भांगरभूंय | प्रतिनिधी
भांगरभूंय । प्रतिनिधी
वास्कोः प्रदेश काँग्रेस अध्यक्ष अमीत पाटकार हाणे सोमाराक वेळसांव हांगा वचून थंय चलिल्ल्या रेल्वे दुपदरीकरण कामाची पळोवणी केली. तांच्या वांगडा कॅप्टन व्हिरितो फर्नांडीस, दक्षीण गोंय जिल्हो काँग्रेस अध्यक्ष सावियो डिसिल्वा, वेळसांव पंचायत मंडळाचे काय पंच वांगडी आनी थळावे लोक आशिल्ले. पाटकारान लोकांचे प्रश्न आयकले आनी न्यायालयीन लडायेंत काँग्रेस पक्ष तांच्या वागडा रावतलो अशें सांगलें.
काँग्रेस पक्ष वेळसांवच्या लोकां वांगडा आसतलो आनी रेल्वे दुपदरीकरण कामां आड लोका न्यायालयांत गेल्यार तांचा जाय ती मजत आमी करतले अशें तांणे पत्रकारांक सांगलें. लोकांचो विरोध आसतनाय रेल्वे दुपदरीकरणाचें काम चल्लां. सरकार कांयच उलयना आनी जे लोक आवाज उठयतात ताचेंर केशी घालता. अदानी खातीर चलल्ल्या कोळसो येरादारीक लागून लोकांक त्रास जातात तांकां मेळून मुख्यमंत्री डॉ प्रमोद सावंत हांणी सरकाराचे भूमिकेची तांकां म्हायती दिवपाक जाय अशें पाटकारान सांगलें.
दुपदरीकरण कामाक लागून पावसाचें उदक व्हांवन वचपी सैमीक वाटो बंद करपाचें काम चल्लां. लोकांचे जमनींत रेल्वे अतिक्रमण करता. तांच्या हक्काची राखण सरकार करना मात पुलिसां वरवीं तांचो आवाज बंद करता. रेल्वेचे केशी घालपाचे सुवातेर हें सरकार थळाव्या लोकांचेर केशी घालता. हें सरकाराचें गैर वेवस्थापन आनी ताचें अपेश आसा अशें पाटकारान सांगलें.
जमीन संपादन करनास्तना रेल्वे अधिकारी लोकांच्या जमनींत काम करतात. पाणथळां पिड्ड्यार करतात. मात सरकाराचें पुलीस तांची राखण करतात आनी न्याय हक्का खातीर झगडपी लोकांक सतायतात हो खंयचो न्याय असो प्रश्न पाटकारान सरकाराक विचारला. लोकांचेर केशी घातल्यार काँग्रेस पक्ष न्यायालयीन लडायेंत ताकां जाय ती मजत करतलो अशें पाटकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
