वेळु जालो आनी ते गेले

भांगरभूंय | प्रतिनिधी

कोंकणी साहित्य नभा वयले देदीप्यमान सूर्य, नामनेचे कवी आनी साहित्य अकादेमी अणकार पुरस्कार विजेते के. अनंत भट हांचें काल कोच्चींत निधन जालें. कोंकणी भाशा प्रचार सभा आनी कोंकणी केन्द्र – गोश्रीपुर हे संस्थेंचे ते आदले अध्यक्ष आशिल्ले.
“वेळु जात्ता, वेळु जात्ता, करी रे तैयारी ।
खेळु जीवनाचो पळे दीस दोनि – चारि ।।”
म्हणलो तांगेलेंच गीत तांणी वेदीचेर आनी मित्रां लागीं गेले तीन वर्स सदां गुंगुनेवून आसताले. तांणी अंतिम यात्रेक तैयारी करचे वरी आमकां दिसतालें. आनी आज ते कसलोय तरी त्रास घेवनात्तीलें तांगेले जीवन यात्रा सोंपयली.
28.09.1939 तु कोच्चींतु जल्म. प्राथमिक आनी हायस्कूल शिक्षण कोच्ची टी. डी. स्कूलांत जालें. हिंदी राष्ट्रभाषा, संस्कृत कोविद, गीता विशारद आनी रामायण मध्यमा परिक्षेंतु पारंगत जाले.
संस्कृत, हिंदी, कोंकणी भासांनी खूब साहित्य परिश्रमु केला. आकाशवाणी धारवाड, मंगळूर, पणजी, मुंबय, कालिकट, तिरुवनंतपुरम, आलेप्पी, तृशूर इत्यादी केंद्रां वाटेन हांगेलीं गीतां, कविता, कथा, उलोवप आनी संगीत रूपकां प्रसार केल्यां. तुळसीदास, सूरभजनमाला, संगीत रूपकां, कोंकणी गीतमाला, हरुवें पान पिक्कल्ले पान, श्री रामचरितमानस, फूल आनी कांटो आनी अनंतु – हीं कोंकणी कृतियो उजवाडायल्यां. खूब कॅसेटांतुय, सीडींतुय हांगेलीं गीतां आयकूंक मेळटात.
1980 त भायर आयिल्ले ‘तपस्विनी’ कोंकणी चलचित्रांत हांणी एक सान पात्राचो अभिनयु केला आनी तांगेलें एक गीत त्या चित्रांत आसपाव केला. यूनियन बँक आॅफ इन्डियांत खूब वर्सांची सेवा केलेले उपरांत 1999 तु निवृत्त जाले. 1983 त केरळ कोंकणी अकादमीन ‘फेलोशिप’ दिवनु सन्मानु केलो. 1986 कोच्ची कोंकणी भाषा प्रचार सभेचो पुरस्कार मेळ्ळो. 1996 उडुपी के. जी. नायक सांस्कृतिक प्रतिष्ठानान सन्मानु केलो. 2006 त केंद्र साहित्य अकादेमीचो कोंकणी अणकार पुरस्कारु ‘श्री रामचरितमानस’ अणकाराक प्राप्त जालो. 2012 त चेन्नय भजनामृत संस्थेनय गौरवार्पण केलें. हांकां विक्रमाशिला हिन्दी विद्यापीठ हाणी 2013 त ‘विद्या वाचस्पती सारस्वत सम्मान’ मान्यता दिलो.
हांगेली धर्मपत्नी श्रीमती श्रीजया आनी 3 चेरडुवां – दीपा, बालकृष्ण आनी रेखा, असो परिवार आसा. भटमामाक आदरांजली.

एन. बालकृष्ण मल्ल्या
9497201681