भांगरभूंय | प्रतिनिधी
पणजी : वॅटा सयत वेपारी तशेंच डीलरांचें थकीत शुल्क फारीक करपा खातीर तांकां निमणी संद दिवपाची तजवीज आशिल्ली गोंय शुल्क थकबाकी वसुली दुरूस्ती विधेयक सभाघरांत सादर जालां. मुख्यमंत्री डॉ. प्रमोद सावंत हांणी अर्थमंत्री ह्या नात्यान हें विधेयक सादर केलां.
१ जुलय २०१७ सावन पुराय देशांत जीएसटी लागू जालो. ह्यान पयलीं बरेच वेपारी तशेंच डीलरां कडल्यान वॅट तशेंच हेर शुल्काची थकबाकी आसा. कळाव शुल्कांत सवलत दिवपा सयत शुल्क फारीक करपाची संद मेळपा खातीर सरकारान गोंय शुल्क थकबाकी वसुली कायदो २०२३ संमत केलो. ह्या कायद्याच्या आदाराचेर थकीत शुल्क फारीक करपा खातीरची संद वेपारी/ डीलरांक दिली. अर्ज करपा खातीर ७ मार्च २०२४ ही निमणी तारीख आशिल्ली. हे तारखे भितर खुबश्या जाणांनी अर्ज करूंक ना. हाका लागून अर्ज करपाची तारीख वाडोपा सयत थकीत शुल्क फारीक करपाची संद दिवपाची तजवीज करपी दुरूस्ती विधेयक सरकारान सादर केलां.
गोंय शुल्क थकबाकी वसुली कायदो २०२३मदीं कलम ८ ए आनी कलम १४ ह्या नव्या कलमांचो आस्पाव केला.
थकीत शुल्काचे कळंतर माफ करपा सयत दंड माफ करपाची तजवीज कलम ८ ए मदीं आसा. शुल्क फारीक करपा सयत दंड माफ करपा खातीर अर्ज केलो तरी वसुली खातीर सुरू आशिल्ली कायदेशीर प्रक्रीया बंद जावची ना. ती सुरूच उरपाची तजवीज कलमां मदीं आसा. मुळ कायद्यांत कलम ८ ए आनी कलम १४ या दोन कलमांचो आस्पाव दुरूस्ती विधेयकांत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
