भांगरभूंय | प्रतिनिधी
– सुदारणा तत्वांची अजून मेरेन कार्यवाही ना
– ऑनलायन सेवां विशीं जागृताय ना
– केंद्रीय संस्थेक (डीपीआयआयटी) अहवाल सादर
भांगरभूंय । प्रतिनिधी
पणजी : वेवसाय सुलभीकरणा विशीं केंद्रा कडल्यान जारी जाल्ल्या सुदारणा मार्गदर्शक तत्वांची जीआयडीसी, एफडीए, कायदो, मजूर हे सारक्या खात्यां कडल्यान अजून मेरेन कार्यवाही जावंक ना. वेवसायीक सुदारणां विशींच्या 24 मुद्यांची अजून कार्यवाही जावंक ना. वेवसाय सुलभीकरणाच्या मार्गदर्शक तत्वांच्या कार्यवाही खातीर सरकारान खात्यांक 3 म्हयन्यांची मुजत दिल्या.
मुख्यमंत्री डॉ. प्रमोद सावंत हांणी कार्यवाहीची दखल घेवन खात्यांक 3 म्हयन्यांची मुजत दिल्या. सल्लागारां कडल्यान सल्लो घेवन कार्यवाही विशीं पावलां उखलपाचे आदेश मुख्यमंत्र्यांनी दिल्यात. वेवसाय सुलभीकरणाची प्रक्रिया सुरू करपा विशीं मुख्यमंत्री डॉ. प्रमोद सावंत हांणी 2022 त बसका घेतिल्ल्यो. केंद्रीय नियोजन आनी म्हायती तंत्रज्ञान खात्यान (डीपीआयआयटी) वेवसाय सुलभीकरणा विशीं मार्गदर्शक तत्वां जारी केल्लीं. वेवसाय सुलभीकरणा विशी केंद्रान वेवसाय सुदारणा कृती आराखडो (बीआरएपी) 352 मुद्दे कार्यवाबींत हाडपाक सांगिल्लें. तातूंतले 261 मुद्दे वेवसाया कडेन संबंदीत आसात, जाल्यार 91 नागरी सेवां कडेन संबंदीत आसात. मार्गदर्शक तत्वांची कार्यवाही करपा खातीर गुंतवणूक उर्बा मंडळ (आयपीबी) ही समन्वय संस्था आसा. हे संस्थेन कार्यवाही विशींचो अहवाल सादर केला.
गोंय उद्देगीक म्हामंडळ, अन्न आनी वखदां प्रशासन, नोंदणी, मजूर, कायदो, वजन माप खातें, नियोजन आनी सांख्यिकी, नागरी पुरवण, नोंदणी, येरादारी, प्रदुशण नियंत्रण मंडळ, अबकारी, नगर नियोजन, वीज, नगरपालिका प्रशासन ह्या खात्यानी मार्गदर्शक तत्चांची कार्यवाही करूंक ना.
कार्यवाही जावंक नाशिल्लीं मार्गदर्शक तत्वां
गोंय उद्देगीक म्हामंडळ – 23 उद्देगीक वसणुकांची म्हायती केंद्रीय उद्येगीक बँके कडेन ना.
एफडीए – वखदां निर्मिती/ वखदा विक्री परवानो पद्दत ऑनलायन ना.
नोंदणी – जमीन वेव्हारांची 10 वर्सांचीच म्हायती. 20 वर्सांची म्हायती जाय.
मजूर – कंत्राटदार परवाने, बांदकाम कामगार नोंदणी डीम्ड मान्यताय पद्दत ना.
कायदो – पेपरलेस न्यायीक पद्दत सुरू जावंक ना.
वजन आनी माप – वजन आनी मापाच्या तपासणेची यंत्रणा ना.
नियोजन आनी सांख्यिकी – जल्म आनी मरणाची ऑनलायन नोंदणी ना.
नागरी पुरवण – रेशन कार्ड ऑनलायन दिवपाची पद्दत ना.
नोंदणी – मालमत्तेक आयडी ना, म्युटेशना सयत जमीन नोंदणी ना.
येरादारी – वाहन चालन परवानो ऑनलायन ना.
जागृताय करपाची गरज
सकयल दिल्ल्या खात्यांनी सुदारणां तशेंच सेवा विशीं जागृताय करूंक ना.
प्रदुशण नियंत्रण मंडळ – ऑनलायन सेवे खातीर एकूय अर्ज येवंक ना.
अबकारी – सिंगल विंडो पद्दत आसा. एकूय अर्ज येवंक ना.
नगर नियोजन – बांदकाम परवानो ऑनलायन दिवपाची कार्यवाही ना.
मजूर – 12 कायद्यां खाला एकवटीत तपासणी पद्दत तयार. प्रदुशण मंडळाची म्हायती ना.
नगरपालिका प्रशासन – सिंगल विंडो खाला वेपारी परवान्या खातीर अर्ज ना. वीज – गोवा ऑनलायन माध्यमांतल्यान आयिल्या अर्जांचेर कार्यवाही ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
