भांगरभूंय | प्रतिनिधी
सुरावली ग्रामसभेंत भरावाची माती काडपाची मागणी
भांगरभूंय । प्रतिनिधी
मडगांव : वेस्टर्न बायपासाचें बांदकाम करतना पुला पोंदां घातिल्ली भरावाची माती काडपाची मागणी करून लेगीत ती काडूंक ना. ताका लागून शेतजमनींतलें उदक उणें जायना आनी हुंवाराची स्थिती निर्माण जावं येता. ताका लागून योग्य तरेन मातयेचो भराव काडून उदकाच्यो वाटो मेकळ्यो करच्यो, अशी मागणी सुरावली ग्रामसभेंत केली. तशेंच गांवांतल्या संसाधनांचो विचार करुनूच हे मुखार प्रकल्पांक परवानगी दिवची, अशीय मागणी केली.
सुरावली पंचायतीची ग्रामसभा पंचायतीच्या सभाघरांत आयतारा सकाळीं जाली. हे ग्रामसभे वेळार लोकांनी सुरावले दोन पंचायती करच्यो, अशी खेबाडां करतना मागणी केली. एके पंचायतीचो कारभार सचीव आनी वेंचून आयिल्ले पंच पळयतले, जाल्यार दुसरे पंचायतीचो कारभार बीडीओ, नगरनियोजन आनी जिल्हो पांवड्या वयले अधिकारी पळयतले, अशें सांगलें. गांवांतल्या ज्या प्रकल्पांक ग्रामसभेंत विरोध जाता आनी जांकां परवानगी न्हयकारतात, तांकां बीडीओ, जिल्होधिकारी कार्यालय आनी नगरनियोजन खात्या कडल्यान परवानगी दितात. पंचायत संचालनालयाक लोकांच्या भावनांचें मोल ना, अशेंय सांगलें.
गांवांत कोयर, उदक, घाणयारें उदक आनी हेर समस्यांनी वाड जातली, हे खातीर संसाधनांचो विचार करून प्रकल्पांक परवानगी मेळपाची गरज आसा. तशेंच गांवांतल्यान स्टिल्ट पुला लागसारच्या मातयेच्या भरावाक लागून गांवांतल्या शेतांत उदक सांचून उरता. उदकाच्यो वाटो मेकळ्यो जावंक नात. हाचेर पंचायती कडल्यान फाटपुरवण करून उदकाच्यो वाटो मेकळ्यो करतले, अशें सांगलें. दक्षीण – पश्चीम रेल्वे कडल्यान संपादन केल्ल्या गांवांतले जमनीचो प्रस्न मांडलो. तशेंच कोयराचो प्रस्न सोडोवपाचीय लोकांनी मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
