भांगरभूंय | प्रतिनिधी
उदकाची वाट आडावपाचो यत्न; पुलिशेन कडल्यान लोकांक धमकी
भांगरभूंय । प्रतिनिधी
मुरगांवः रेल्वे विकास निगम लिमिटेडान 11 मार्चाक वेळसांव वाठारांत कथीत रेल्वे दुपदरीकरणाच्या कामा खातीर अरबी दर्याक जोडपी परंपरीक व्हाळांत मातयेचो भराव घालून उदकाचे वाटेर आडखळ निर्माण केली. ताका लागून गांवांत हुंवाराची स्थिती निर्माण जावं येता, असो भंय उक्तावन थळाव्या लोकांनी रेल्वेचें काम आडायलें.
काम आडयले उपरांत रेल्वेन पुलिशेक आपायले आनी तांच्या आदारान काम चालू दवरपाचो यत्न केलो. पुलीस रेल्वेच्या सांगण्यान लोकांक आडायता हे खातीर लोकांनी पुलिशेक धारेर धरले. ह्या वेळार पुलिसांनी आदले पंच तशेंच गोंयचो एकवोटचे उपाध्यक्ष अशोक सौझा हांकां धमकी दिली. ह्या वेळार सरपंच मारिया डायना गौवेया, पंच फ्रांसिस्को ब्रागांझा, पंच रेमेडियस नोरोन्हा, आदली पंच कॅमिलो सौझा हाजीर आशिल्ली.
आदीं रेल्वेचें काम बंद करात आनी उपरांत आमकां जाब विचारात, असो सल्लो गांवच्या लोकांनी पुलिशेक दिलो. पुर्तुगीज काळांतली उदकाची वाट आडावन रेल्वे दुपदरीकरण केल्यार गांवांत हुंवाराची स्थिती निर्माण जातली. लोकांच्या घरांनी, शेतांनी उदक घुसतलें, अशी भिरांत उक्तावन लोकांनी रेल्वेचें काम आडायलें आनी तांकां थंयच्यान वचपाक लायले. रेल्वे निगम लिमिटेडाक गोंय पुलिशेच्या तेंक्यान 133 वर्सां परस आदल्या सांकवाक तेंकून आसिल्ल्या सुकती- भरतेच्या मार्गाचेर दोन काँक्रिटाचीं पायपां घालपाक येस आयलां. ताचेर सध्या रेल्वे मार्ग घातला. बांदकाम सुरू आशिल्ल्या साळ न्हंयेचे उपन्हंयेच्या वाठारांत हे आदीं रेल्वेन फाटल्या तीन म्हयन्यांत शेंकड्यांनी ट्रक माती घातल्या. संबंदीत अधिकाऱ्यां कडेन कागाळ करून लेगीत थळाव्यांक थाकाय मेळूंक ना, अशें थळाव्या लोकांचें म्हणणें आसा.
वेळसांवां रेल्वे दुपदरीकरण नाकाचः वेळसांवकार
वेळसांव गांवांत रेल्वे दुपदरीकरण नाकाच. खंयचेच स्थितींत रेल्वे दुपदरीकरण जावपाक दिवचे नात, असो निश्चेव थळाव्या लोकांनी केला. मात रेल्वे विकास निमन लिमिटेड लोकांक किंकोत करून रेल्वे दुपदरीकरणाक जावपी विरोध मोडपा खातीर पुलीस बळाचो वापर करता आनी आपलें काम लिपचोरयां मार्गान करपाचो यत्न करता. थळाव्या लोकांक हाची सुलूस लागताच ते येवन हें काम बंद उडयतात. वेळसांवकारांच्या म्हणण्या प्रमाण आपली जमीन पुर्वजां कडल्यान आपल्याक मेळ्ळ्या आनी हें तांणी कागदपत्रांच्या पुराव्या सयत सिद्ध केल्या. मात रेल्वे कडेन कसलेच पुरावे नात, तरी लेगीत ती जमीन आपलीच अशें सांगून रेल्वे दुपदरीकरणाचें काम करपाचो यत्न करतात. वेळसांवच्या लोकांनी ह्या कामाक कितलेशेच खेपे विरोध केला, पूण रेल्वे आपलो हट्ट सोडपाक तयार ना, अशें थळाव्या लोकांचें म्हणणें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
