भांगरभूंय | प्रतिनिधी
दिवचलः दिवचल म्हालांतल्या वेळगें पंचायतीची ग्रामसभा आयतारा सरपंच सपना पार्सेकार हांचे अध्यक्षते खाला जाली. तातूंत गांवांतल्या विवीध विकास कामां विशीं चर्चा केली. तशेंच बालविवाह आडावपाचो लोकांक सोंपूत दिलो. शारदां गवंडे हांणी हे विशीं खोलायेन म्हायती दिली.
सरपंच पार्सेकार हांणी येवकार दिलो. सचीव प्रणय गावडे हांणी फाटले सभेचो नियाळ सादर केलो आनी ग्रामसभेक मार्गदर्शन केलें. सभेंत आयिल्ल्या प्रस्नांक सरपंच पार्सेकार हांणी जापो दिल्यो. ह्या वेळार उपसरपंच सर्वेश मुळगांवकार, पंच सामंता कामत, सर्वेश घाडी, योगिता हळदणकार, स्वेता गांवकार हाजीर आशिल्ले.
वेळगें पंचायत वाठारांत बाजारपेठ आसा. तशेंच होंडा- फोंडें हो मुख्य रस्तो ह्या वाठारांतल्यान वता. रातीं वेळार ह्या रस्त्याचेर हेडग्या गोरवांची समस्या व्हड प्रमाणार सतायता. हाचेर पंचायतीन उपाय काडचो. गांवांतल्या गोरवांच्या धनयांनी गोरवांच्या गळ्यांत टॅक घालचो. कारण गांवा भायलीं गोरवां गोशाळेंत धाडपाक मेळटलीं, अशी सुचोवणी सगूण घाडी हांणी ग्रामसभेंत केली. निरिक्षक म्हूण सारिका सोननायक हांणी काम पळयलें जाल्यार योगिता हळदणकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
