भांगरभूंय | प्रतिनिधी
खबरां संस्था
फ्लोरिडाः भारत आनी वेस्ट इंडिज हांचे मदले पांच टी-20 मॅचींची निमणी आनी निर्णायक मॅच ढगाळ वातावरणाक लागून थांबोवची पडली. ह्या वेळार वेस्ट इंडिजान भारताच्या 165 धांवड्यांत 12.3 ओव्हरींत 1 बाद 117 अशी जाप दिल्ली आनी ते ही माळ जिखपाचे वाटेर आशिल्ले. दोनूय पंगडांनी दरेकी 2 मॅची जिखल्ल्यान माळेचो निकाल हे मॅची वयल्यान लागपाचो आशिल्लो. खेळ थांबयलो तेन्ना ब्रॅडोन किंग ( 54) आनी निकोलस पुरन (46) खेळटाले आनी जैता खातीर वेस्ट इंडिजाक 45 बॉलांत 49 धांवड्यो जाय आशिल्ल्यो. भारतान आपल्या डावांत 9 आवट 165 धांवड्यो केल्योो. तातूंत सूर्यकुमार यादवाच्यो 61 धांवड्यो आशिल्ल्यो.
2-2 अशे बोरोबोरी उपरांत लॉकरहिल पार्क स्टेडियमार निर्णायक म्हत्वाच्या पांचव्या आनी निमणे टी-20 मॅचींत टॉस जिखून पयलीं खेळपी भारताक रोमारियो शॅफर्ड तशेंच अकील हुसेन आनी होल्डरान 20 ओव्हरींत 9 आवट 165 अशें आडायलं. सूर्यकुमार यादवान कठीण परिस्थितींत केल्ल्या 61 धांवड्यांक लागून भारत देडशेंचो टप्पो हुबपाक शकलो.
भारताची सुरवात बावत जाली. वेस्ट इंडिजाचो फास्ट बॉलर अकील हुसेन हाणे 2 आवट 17 अशी केली. येसस्वी जयस्वाल आनी शुभमन गील ह्या भारताच्या ओपनरांक ताणे पॅव्हलियनांत धाडलें. आपले पयले ओव्हरीच्या पांचव्या बॉलार ताणे येसस्वी जयस्वालाची कॅच घेतली. चार बॉलांत एक चौक्यान 5 धांवड्यो करून जयस्वाल आवट जालो. 1 बाद 7 उपरांत परत एक फावट हुसेनान भारताक दुसरो धपको दिलो. ताणे आपले तिसरे ओव्हरीच्या पांचव्या बॉलार शुभमन गील 9 धांवड्याचेर खेळटना ताका एलबीडब्ल्यू केलें.
सूर्यकुमार यादव आनी टी-20 आंतरराष्ट्रीय मॅचींत पदापर्ण करपी तिलक वर्मा डाव साल्वार करतले अशें दिसतनाच जॉस्टन चेसान भारताक तिसरो धपको दिलो. भारताच्या 66 धांवड्याचेर ताणे तिलक वर्माची आपल्याच बॉलार कॅच घेतली. 18 बॉलांत 3 चौके आनी दोन सक्यानी ताणे 27 धांवड्यो केल्यो. सूर्यकुमार आनी तिलकान तिसरे विकेटी खातीर 49 धांवड्याची भागिदारी केली. पंगडाच्या धांवड्यांत 21 धांवड्यांची भर घालून संजू सॅम्पसन (13) आवट जालो. रोमारियो शेफर्डच्या बॉलार पुरनान ताची कॅच घेतली. भारताची स्थिती ह्या वेळार 10.2 ओव्हरींत 4 आवट 87 अशी जाल्ली. भारताक साल्वार करपाची जापसालदारी कॅप्टन हार्दिक पंड्या आनी सूर्यकुमार हे पांचवे जोडयेर येवंन पडिल्ली.
रोमारियो शेफर्डान ही जोडी फोडली. हार्दिक पंड्या ताच्या बॉलार होल्डराच्या हातांत कॅच दिवन पॅव्हेलियनांत परतलो. ताणे 18 बॉलांत फकत एक सको मारून अश्यो तश्यो 14 धांवड्यो केल्यो. उपरांत होल्डरान सूर्यकुमाराक एलबीडब्ल्यू करून भारताक सगल्यांत व्हडलो धपको दिलो. 45 बॉलांत 4 चौके आनी 3 सक्यांनी अर्दशेंकडो (61) करून सूर्यकुमारान भारताच्या बॅटिंगेची लज मात्शी राखली. 17.5 ओव्हरींत भारताच्या नांवार ह्या वेळार 6 आवट 140 धांवड्या लागल्ल्ल्यो. शेफर्डान अर्शदीप सिंग (8) आनी कुलदीप यादवाक (0) फाटोफाट आवट करून भारताची स्थिती 8 आवट 149 अशी केली. अक्षर पटेल ( ) आनी युजवेंद्र चहल ( ) नाबाद उरले आनी भारताच्या नांवार 20 ओव्हरीत फकत 9 आवट 165 धांवड्यो लागल्यो. शेफर्डान 4 जाल्यार अकील हुसेन आनी होल्डरान दरेकी 2 विकेटी घेतल्यो.
वेस्ट इंडिजाच्या डावाची सुरवात भारता भशेन जाली. 5 बॉलांत एक सको आनी एका चौक्यान 10 धांवड्यो करपी तांचो ओपनर क्रायल मेयर्साक अर्शदीप सिंगान जयस्वाला वरवीं कॅच आवट केले. 1 आवट 12 उपरांत ओपनर ब्रन्डोन किंग आनी निकोलस पुरन हाणी 5.5 ओव्हरींत 55 धांवड्यो करून जैताचें मुळावण घालपाक सुरवात केली. सुरवात सादूरतायेन करपी ह्या खेळगड्यांनी ल्हवू ल्हवू जम बसोवपाक सुरवात केली. सके आनी चौक्यांनी तांणी जाता तितल्या बेगीन जैत लागीं हाडपाची खेळी सुरू केली. 8.3 ओव्हरींत तांणी 81 धांवड्यो केल्यो. ही जोडी फोटपाक हार्दिक पंड्यान मुकेश कुमाराक लेगीत बॉलिंगेक हाडलो पूण ताचे पयलेच ओव्हरींत पुरण आनी किंगान 10 धांवड्यो काडल्यो. ईकरावे ओव्हरींच्या पयल्या बॉलार वेस्ट इंडिजाच्यो 102 धांवड्यो जाल्यो आनी ही निर्णायक मॅच भारताच्या हातांतल्यान गेली. 45 बॉलांत वेस्ट इंडिजाक जैता खातीर 49 धांवड्यो जाय आशिल्ल्यो तेन्ना ढगाळ हवामानाक लागून खेळ थांबोवचो पडलो. ह्या वेळार 12.3 ओव्हरींत तांणी 1 आवट 117 धांवड्यो केल्लो. किंग 54 आनी पुरण 46 धांवड्यांचेर खेळटाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
