सगल्यांत म्हत्वाचें म्हणल्यार तांची भलायकी खालावता.
दोतोराचो वेवसाय विस्वासाचेर आदारिल्लो आसता. एक दुयेंती आपलो जीव दोतोराक सोंपयता. अशा वेवसायिकां कडल्यान समाजीक जापसालदारकेची अपेक्षा आसता. पूण खाजगी क्लिनिकांचो फायदो, प्रतिश्ठा, लोभ हाका लागून दोतोरां वयलो विस्वास वचपाक लागला हें दोतोरांक लागून न्हय तर पुराय वैजकी वेवस्थेक लागून.
वैजकी म्हाविद्यालयां, वखदां कंपनीं, हॉस्पिटल वेवस्थापन हांचोय हातूंत वांटो आसा. सरकारी दोतोर खाजगी वेवसाय करतात जाल्यार खर पावलां उबारचीं, जशीं रोखडेंच निलंबन करप, पगार उणो करप वा सेवेंतल्यान काडून उडोवप. सरकारी हॉस्पिटलांतल्या दोतोरांची हजेरी नोंद आधुनीक पद्दतीन आसूंन जाय. सरकारी हॉस्पिटलांक भेट दिवपी दुयेंती खातीर सादे आनी प्रभावी पद्दतीन कागाळी नोंद करपा खातीर एक वेवस्था आसपाक जाय. वैजकी शिक्षणांत नीतिशास्त्राचेर भर दिवपाक जाय. दोतोरांक सेवा, करुणा आनी समाजीक वचनबद्धताय शिकोवपाची गरज आसा. सरकारी हॉस्पिटलांनी बरी उपकरणां, नितळसाण, वखदां, उपचार पद्दती उपलब्ध जातकच दुयेंती खाजगी दोतोरां कडेन वचप टाळटले. सरकारी दोतोर खाजगी क्लिनीक चलोवप म्हणल्यार कायद्याचें उल्लंघन न्हय, तर दुयेंती कडेन केल्लो विस्वासघात. वैजकी सेवा फायद्या खातीर न्हय, तर सेवा भावनेन दिवची. पयशे जोडपाचे इत्सेन वैजकी शास्त्राचो पवित्र वेवसाय कलंकीत जाता तेन्ना पुराय समाज दुयेंत पडटा. ही वेवस्था निवळ करपा खातीर कायदेच न्हय तर मानसीकताय बदलची पडटली. म्हज्या मतान ‘देवदूत’ ही पदवी परतून मेळोवपा खातीर दोतोरांनी दुयेंतींक बरी सेवा दिवची दुयेंताचें वेवसायीकरण करचें न्हय!
सुदिन वि. कुर्डीकार
8275425404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
