भांगरभूंय | प्रतिनिधी
फाटलीं २० वर्सां ऑक्युपेशनल थेरपीच्या मळार, म्हळ्यार वेगवेगळ्या प्रकारच्या दुयेंतींची तपासणी करप, उपचार करतना आनी दुयेंतींच्या कुटुंबा कडेन संवाद सादतना म्हाका खूब अणभव मेळ्ळा.
वेगवेगळ्या पिरायेच्या, शारिरीक आनी मानसीक दुयेंसांचेर उपचार करतना ह्या उपचारा वरवीं लोकांक आत्मनिर्भर करपाक हांव पात्र थारलें हो एक आशीर्वाद अशें म्हाका दिसता. हे वेवसायीक उपचार पद्दतीन आमचें जिवीत बदललां अशें दुयेंती कडल्यान आयकून म्हाका खूब समाधान मेळटा. पूण ही खोस आनी समाधान हांव उतरांनी मांडूंक शकचें ना.
हांव एक ऑक्युपेशनल थेरपिस्ट. ह्या मळार लोकांची सेवा करप आनी मेळिल्लें गिन्यान म्हज्या विद्यार्थ्यां मेरेन पावोवपाची म्हजी मोख. ताचो म्हाका म्हाका अभिमान आसा. दरेकल्याक तो आसचो तातूंतल्यानच लोकसेवा करपाची आवड सगळ्यांमदीं निर्माण जातली.
आयज २७ ऑक्टोबर म्हुणल्यार “संवसारीक ऑक्युपेशनल थेरपी दीस”. वेवसायीक उपचाराक चालना दिवपाखातीर दर वर्सा हो दीस मनयतात.
वेवसायीक उपचार हो वैद्यकीय उपचाराचो एक फांटो, ताचो सगळ्या पिरायेच्या लोकांक लाव जाता. समाजाचो भाग जावपाक मदत करता.
शारिरीक, मानसीक वा हेर दिव्यांग आशिल्ल्या लोकांक सामान्य जिवीत जगपाक आनी शक्य तितलें स्वतंत्र रावपाक वेवसायीक उपचार मदत करता. विकासात्मक दिव्यांग, शिकपाक दिव्यांग, ऑटिझम, पक्षाघात, मेरुरज्जू आनी मेंदवाची जखम, संद दिवपी उदासीनताय, स्किझोफ्रेनिया, डिमेंशिया आनी पार्किन्सन अशे वेवेगळ्या रोगांचेर आनी विकारांचेर उपचार करपाक वेवसायीक उपचारकांची म्हत्वाची भुमिका आसता.
ऑक्युपेशनल थेरपी हो भारतांतल्या पन्नास परस चड संस्थांनी दिवपी अभ्यासक्रम. ह्या अभ्यासक्रमांत शिकपा खातीर बारावी पास जाल्ल्या विद्यार्थ्यांक भौतिकी, रसायनशास्त्र आनी जीवशास्त्र विशय म्हणून साडेचार वर्सांचो बॅचलर प्रोग्राम घेवंक मेळटा. ऑक्युपेशनल थेरपींत दोन वर्सां पोस्ट ग्रॅज्युएशन आसता. ते उपरांत ह्या विशयांत पीएचडी करप शक्य आसा.
ह्या मळार खूब तरेन फुडार घडोवं येता. जशे सल्लागार, वेवसायीक, उपचार तंत्रज्ञ, खाजगी वेवसायीक पुनर्वसन, प्राध्यापक, तशेंच खाशेल्या शाळांनी, शिक्षणीक संस्थांनी, पुनर्वसन केंद्रांनी, बहुविशेषज्ञ हॉस्पिटलांनी, मानसीक हॉस्पिटलांनी, खाजगी क्लिनीकांनी उपचारक म्हूण काम करूं येता.
डॉ. पूजा वज्रत्कार
(ऑक्युपेशनल थेरपिस्ट)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
