भांगरभूंय | प्रतिनिधी
भांगरभूंय । प्रतिनिधी
वास्कोः पार्क केल्ले गाडयेंत दवोरल्ल्या अडेज लाख रुपयांची चोरी केल्ले खातीर अटक केल्ल्या पी रमेश सुबय्या हाका वास्को पुलीस वैजकी तपासणे खातीर बांबोळेच्या गोय वैजकी हॉस्पिटलांत (जीएमसी) घेवंन गेल्ले कडेन तो तांची नदर चुकोवन पळून वचपाची घडणूक बिरेस्तारा सांजे जाली.
पी रमेश (50 मूळ गुंटूर-आंध्रप्रदेश) हाका सोदून काडपा खातीर पुलिसांनी आतां लूक आवट नोटीश काडल्या तशेंच बसस्टॅण्ड, रेल्वे स्टेशनांनी पुलीस दवोरल्यात. एका वेवसायिकान फाटल्या फेब्रुवारी म्हयन्यांत बँकेतल्यान अडेज लाख रुपया काडून मुरगांव पालिका मंडळाच्या कार्यालया कडेन आपले गाडयेंत दवोरिल्ले. तिचो हारसो फोडून रमेश हाणे ती रक्कम फारायल्ली. वेवसायिकान कागाळ करतगीर वास्को पुलिसांनी सीसीटीव्ही फूटेज पळोवन सोद सुरू केल्लो.
संबंदीत वेवसायिकान पी रमेश हाका बिरेस्तारा सकाळी वास्को कर्नाटक बँके कडेन पळयलो आनी ताका धरून वास्को पुलिसांचे सुवादीन केलो. ताका रितसर अटक करून पुलिसांनी वैजकी तपासणे खातीर ताका चिखलीच्या चिखली कॉटेज हॉस्पिटलांत व्हेलो. मात ताच्या एका पायांत प्लास्टर आशिल्ल्यान दोग पुलीस बिरेस्ताराक सांजे ताका घेवन जीएमसीत गेल्ले. पुलीस वैजकी तपासणेची कागदपत्रां घेतना पी रमेश हाणे तांची नदर चुकोवन फुज्जो काडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
