भांगरभूंय | प्रतिनिधी
वाळपय: खोतोडा ग्रामपंचायत वाठारांत सुपारी आनी नाल्लाचे लागवडीन समृद्ध जाल्ल्या वेळगें गांवांत आजूनय समाधानी अशी जलसिंचनाची सुविधा उपलब्ध जावंक ना. पावस सोंपून सुमार स म्हयने जाले, अंदूं पावसाचे दीस येवपाक चार म्हयने उरल्यात. मात आजूनय बागायतींक उदकाची वेवस्था जावंक नाशिल्ल्यान खुबश्या जाणांच्यो बागायती सुकल्यात. हाका लागून बागायतदार तिडकल्यात.
बागायतदारांनी वाळपय जलसिंचन खात्याच्या अधिकार्यांक मेळून हे विशींच्यो कागाळी केल्यो. सध्या अस्तित्वांत आशिल्लो पंप हो उणे तांकीचो आसा. तांतल्यान बागायतदारांक समाधानी उदकाची पुरवण जायना. कांय बागायतीं आजूनय उदकाची पुरवण जावंक़ ना. हाका लागून खुबश्या जाणांच्यो बागायती सुकून गेलयात, अशे तरेच्यो कागाळी केल्यो.
मजगतीं, वेळगें गांवां खातीर जलसिंचन खात्यान स कोटी खर्चून उपसा येवजण मंजूर केल्या. मात ह्या प्रस्तावाक आजूनय अर्थखात्याची मंजुरी मेळूंक नाशिल्ल्यान हें काम सुरू जावंक ना. दोन वर्सां आदीं हे येवजणेक मंजुरी मेळिल्ली. मात अर्थ खात्याच्या मंजुरी बगर आजूनय कामाक सुरवात जावंक ना, अशी म्हायती थळाव्या कार्यालया कडल्यान मेळ्ळी.
खोतोडे ग्रामपंचायत वाठारांतल्या म्हादय न्हंयेच्या काठार आशिल्लो वेळगें गांवांत सुपारी, नारळ, आंबो, काजू अश्या विवीध तरेच्यो लागवडी करता. कृषी लागवडीक लागून हो गांव समृद्ध आसा. म्हादय न्हंयेंच्या उदकाचेर ह्या वाठाराञत व्हडा प्रमाणांत बागायती निर्माण जाल्यो. बंधारो येवजणेंतल्यान उपसा येवजणे वरवीं ह्या गांवाक जलसिंचनाची सुविधा निर्माण जाली. पावसांत बंधार्यांतल्यान उदक सांठोवन उपसा येवजणे वरवीं हे बागायतीन उदकाची सुविधा उपलब्ध जाता. पावस सोंपून सुमार स म्हयने जाले. आजूनय ह्या वाठारांतल्या बागायतदारांच्या बागेनी उदकाची पुरवण जावंक़ ना. हाका लागून तिकडल्ल्या बागायतदारांनी आयज वाळपय जलसिंचन खात्याचे सहाय्यक अभियंता सतीश कुमार सावंत हांची भेट घेवन हे विशीं तिडक उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
