भांगरभूंय | प्रतिनिधी
बारावेचो निकाल पोरुं परस जरी उणो लागला आसलो तरी पास जाल्यात तातूंत चलयो चड आसात. आतां मुखार कितें, हो प्रस्न पालक आनी विद्यार्थ्यां मुखार आसा. अंदूं 10 मे सावन नवी प्रवेश प्रक्रिया सुरू जावपाची आसा. कारण राष्ट्रीय शिक्षणीक येवजण काॅलेजांनी सुरू जाल्या. हे नवे पद्दतीन प्रवेश जातले, अशें दिसता. कारण कितेंय आसूं 10 मे मेरेन तुमचे कडेन वेळ आसा, ताचो उपेग तुमी विंगड विंगड शिक्षणीक कार्या खातीर करूं शकतात. तुमचे कडेन मोबायल फोन आसतलोच, ताचे वांगडा लॅपटाॅप घेवपाचो यत्न करात. कित्याक तर चडशीं कामां आतां लॅपटाॅपाचेरुच तुमकां करचीं पडटलीं. सेकंड हॅण्ड लॅपटाॅप सध्या तुमी घेवं शकतात. जर लागीं एखादी संगणक शिक्षण दिवपी संस्था आसत जाल्यार थंय वचून कसले कोर्स आसात, तांची फी कितें हाची चवकशी जरुर करची. पूण ताचे वांगडां खंयचो कोर्स हो आपल्या अभ्यासक्रमाक तशेंच शिक्षणाक पुरक थारूं शकता, हाची लेगीत चवकशी जरुर करची आनी आवड आसल्यार तो कोर्स करचो. ज्ञान मेळपाचें माध्यम म्हणल्यार दिसाळें. सद्दां एक थळावें आनी एक राष्ट्रीय दिसाळें वाचपाची संवय लायात. आतां सगल्या दिसाळ्यांच्यो सायटी आसात. ई- पेपर आसात.
ताच्या वांगडां जर तुमकां पेटी, तबलें ना जाल्यार चित्रां काडपाची आवड आसत तर ती जरूर पुराय करात. हांव लॅपटॉपाची गजाल सांगतालों. ताचे वरवीं बारावे उपरांत कितें घेवं शकतात, हाची म्हायती घेयात. तशेंच त्या फांट्याचे फायदे कितें, ताचीय म्हायती नेटाचेर घेयात वा एखाद्या जाणकाराक विचारात. फुडें कितें करचें? हातूंत दोन भाग येतात. एक म्हणल्यार गोंयांतूच शिकपाचें काय गोंया भायर, देशा भायर. दोनूय गजालींचे फायदे आसात, तशेच तोटेय. प्रत्येकाचे अणभव वेगळे. ते तुमकां करियराचे नदरेन उपेगी पडूं शकतात. पेपर वाचपाचे संवयीन तुमचें चालू घडामोडीचें गिन्यान वाडटलें. रेडियो, टीव्ही वयल्यो बातम्यो, ताचे वयली शिक्षणीक भासाभास तुमकां बरेंच गिन्यान आनी उलोवचें कशें हाची म्हायती दिता.
सध्या बारावेचो निकाल पोरूं परस उणो कित्याक लागला? हाचीं कारणां जाणकार दितात. मंडळाचे चॅरमन सांगतात, मोबायल फोन रातदीस हातांत आशिल्ल्यान भुरगे अभ्यासाक उणो वेळ दितात. तर हाचेर एका शिक्षण तज्ञान सांगलें, विद्यार्थ्यांचें बरें आसा, पूण शिक्षक लेगीत शाळेच्या वेळार मोबायलाचेर आसतात, ताचे कितें? ते जर विद्यार्थ्यां कडेन लक्ष दित जाल्यार बरोच फरक पडूं शकता. भुरग्यांक खंय भाशा विशय कठीण वचना, पूण विज्ञान जो म्हत्वाचो आसा, तो खंय कठीण वता. भौतिकशास्त्र, रसायनशास्त्र, गणीत हांची सरासरी सादारण 80 टक्के जाता. हाचें विश्लेशण करचे परस अंदूं जे बारावेक पावल्यात, तांचेर ह्या विशया संबंदी भर दिवप चड बरें. विद्यार्थ्यांनी लेगीत मेकळ्या वेळांत हे कठीण विशय हातांत घेवचे.
तुमी जगर विज्ञान फांट्यांत वतले जाल्यार गणित, रसायन शास्त्र, भौतिकशास्त्र, जीवशास्त्र हे विशय घेवचेच पडटले. खरें तर ह्या विशयांत विद्यार्थी शाळेंतल्या सकयल्या वर्गांत आसतना आवड निर्माण करपाक जाय. ते सोंपे कशे जातले हाचेर शिक्षकांनी विचार करपाक जाय. विद्यार्थी तुमकां जाय तसो मेळटलो अशें ना. तुमकां तो तयार करचो पडटलो. हें आव्हान आसा. तुमच्या हातांत युट्यूब आसा, म्हायती दिवपी पुस्तकां आसात. ज्येश्ट शिक्षक आसात. तुमची संघटना आसा. तांची मजत घेवपाक फाटीं फुडें जावं नाकात. थोडो अहंकार आसा जाल्यार विद्यार्थ्यां खातीर तो पयस करून दुसऱ्यां कडेन मजत मागची पडटली. सुरवातेक हें कठीण दिसतलें. पूण मागीर अणभवांतल्यान तुमी तंत्र शिकतले. शेवटाक भुरगो जो आसता, ताका हें कठीण लागूं शकता. मागीर तें सोंपें करप कशें? हाचो विचार दरेकल्यान करपाक जाय. सगल्यांक हें सोंपें जातलें अशें ना. पूण आमी यत्न जरूर करपाक जाय. सगल्या जैतिवंत विद्यार्थ्यांक परबीं.
प्रा. रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
