भांगरभूंय | प्रतिनिधी
मुंबयंत पयलेच फावट जाल्ल्या वेव्हज 2025 कार्यावळीन सर्वसामान्यांचीं काळजां जिखलीं. तशें पळोवंक गेल्यार वेव्हज 2025 हो सगळ्यांच्यया आवडीचो विशय. सर्जनशीलताय, वेपार आनी सहयोग हांकां एकठांय हाडपी जागतीक माची म्हणून ताचे कडेन पळयतात. वेव्हज 2025 न उच्च दर्जो मेळयला. दूरदृष्टीपूर्ण धोरणात्मक घोशणा, आंतरराष्ट्रीय कबलात, बळिश्ट वेवसायीक वेव्हार आनी गुंतवणुकीच्या फांटभुयेंचेर वेव्हजान भारताच्या जागतीक सर्जनशील फुडारपणाची भुमिका दाखोवन दिल्या.
मुंबयंत जाल्ल्या ह्या उत्सवांत गोंय सरकाराच्या म्हायती आनी प्रसिद्धी खात्यान वांटो घेतिल्लो. गोंय सरकारा वतीन घाल्ल्या दालनाक बरो प्रतिसाद मेळ्ळो. दालनाक भेट दिवपी गोंयां विशीं तशेंच गोंयांत चित्रपट निर्मिती खातीर उपलब्ध साधन सुविधा विशीं म्हायती करून घेतना दिसताले. वेव्हज 2025 कडेन दरेक सर्जकाक एक स्टार करपाची लोकचळवळ म्हणून पळयतात.
चार दीस चलिल्ल्या ह्या उत्सवांत बरीच गर्दी दिसून आयली. ह्या चार दिसांत मोठ्या प्रमाणांत आर्थिक उलाढाल जाली. 3000 परस चड बीटूबी बसकांत जाल्ल्या 1328 कोटी रुपयां परस चड मोलाचो वेवसायीक वेव्हारा खातीर वेव्हज बाजारान येस मेळयलें अशें म्हणल्यार अतिताय जावची ना. महाराष्ट्र सरकारान माध्यम आनी मनरिवजणव मळार 8000 कोटी रुपयांची कबलात केल्ल्याचें समजता.
हाचे खेरीज, गोंयांत वाडट्या पायाभूत सुविधा आनी विकासात्मक कामांक मुख्यमंत्री डॉ. प्रमोद सावंत हांच्या कारकिर्दीत दिल्ल्या प्रोत्साहन दालनांत मुखेलपणान दाखयिल्ले. तेच प्रमाणें मनरिजवण उद्योगांत चर्चा, सहकार्य आनी नवीन उपक्रमांक प्रोत्साहन दिवपा खातीर वेव्हज 2025 ही एक बरी माची आसा. गोंयांतल्या दालनाक भेट दिवपी पर्यटकांनी राज्यांत चित्रपटांच्या चित्रीकरणा खातीर परवानग्यो मेळोवपाच्या प्रक्रियां विशीं चड प्रस्न विचारले. हे शिवाय गोंय सरकाराच्या चित्रपट येवजणे विशीं लोक चड म्हायती मेळोवन घेताले.
गोंयांत मोठ्या प्रमाणांत जावपी चित्रपटांच्या चित्रीकरणा खेरीज, गोंय वेडिंग डेस्टिनेशन म्हणून चड पसंतीचें आशिल्ल्याचें लोक उलयतात आनी ते विशीं म्हायती मेळोवन घेताले. चित्रपटांच्या चित्रीकरणा उपरांत गोंयां विशीं म्हायती घेवपा खातीर लोक मोठ्या प्रमाणांत दालनालक भेट दीत आशिल्ल्याचें दिसून आयलें. लोकांनी थंय सॅल्फीय काडल्यो. वेव्हज 2025 कडेन वेगवेगळ्या दृष्टकोनातल्यान पळयल्यार तो एक येसस्वी प्रयोग जालो हें सिद्ध जालां. क्रिएट इन इंडिया चॅलेंज भारतांत सृजनशील अर्थवेवस्थेक चालना दितलें हें वेव्हज 2025च्या एकंदरीत उलाढालींतल्या दिसून आयलें. वेव्हज अर्थांत जागतीक दृक-श्राव्य आनी मनरिजवण शिखर परिशद ह्या प्रतिश्टेच्या, माध्यम आनी मनरिजवण क्षेत्रांतल्या पयल्या वयल्या महोत्सवाक बरो प्रतिसाद मेळपा फाटल्यान आयोजकांचे कश्ट आशिल्ले. तेच खातीर प्रदर्शक, उद्योग, स्टार्टअप्स, धोरणकर्ते, शिक्षणतज्ज्ञ आनी सामान्य जनते कडल्यान खूब प्रतिसाद मेळ्ळो.
वेव्हज 2025″ ह्या जागतीक ऑडिओ व्हिज्युअल आनी मनरिजवण शिखर परिशदेंत अंदूंचे मुखेल मुद्दे अशे आशिल्ले. क्रिएट इन इंडिया चॅलेंज हो एक महत्त्वाचा मुद्दो आशिल्लो. हातूंत एक प्रतिभा शोध उपक्रम जो युवा निर्मात्यांक ॲनिमेशन, गेमिंग, संगीत आनी चित्रपट ह्या सारक्या श्रेणींत ३२+ आव्हानांत स्पर्धा करपा खातीर आपोवणें दितालो. ह्या विभागा खातीर उत्स्फूर्त प्रतिसाद दिसून आयलो. जातूंत मास्टरक्लास, कार्यशाळा आनी ‘क्रिएट इन इंडिया चॅलेंज’ सारक्या उपक्रमांचो आसपाव आशिल्लो.
