भांगरभूंय | प्रतिनिधी
भांगरभूंय । प्रतिनिधी
वाळपयः वेळूस- सत्तरी हांगच्या रवळनाथ देवस्थानाच्या गांवकार आनी गुरव म्हाजना मदीं वाद जाल्ल्यान पारंपरीक कालो दुसऱ्या दिवसा बंद करचो पडलो. गावांत तणावाची परिस्थिती जावची न्हय हे खातीर सत्तरीचो मामलेदार दशरथ गांवस हाणे देवस्थानाच्या दाराक कुलूप लावपाचो आदेश दिलो. देवळांत धर्मीक विधी करपाक दिवचे न्हय, पुलीस बंदोबस्त वाडोवपाक ताणे सांगलां.
गांवकार समाजा कडल्यान गुरव समाजांतल्या दोग जाणांक मारपेट केल्ले खातीर वाळपय पुलिसांनी गांवकार समाजांतल्या आठ जाणांक अटक करून उपरांत जामिनाचेर सोडले. देवस्थान वाठारांत पुलिसांक दवोरला अशें वाळपयचो पुलील निरीक्षक राहुल नायकान पत्रकारांक सांगलें. वेळुसच्या रवळनाथाचो दोन दिसांचो कालो आसता. बुधवारा पयल्या दिसा देवळाच्या गर्भकुडींत काम करपा वयल्यान गुरव आनी गांवकारां मदी वाद उप्रासलो. मामलेदारान तातूंत हस्तक्षेप करून गांवकार आनी गुरवांक गर्भकुडींत प्रवेश करपाक बंदी घालून सरकारी कर्मचाऱ्यांक तीर्थ दिवपाक सांगलें.
बिरेस्तारा दनपारां गुरव आनी गांवकार म्हाजनां मदीं बाचाबाची जाली. ह्या वेळार दिपक गुरव आनी राम गुरव हांका आठ गांवकारांनी मारपेट केली अशी कागाळ वाळय पुलीस स्टेशनांत केली. प्रदीप गांवस, उमेश गांवकार, रामदास गांवकार, लक्ष्मण गांवकार, लाडू गांवकार, भारत गांवकार, राजाराम गांवकार आनी दुलो गांवकार हाकां ह्या संबंदांत अटक करून जामिनाचेर सोडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
