भांगरभूंय | प्रतिनिधी
दोग जाण जखमी, जेसीबीची मोडतोड, 14 जाणां आड गुन्यांव
वास्को: वेळसांव पाळी रेल्वे कंत्राटदाराच्या कामगारांचेर फातर शेंवटून तांकां जखमी केल्ल्या प्रकरणांत तशेंच थंयच्या जेसीबींची मोडतोड केल्ल्यान वास्को रेल्वे पुलिसांनी 14 जाणां आड विवीध कलमां खाला गुन्यांव दाखल केला. तातूंत फाटले विधानसभा वेंचणुकेंत कुठ्ठाळी मतदारसंघांतल्यान काँग्रेसीचे तिकेटीचेर वेंचणूक लडयिल्ले आनी गोंयचो एकवोटचे फुडारी ओलंसियो सिमोयश तशेंच गोंयचो एकवोटचे फुडारी आर्वील दोरादो रॉड्रिगीश, आदले पंच कार्मील डिसौझा, फ्रान्सीस ब्रागांझा हांचो आस्पाव आसा.
संबंदितांक पुलीस अधिकाऱ्या मुखार हाजीर रावपा संबंदी फौजदारी प्रक्रिया संहितेच्या 41 (अ) प्रमाण नोटीस धाडून दितले. दुबावितांनी फातर शेंवटिल्ल्यान जखमी जाल्ले कनक सरदार आनी रामेश्वर सरदार ह्या कामगारांक मुळाव्या उपचारा खातीर जिखली उपजिल्हो हॉस्पिटलांतल्यान घरा धाडून दिल्ल्याचें वास्को रेल्वे पुलीस स्टेशनाचे निरिक्षक अमरनाथ पासी हांणी सांगलें.
वेळसांव रेल्वे दोट्टीकरणाक मोटो विरोध जायत आसा. थंय फाटल्या कांय म्हयन्यां सावन रेल्वे कंत्राटदार आनी थळाव्यां मदीं सेगीत वाद जावपाचे प्रकार घडल्यात. थंय कायदो आनी सुवेवस्थेचो प्रस्न निर्माण जावचो न्हय हे खातीर थंय सेगीत पुलीस बंदोबस्त दवरचो पडटा. थंयचो वाद हो थळाव्या प्रशासना खातीर एक तकलीफोड थारला. पूण आयतारा ह्या वादान वेगळें मोडण घेतलें.
ह्या वादाक आयतारा हिंसक मोडण मेळिल्ल्यान वास्को रेल्वे पुलिसांनी 14 दुबावितां आड गुन्यांव दाखल केला. ह्या प्रकरणांत सुर्या कन्स्ट्रक्शन कंपनीचे अभियंते दिनेश कुमार, दिलीप सिंह हांणी वास्को रेल्वे पुलीस स्टेशनांत कागाळ नोंद केल्या. तांचे कागाळी प्रमाण 19 वेर रेल्वे बायपास पुला कुशीक कंत्राटदाराचें कामगार काम करताले. दनपारां 12.30 वरांच्या सुमाराक थंय आयिल्ल्या एका जमावान कामगारां कडेन वाद घालो. उपरांत तांणी कामगारांचेर फातर शेंवटिले. फातर शेंवटिल्ल्यान दोन कामगार जखमी जाले. एकल्याचे मानेक जाल्यार दुसऱ्याचे फाटीक जखम जाली. हेरांनी थंयच्यान पळ काडिल्ल्यान ते वाटावले.
त्या जमावान थंयचे जेसीबीचेर फातर शेंवटून जेसीबीची मोडतोड केली. ह्या प्रकरणांत कागाळदारान पुराव्या खातीर कांय फोटे पुलिसांक दिल्यात. तातूंत ओलंसियो सिमोयश, आर्वील दोरादो, कार्मिलो डिसौझा, फ्रान्सीस बांग्राझा आनी हेर स्पश्टपणान दिसतात. जेसीबीची मोडतोड केल्ल्यान सुमार 45 हजारांचे लुकसाण जाल्ल्याचो दावो केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