नामनेचे कलाकार आनी प्रभावशाली आशय निर्माते आसूं, तंत्रज्ञान नवोन्मेशक आनी कॉर्पोरेट मळावयले नामनेचे व्यक्ती अशा सगळ्याच मळा वयल्या व्यक्तींच्या सहभागा खातीर ही परिशद म्हणल्यार माध्यम आनी मनरिजवण संस्थे खातीर संगमाचें केंद्र थारली. प्रदर्शनां, पॅनेल चर्चा आनी बीटूबी सहकार्याच्या उत्साही आस्पावा सयत, हे कार्यावळीक बरो प्रतिसाद मेळ्ळो.
मुंबयच्या जिओ वर्ल्ड कन्व्हेन्शन सेंटरांत प्रधानमंत्री नरेंद्र मोदी हांचे हस्तुकीं विंगड विंगड मानेस्तांच्या हाजिरेंत ह्या महोत्सवाची सुरुवात जाली. वेव्हज हें फक्त एक ब्रँड न्हय तर संस्कृती, सृजनशीलता आनी सार्वत्रिक नात्या संबंधाचें हें एक ल्हार आसा अशें प्रधानमंत्र्यांनी आपल्या भाशणांत म्हणलें. चित्रपट निर्मिती, डिजिटल आशय, गेमिंग, फॅशन, संगीत आनी लायव्ह कॉन्सर्ट खातीर जागतीक केंद्र म्हणून मुखार येवपी आमचो भारत देश म्हणल्यार गुंतवणूकदारांक विंगड विंगड वाठारांनी गुंतवणूक करपाक सुविधा दिता.
अंदूंच्या वेव्हजांत विभागीय चर्चासत्रां लेगीत आशिल्लीं. जातूंत प्रसारण, डिजिटल मीडिया, ओटीटी, ए आय, संगीत, खबरो, लायव्ह कार्यावळ, ॲनिमेशन, गेमिंग, आभासी निर्मिती, चित्रकथा आनी चित्रपट निर्मिती यासारक्या विशेश संकल्पनेचेर खोलायेन चर्चा करपा खातीर एक माची मेळोवन दिली.
आंतरराष्ट्रीय सहकार्या खाला एक मोठी कामगिरी म्हणची पडटली, ती म्हणल्यार न्यूझीलंडांतल्या फिल्म इंडिया स्क्रीन कलेक्टिव्ह आनी स्क्रीन कॅंटरबरी एनझेड हांणी न्यूझीलंडांत पयल्या भारतीय चित्रपट महोत्सवाक सुरू करपा खातीर एक सहयोगी प्रस्ताव जाहीर केलो. ओन्ली मच लाउडरचे सीईओ तुषार कुमार आनी रशियन फर्म गॅझप्रॉम मीडियाचे सीईओ अलेक्झांडर झारोव्ह हांणी रशिया आनी भारतांत सांस्कृतिक महोत्सवांत सहकार्य करपा खातीर आनी कॉमेडी आनी संगीत विशयक कार्यावळींची सह-निर्मिती करपा खातीर सामंजस्य कबलात बेगिनूच करपाची घोशणा केली. प्राइम व्हिडिओ आनी सीजे ईएनएम भोववर्सुकी सहयोगाची घोशणा ही या उत्सवाची आनीक एक आकर्शण आशिल्लें. कारण जागतीक पांवड्यार प्रीमियम कोरियन आशय वितरित करपा खातीर धोरणात्मक भागीदारीचें अनावरण केलें. हेर टप्पे म्हणल्यार ‘देवी चौधराणी’ चित्रपटाची घोशणा, जो भारताचो पयलो अधिकृत इंडो-यूके सह-निर्मिती आशिल्लो चित्रपट थारला.
म्हायती आनी प्रसारण तशेंच संसदीय कार्य राज्यमंत्री डॉ. एल. मुरुगन हांणी मुंबयच्या वेव्हज परिशद 2025त पांच महत्त्वपूर्ण अहवालांचें लोकार्पण केलें. हे अहवाल भारताच्या समृद्ध माध्यम आनी मनरिजवण परिसंस्थेचे सर्वसमावेशक विहंगावलोकन करतात, तातूंत आशय सामग्री निर्मिती, धोरणात्मक चौकट आनी थेट कार्यावळी अशा मुखेल गजालींचेर उजवाड घालो.
एकंदरीत, अंदूच्या वेव्हज 2025 कडेन पळयल्यार सर्जनशीलतात, वेपार आनी सहयोग हांकां एकठांय हाडपी जागतीक माची म्हणून वेव्हजा कडेन पळयतात. 77 देशांनी वेव्हज जाहीरनाम्याक तेंको दिला. हाचे वयल्यान वेव्हजचें येस दिसता. हे मुखार वेव्हज एक जागतीक चळवळ जातली. फुडले आवृत्तींत गोंय आनीक प्रभावशालीपणान सहभागी जातलें आनी गोंयाक ताचो लाव जातलो हाचेर लक्ष आसतलें.
(लेखक सहायक म्हायती अधिकारी आसात.)
श्याम गांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
