भांगरभूंय | प्रतिनिधी
नवी दिल्ली, खबरां संस्था ः भारतांतल्या फुटबॉल मोगीं खातीर एक बरी खबर आसा. ती म्हणल्यार डीएफबी-पोकलाच्या (DFB-Pokal) भागीदारींतल्यान वेव्हज ओटीटी 2 आनी 3 एप्रीलाक फुटबॉल मॅचींचे उपांत्य फेरयेचे आनी उपरांत 24 मेक सर्तीच्या निमाणे मॅचींचे लायव्ह प्रसारण करतले. भारत आनी जर्मनी हांचे मदले फुटबॉल खेळां संबंद घटमूट करपा खातीर प्रसार भारती आनी डीएफबीन म्हत्वाची कबलात केल्या. ते प्रमाण फुटबॉल खेळा संबंदीत चड म्हायती भारतांत प्रसारीत जातली. तशेंच 17 वर्सां पिरायेच्या सकयल्या गटा खातीर प्रतिभा सोद सर्त सुरू जातली, जातूंत 20 तरणाट्या भारतीय खेळगड्यांक जर्मनींत प्रशिक्षण घेवपाची संद मेळटली.
प्रसार भारतीचे मुखेल कार्यकारी अधिकारी गौरव द्विवेदी हांणी सांगलें, डीएफबी कडेन केल्ल्या सहकार्य लागून भारतीय प्रेक्षकां खातीर फकत उंचेल्या दर्ज्याच्यो फुटबॉल मॅची पळोवपाक मेळटल्यो तेच बरोबर आमच्या तरणाट्या फुटबॉल खेळगड्यांक आंतरराष्ट्रीय दर्ज्याच्यो फुटबॉल मॅची अणभवांकय मेळटल्यो. उच्च दर्ज्याच्या सामुग्रीचो आनी तळागाळांतल्या उदरगतीचो मेळ घालून आमी भारतांतली एक घटमूट फुटबॉल संस्कृताय जतन करता आनी आमच्या तरणाट्यांक संद दिता.
फुटबॉल मोगीं मदली उमेद वाडोवन बर्लिनांत जावपी डीएफबी-पोकल फायनलीं खातीर दोन नशीबवान भारतीय फुटबॉल मोगींक जर्मनीची फुकट भोंवडी जिखपाची संद मेळची म्हणून एक विशेश सर्त सुरू केल्या. सर्तकांनी वेव्हजओटीटी अॅप डावनलोड करुन डीएफबी-पोकल सर्तीच्यो सेमीफायनल मॅची पळोवच्यो आनी सोपें प्रस्नांक जाप दिवची पडटली. उपांत्य फेरयेच्या निमाण्या मॅची वेळार जैतिवंत जाहीर जातले आनी जर्मनींत जावपी निमाणी मॅच प्रत्यक्ष पळोवपाची तांकां संद मेळटली.
फुटबॉल शिक्षण वाडोवपाच्या वचनबद्धतेचो एक भाग म्हूण, वेव्हज ओटीटी चेर डीएफबी-पोकल ट्युटोरियल मालिकाय आसतली, जी वापरप्यांक जर्मनीच्या प्रतिश्ठीत नॉकआउट सर्ती विशीं इतिहासीक नदर, अभिलेखीय फुटेज आनी तज्ञांचे विश्लेशण उपलब्ध आसतले.
डीएफबी-पोकल (Deutscher Football-Bund Pokal) ही जर्मनीची मुखेल देशांतर्गत सर्त आसून ती जर्मन फुटबॉल असोसिएशन (डीएफबी) घडोवन हाडटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
