भांगरभूंय | प्रतिनिधी
आयज शेतकार शेतांत कश्ट करतात म्हूण आमचें पोट भरता. शेतां पडींग पडत आसात. हाचे मुखेल कारण म्हळ्यार आमकां आळसाय आयल्या. आमकां शेतांतलीं कामां करप ही लजेची गजाल कशी दिसता. कांय जाण कश्ट करपाक जमना. पूण आतां वेळ आयला, आमी नांगर घेवन शेतांत देवपाचो, प्रात्यक्षिका वांगडाच भुरग्यांक प्रत्यक्ष शेत लागवडीचें शिक्षण दिवप गरजेचें. तें दरेका स्कूलांतल्यान जावप गरजेचें आसा, अशे मत इन्फंट जीजस अकादमीचे मुख्याध्यापक सेबस्तियांव ब्रागांझ हांणी काडले.
ते पाली तळे शेतकार संघटनेन घडोवन हाडिल्ले कार्यावळींत उलयताले. कुठ्ठाळीचे आमदार आंतोन वाझ, शेतकारी संघटनेचे अध्यक्ष रूझारियो डिसोझा, पंच जीम डिसोझा, रेमेडीयस नोरोन्हा, आदली पंच सिल्वीमा डिसोझा, कुठ्ठाळी भलायकी केंद्राचे डॉ महेश चायल, रायस चटे अध्यक्ष रुकोझोन डिकोस्ता आदी मानेस्त हाजीर आसले.
आंतोन वाझ हांणी सांगलें: आयचे युवा पिळगेन सरकारी नोकऱ्यां फाटल्यान धांवनासतना आमची पारंपरीक कामां शिकचीं. शेता बगर पर्याय ना. शेता खातीर सरकारान जायत्यो येवजण्यो तयार केल्यात. ताचो पुरायपणान फायदो घेवन शेत लागवडीचें काम फुडें व्हरचें.
शेतकार संघटनेचे अध्यक्ष रुकोझीन डिसोझा हांणी सांगलें, 2.84 लाख चौ. मिटर शेताची लागवड वेळसांव गांवचे युवा पिळगेन केल्या. हें एक बरें उदाहरण आयचे पिळगे मुखार आसा. शेतकाराची पडिंग जमीन आसा जाल्यार पंचायतीचे वांगडी आनी कुठ्ठाळेच्या आमदाराक आदाराक घेवन आमी तांची लागवड करतले.
सुरवेक शिक्षिका प्रतीक्षा सबनीस हिणें प्रास्तावीक करून शेता विशीं म्हायती दिली. विद्यार्थी मनोकी डायस, समीर चौधरी, अंजली चितालका हांणी फुलां तुरे भेटयले. उपकाराचे उलोवप जितेंद्र च्यारी हांणी केलें.
ह्या वेळार स्कूलाच्या 90 भुरग्यांनी प्रत्यक्ष शेत लागवडीचो अणभव घेतलो. शेतकाराच्या संघटने वतीन भुरग्यांक उकड्या तांदळाची पेज, – आमील अश्या साबार घरगुती खाणां दिलीं. सगल्यांनी तें खावन धादोसकाय उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
