भांगरभूंय | प्रतिनिधी
मडगांवः चिंचणी, धर्मापूर आनी सारझोरा वाठारांनी लायटीचो आपालीपा चालूच आसता. ही समस्या सोडोवपा खातीर वेळ्ळी मतदारसंघांतल्या भुंयगत वीज लायनी खातीर 51 कोटी रुपयांचो प्रस्ताव तयार आसा आनी ताका वीज खात्या कडल्यान मंजूरी मेळपाची उरला. हे खातीर गरजेच्या निधीक सरकारान मान्यताय दिवची अशी मागणी आमदार क्रूझ सिल्वा हांणी केल्या.
धर्मपूरांतल्या नव्या ट्रान्सफॉर्मराचें उक्तावण आमदार सिल्वा हांणी केलें. ह्या वेळार सरपंच अविता परेरा, चिंचणी सरपंच फ्रँक व्हिएगस आनी हेर मानेस्त हाजीर आशिल्ले. वेळ्ळी वाठारांतल्या वीज उपकरणांचें नूतनीकरणाचे काम सुरू आसा आनी सुमार 70 टक्के काम पुराय जालां. धर्मपूरांत 90 टक्के काम पुराय जालां आनी हांगाचो दुसरो ट्रान्सफॉर्मरय बदलला. तशेंच पोरण्यो वायरी आनी खांबे बदलल्यात अशें आमदार सिल्वा हांणी सांगलें.
वीज सुदारपा खातीर लोकांनी सहकार्य करपाचो उलो सरपंच फ्रँक व्हिएगस हांणी केलो. वायरी घालपाक आनी खांबे उबारपाक झाडाचे फांटे कापून उडोवपाक लोकांनी विरोध करचो न्हय अशें तांणी स्पश्ट केलें. सरकारा कडेन भूंयगत वीज लायनी खातीर 51 कोटी रुपयांचो प्रस्ताव प्रलंबीत आसा ताका मंजूरी दिवची अशी मागणी तांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
