भांगरभूंय | प्रतिनिधी
वेसन म्हणजे एक दुयेंस. आपले कुडीचेर जाल्लो घातक परिणाम. रस्त्यावेले अपघात, हत्या, आत्महत्या, बलात्कार, विनयभंग हाकाय वेसन तितलेंच जापसालदार आसा.
घुंवळे वखदां- चरस, गांजो, अफू खावप, ओडप म्हणल्यार शारिरीक आनी मानसीक भलायकेचेर घातक परिणाम करून घेवप. संबंदीत वेसनी मनशाची संबंद जीण इबाडून वता.
देशाचो फुडार आशिल्ली आयची युवा पिळगी घुंवळे वखदांचे भकीक पडिल्ली दिसता. आयज भुरग्यांच्या पालकाक आपल्या भुरग्याक ड्रग्सा पसून कसो वांचोवप हो प्रस्न पडला. थोड्या लोकांक घुंवळे वखदां घेतलीं, सोरो पियेलो म्हणटकच आपूण ताण, तणावांतल्यान मुक्त जातलो, आनंदी उरतलों, आपणाक रातची बरी झेम पडटली, अशें दिसता. दुख्ख विसरपाक जातलें, कश्ट, दुबळेंपण विसरूंक शकतलों, असोय कांय जाणांचो गैरसमज जाता. पयलीं थ्रील म्हूण इल्लेंशें ड्रग्स घेवप. मागीर ल्हवू ल्हवू मनीस वेसनांत शिरकता. वेसनाचें प्रमाण वाडटा, तशें ताच्या वागपांत बदल जातात. तो किरकीर करता, झेम पडना, चंचल जाता. थरथरता, तकली दुखता, पोटांत दुखता, ताण येता. न्हिदन दिसता.
ड्रग्साच्या प्रमाणांत वाड जाली जाल्यार मागीर तो मनीस कसलेंच काम करपाक शकना. ह्या विळख्यांतल्यान भायर येवपाक मेळटा, पूण तें कठीण काम. निरशेणी, हुस्को हाका लागून मागीर तो जिवाचें बरें वायट करूं शकता. वेसन मनीस एकलोच करता, पूण ताचो परिणाम उणोच 20 मनशांचेर जाता. आपल्या कुटुंबांतल्या लोकांक त्रास जाता, तांकां समाजांत लज जाता, हें त्या मनशाक कळटा, पूण तो वेसन सोडूंक तयार नासता. तो वेसनाचो गुलाम जाल्लो आसता. काम, खळ, संगीत, कुटुंबांतले कार्यक्रम हांचे पसून तो चार पावलां पयस रावता.
वेसनी मनशान तें सोडपाक दोतोरांचो सल्लो घेवपाक जाय. संगीत, नाच, चित्रकला, वाचनांत मन घालपाक जाय. निर्व्यसनी इश्टां वांगडां वेळ पासार करपाक जाय. तशे हजारांनी मार्ग आसात.
निमणें वेसन म्हणजे एक दुयेंस. आपले कुडीचेर जाल्लो घातक परिणाम. रस्त्यावेले अपघात, हत्या, आत्महत्या, बलात्कार, विनयभंग हाकाय वेसन तितलेंच जापसालदार आसा.
सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
