भांगरभूंय | प्रतिनिधी
उच्च न्यायालयाच्या आदेशा प्रमाण, सहकार्य केल्ल्यान अटक जावंक नादिवचलः सेंट फ्रान्सीस झेवियर हांचे कुडी विशीं आक्षेपार्ह विधान केल्ले प्रकरणांत उच्च न्यायालयांत जाल्ले सुनावणेंत वेलींगकार हांकां बिरेस्तार सांजे मेरेन पुलीस स्टेशनांत हजर रावपाचो आदेश दिल्लो. तशेंच पुलिसांचे नोटीशेक पाळो दिवन सहकार्य केल्यार तांकां अटक करची न्हय, असो आदेश उच्च न्यायालयान दिल्लो.
उच्च न्यायालयान दिल्ल्या आदेशा उपरांत निमाणे बिरेस्तारा सुभाष वेलिंगकार दिवचल पुलीस स्टेशनांत हजर जाले आनी तांणी आपलो जबानी नोंद केली. तशेंच गरज पडल्यार परतून चवकशेक हजर रावपाचे निर्देश पुलिसांनी वेलींगकार हांकां दिले.
ह्या वेळार पुलीस अधिक्षक अक्षत कौशल, उपअधिक्षक सागर एकोस्कार, निरिक्षक दिनेश गडेकार हांचे हाजिरेंत तांणी आपलो जबाब नोंद केलो आनी रोखडेच ते थंयच्यान गेले. ह्या वेळार पुलीस स्टेशनाच्या भायर हिंदुत्ववादी संघटणांचे प्रतिनिधी हजर आशिल्ले.
पुलीस स्टेशनांत येतना वेलींगकार फाटले दारान दाखल जाले आनी जबानी नोंद करून मुखा वेल्या दारान भायर आयले आनी एका मोटारींतल्यान गेले. ह्या वेळार थंय उपस्थीत आशिल्ल्या पत्रकारांनी तांचे कडेन उलोवपाचो यत्न केलो, पूण तांणी कसल्याच प्रकारची प्रतिक्रिया दिवपाक न्हयकार दिलो.
मेळिल्ले म्हायती प्रमाण, आपूण कोणाच्योच भावना दुखाेवंक नासून आपले भुमिकेचेर ठाम आशिल्ल्याचे आपल्या जबानींत सांगिल्ल्याची म्हायती मेळ्ळ्या.
मजगतीं, सेंट फ्रान्सीस झेवियर हांचे कुडी विशीं आक्षेपार्ह विधान केल्ले प्रकरणांत सत्र न्यायालयान वेलींगकार हांणी अटकपूर्व जामिना खातीर केल्लो अर्ज उच्च न्यायालयान न्हयकारलो. ते उपरांत हिंदू रक्षा महाआघाडीचे राज्य निमंत्रक सुभाष वेलींगकार हांणी उच्च न्यायालयांत अर्ज दाखल केल्लो. ताचेर सुनावणी जाली. तेन्ना उच्च न्यायालयान बिरेस्तारा सांजे 4 वरां मेरेन वेलीगकार हांकां दिवचल पुलीस स्टेशनांत हजर रावपाचो आदेश दिलो.
मजगतीं, दिवचल पुलिसांनी धाडिल्ले तिसरे नोटिशीक पाळो दिवन वेलींगकार पुलीस स्टेशनांत चवकशेक हजर रावपाक तयार आसात, पूण तांकां अटक जावची ना हाची हमी पुलिसांनी दिवची असो युक्तिवाद ज्येश्ठ वकील अॅड. सुरेश लोटलीकार हांणी वेलींगकार हांचे वतीन केलो.
मजगतीं, दिवचल पुलिसांनी धाडिल्ले तिसरे नोटिशीक पाळो दिवन बिरेस्तारा सांजेवेळा मेरेन पुलीस स्टेशनाचेर हजर रावपाचो आदेश उच्च न्यायालयान वेलींगकार हांकां दिल्लो.
ह्या प्रकरणांतली फुडली सुनावणी मंगळारा जातली. वेलींगकार हांणी दाखल केल्ल्या अटकपूर्व जामिनाक विरोध करून 4 जाणांनी हस्तक्षेप याचिका दाखल केल्ली.
वेलींगकार हांणी पुलीस तपासाक पुराय सहकार्य केल्यार तांकां अटक करची न्हय असो आदेश न्यायालयान दिल्लो. ते प्रमाण वेलींगकार पुलीस स्टेशनांत दाखल जाले आनी तांणी आपलो जबाब नोंद केल्ल्यान तशेंच तांकां अंतरीम थाकाय मेळिल्ल्यान ह्या प्रकरणांतली हवाच गेेल्ल्याची चर्चा आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
