भांगरभूंय | प्रतिनिधी
पणजी : वैजकी, अभियांत्रिकी, फार्मसी, वास्तुशिल्पकला, आयुर्वेदीक तशेंच हेर वेवसायीक अभ्यासक्रमाच्या प्रवेशाचे अर्ज तांत्रीक शिक्षण संचालनालय बुधवार, ७ मे सावन स्वीकारतले. ७ मे ते १६ मे २०२५ ह्या काळांत अर्ज स्विकारतले.
वैजकी (एमबीबीएस), अभियांत्रिकी (बीई), फार्मसी, आयुर्वेदीक, होमीओपथीक ह्या पद्वी अभ्यासक्रमाची प्रवेश प्रक्रीया तांत्रीक शिक्षण संचालनालया वतीन करता. वैजकी, दंत, आयुर्वेदीक, होमीओपथीक ह्या अभ्यासक्रमा खातीरचो प्रवेश नीट परीक्षेच्या गुणांचेर आदारून आसा. अभियांत्रिकी अभ्यासक्रमाचो प्रवेश जेईई परीक्षेच्या गुणांचेर आधारून आसतलो. नीट परीक्षा आयतार ४ मेक जाली. गोंयच्या ५ हजार विद्यार्थ्यांनी नीट परीक्षा दिली. प्रवेश परीक्षांचे निकाल जाहीर जाले उपरांत पात्रताय आनी गुणवत्ता वळेरी जाहीर करतले. हाच्यो तारखो काळा प्रमाण जाहीर करतले. अशी म्हायती तांत्रीक शिक्षण संचालनालयाच्या सुत्रां कडल्यान मेळ्ळी. वैजकी, अभियांत्रिकी, फार्मसी आनी हेर मेळून वेवसायी अभ्यासक्रमां खातीर राज्यांत सुमार अडेज हजार सुवातो आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
