भांगरभूंय | प्रतिनिधी
खबरां संस्था
ब्रिस्बेनः ऑस्ट्रेलियेचे भुंयेर खेळयल्ले टॅस्ट माळेंतली दुसरी आनी निमणी टॅस्ट मॅच जिखून वेस्ट इंडिजान ही माळ बरोबरींत सोडयली. गाबा मैदानार वेस्ट इंडिजान ऑस्ट्रेलियेक 8 धांवड्यांनी हारयलें. ह्या जैता सयत वेस्ट इंडिज पंगड ऑस्ट्रेलियेक दीस- रात टॅस्टींत (गुलाबी बॉल टॅस्ट) हारोवपी पयलो पंगड थारला. ही टॅस्ट माळ 1-1 अशी बरोबरींत सुटली. माळेंतली पयली मॅच ऑस्ट्रेलियेन जिखल्ली. वेस्ट इंडिजा वतीन शमर जोसेफान बरी बॉलींग केली. दोनूय डावांत बरो खेळ केल्ले खातीर ताका मॅन ऑफ दी मॅच अशेंच मॅन ऑफ दी मॅच म्हणून भोवमानीत केलें.
वेस्ट इंडिजान ऑस्ट्रेलियेक जैता खातीर 216 धांवड्यांचें लक्ष्य दिल्लें. मात ऑस्ट्रेलिया आपल्या दुसऱ्या डावांत 207 धांवड्यो करपाक शकलो. वेस्ट इंडिजान 36 वर्सां उपरांत ऑस्ट्रेलियेक ब्रिस्बेनांत ऑस्ट्रेलियेक हारयलें. हाचे पयलीं 1988 वर्सा तांणी जैत मेळयल्लें. शमर जोसेफान 7 विकेटी घेतल्यो. जोश हेजलवुडाची विकेट घेवन तांणे ऑस्ट्रेलियेक ऑल आवट केलें. स्टीव स्मिथान (नाबाद 91) ऑस्ट्रेलियेचो दुसऱ्या डावांत किल्लो लढयलो. वेस्ट इंडिजान पयल्या डावांत 311 आनी दुसऱ्या डावांत 193 धांवड्यो केल्यो. ऑस्ट्रेलियेन पयलो डाव 9 आवट 289 धांवड्यांचेर घोशीत केल्लो. पयली टॅस्ट मॅच ऑस्ट्रेलियेन 10 विकेटींनी जिखल्ली.
मजगतीं वेस्ट इंडिजान हें इतिहासीक जैत मेळयलें तेन्ना वेस्ट इंडिजाचो दिग्गज बॅट्समन ब्रायन लारा कॉमेंट्री करतालो. वेस्ट इंडिजाक जैत मेळटगीर ताच्या दोळ्यात खोशयेची दुकां आयलीं. 27 वर्सां उपरांत ऑस्ट्रेलियेक तांचेच भुंयेंत हारोवपाक आमी येसस्वी थारले. चडसो अणभव नाशिल्ल्या आमच्या खेळगड्यांनी वर्ल्ड चॅम्पियन ऑस्ट्रेलियेक हारयलें. फुडलीं जायती वर्सा हे जैत वेस्ट इंडिजाच्या समर्थकांचें यादींत उरतलें अशें ताणे सांगलें.
ब्रिस्बेनांतले द गाबा मैदान म्हणल्यार ऑस्ट्रेलियेचो बालेकिल्लो मानतात. 1988 उपरांत ताणी ह्या मैदानार हार घेवंक नाशिल्ली. मात 2011 वर्सा अजिंक्य रहाणेच्या फुडारपणा खाला खेळपी भारतीय पंगडान तांका ह्या मैदानार हारयल्लें. वेस्ट इंडिजान ताची पुनरावृत्ती केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
