भांगरभूंय | प्रतिनिधी
साळांतल्या लोकांची मागणी, मतदारांचो उणो प्रतिसाद
भांगरभूंय । प्रतिनिधी
दिवचलः दिवचल म्हालांतल्या साळ पंचायतीची ग्रामसभा खेळीमेळींत जाली. समस्या सोडोवपाक ठोस निर्णय घेवपाक वेळ काडूं नाकात, असो सूर लोकांचो सभेंत आशिल्लो. हे ग्रामसभेक लोकांचो प्रतिसाद उणो आशिल्ल्याचो दिसून आयलो.
सरपंच सावित्री घाडी हांचे अध्यक्षते खाला जाल्ले ग्रामसभेक तांणी येवकार दिलो. पंचायत सचीव मुकेश नायक हांणी फाटले सभेचो अहवाल वाचलो आनी तो संमत केलो. तशेंच विवीध सरकारी येवजण्यां खातीर लाबार्थ्यां कडल्यान आयिल्ल्या आर्जांचेर चर्चा करून निर्णय घेतले. ते उपरांत मतदारां कडल्यान आयिल्ल्या विशयांचेर चर्चा केली. तातूंत चैतन्य जोशी हांणी मुख्य रस्तो ते उदक उपसा केंद्र (वाकार) ह्या पक्क्या रस्त्याचें बांदकाम करचें, कारण ह्या रस्त्यार अपघात वाडत आसात. देखीक पांय मुरगळप, फातराक पांय आपटून जखमी जावप, दुचाकी निसरून पडप अशें प्रकार घडटात. पंच विशाल परब हांणी सांगलें, रस्त्याक लागपी जमनीच्या धनयांचे नाहरकत दाखले घेवपाक पंचायत मंडळ सगळयांक वांगडा बरोवन विचार करतलें आनी निर्णय घेतलें.
मुकूंद सखाराम राऊत हांणी पांच म्हयन्यां आदीं प्रस्न सभेंत उपस्थीत केल्ले. तातूंत घरांत रावपी बिराडकारांची म्हायती एकठांय करपाची सुचोवणी केल्ली. ज्येश्ठ नागरीक सोमा राऊत हांणी मागणी करतना सांगिल्लें, ज्येश्ठ नागरिकांक चलपा खातीर फुटपाथाची वेवस्था करची. हाचेर सरपंच घाडी हांणी सांगिल्लें, सुवात उपलब्ध जाली जाल्यार हो प्रस्न सोडोवपा खातीर यत्न करतले.
मुख्य रस्तो ते नवोवाड्या मेरेन (फार्म 33) रस्तो बांदप, नवोवाड्या वयल्या घरांक उदकाचें कनेक्शन दिवप तशेंच कोयर एकठांय करपा खातीर पावलां उखलप आनी फुटपाथाची वेवस्ता करपा संबंदांत अर्चना परब हांणी फाटले ग्रामसभेंत विशय मांडले. ताचेर कसलींच पावलां उखल्ल्यांत अशें विचारताच सरपंच घाडी आनी पंच नीता राऊत हांणी सांगलें, हे विशय सुटावे जावपाच्या मार्गार आसात. मेघश्याम राऊत हे लेगीत हे प्रस्न सुटावे जावचे हे खातीर यत्न करतात, अशें सांगलें.
प्रकाश परब हांणी सांगलें, 108 सेवेची गाडी साळांत दवरची, तशेंच राष्ट्रीयकृत बँक वा एटीएम सेवा उपलब्ध करचे खातीर यत्न करचे. हाचेर सरपंच घाडी आनी नीता राऊत हांणी सांगलें, बँकेंत दिसपट्टी देवाण- घेवाण त्या प्रमाणांत जावची पडटा. तशेंच एटीएम सेवा सुरू उरचे खातीर एक अमूक आंकडो सांगला तो हांगा जावचो ना. ते खातीर दोनूय सेवा उपलब्ध जावच्यो नात.
कासारपाल आनी मेणकुरेंचें एटीएम योग्य सेवा दिवपाक शकना अशें मतदारांनी सांगताच, हाची चवकशी करतले अशें पंच नीता राऊत हांणी सांगलें.
मदलोवाडो पुला लागसार व्हाळार राखणे वणत तशेंच बांदाचें कितें जालें असो प्रस्न अर्जून परब हांणी विचारलो. ताका जाप दितना सरपंच घाडी हांणी सांगले, बेगिनूच हाची टेंडर प्रक्रिया जातली.
हे ग्रामसभेंत चैतन्य जोशी, मुकुंद राऊत, किर्ती राऊत, चंद्रकांत परब, मिंलिद राऊत, संदेश परब, विनया राऊत, प्रांजल नायक, किरण राऊत, अमर तारी, दामोदर परब, फटी राऊत, यशवंत राऊत, सोमा राऊत, प्रकाश परब, आनंद नायक, सुरेश परब, अमेय तारी, अर्चना परब, सीताराम हळर्णकार, प्रकाश राऊत, शामसुंदर राऊत हांणी चर्चेंत वांटो घेतलो.
लोकांनी उपस्थीत केल्ल्या प्रस्नांक सरपंच सावित्री घाडी, उपसरपंच देऊ राऊत, पंच नीता राऊत, पंच विशाल परब हांणी जापो दिवन तांचे दुबाव पयस केले आनी फुडली कार्यवाय करपाचें आस्वासन दिलें. ग्रामसभेचें वेवस्थापन पंच वैष्णवी परब, शांबा घुरे, आनंद राऊत आनी दत्ताराम परब हांणी केलें. ग्रामसभेंत निरिक्षक म्हूण अरवींद नायक (मेणकुरें) हे गटविकास कार्यालयांतले अधिकारी हाजीर आशिल्ले. नीता राऊत हांणी उपकार मानले आनी ग्रामसभा सोंपिल्ल्याचें जाहीर केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
