भांगरभूंय | प्रतिनिधी
डॉ. ऑस्कर, क्लावड : आंदोलन हायजॅक जावपाचो भंयपणजीः गोंयांत जो वाद चल्ला ताका सुभाष वेलिंगकार हेच जापसालदार आसा. हे खातीर तांणी माफी मागची आनी हो वाद सोंपोवचो. तशेंच जे लोक रस्त्यार आंदोलन करतात तांणी आतां घरा वच्चें. नाजाल्यार सरकारी दलाल हें आंदोलन हायजॅक करून घेर्र पेटयतले. हे मजगतीं ते नेटान गोंय विकपाच्या वावराक लागतले, असो भंय क्लावड आल्वारीस आनी डॉ. ऑस्कर रिबेलो हांणी उक्तायलो.
सुभाष वेलिंगकार हांणी सेंट फ्रान्सीस झेवियर हांचेर हरकत घेसारकें विधान केल्ल्यान गोंय तापलां. मडगांवां भावीक रस्त्यार देंवल्यात. हे फाटभुंयेर गोंयच्या समाज वावुरप्यांनी हो वाद सोंपोवपा खातीर पत्रकार परिशदे वरवीं लोकांक उलो मारलो. क्लावड आल्वारीस, डॉ. ओस्कर रिबेलो, सबिना मार्टिन्स आनी हेर समाज वावुरपी हाजीर आशिल्ले.
वेलिंगकार हांणी नसायेन भरिल्लें विधान करून समाजाक अस्वस्थ केला. वेलिंगकार हो आपलो इश्ट, एक बुदवंत मनीस, पर्यावरणा खातीर आमच्या वांगडा रावून झगडपी मनशान अशें विधान करपाक जायनाशिल्लें, अशें क्लावड आल्वारीस हांणी सांगलें.
आपूण वेलिंगकार हांचे कडेन मागतां, ताणें आपलें विधान फाटीं घेवचें आनी माफी मागून स्पश्टीकरण दिवचें. एकदां हें विधान फाटीं घेवन जे समाजा मदीं केस्तांव पेटलां ते बंद करचें आनी हो वाद हिंसक जालो जाल्यार इतिहासांत वेलिंगकार हांच्या नांवाचेर खत उरतलें, अशें आल्वारीस हांणी म्हणलें.
ह्या विधानाक लागून आमी दुखावल्यात. आपूण क्रिस्तांव, आपूण चवथ मनयता, मुस्लीम परिवारांक मेळत आसता. हें जें कितें चल्लां तें एकचारा आशिल्ल्या समाजां मदीं फूट घालतलें. क्रिस्ताव समाजाक स्पश्टीकरण दिवन वेलिंगकार हांणी हो वाद सोंपोवचो, असो उलो आल्वारीस हांणी मारलां.
ते भायर जे भावीक आंदोलन करतात तांचे कडेन मागता, तांणी उपकार करून घरा वच्चें. हे सारकिल्ले विशय सुटावे करपा खातीर रस्तो ही सुवात न्हय. पुलिसांचेर पयलींच ताण आसा, तांकां आनीक त्रास दीवं नाकात. जर परिस्थिती हाता भायर गेली जाल्यार पुलीस लेगीत ते हाताळपाक शकचे नात, असो उलो आल्वारीस हांणी आंदोलकांक मारला.
जें विधान सुभाष वेलिंगकार हांणी केलां तें अयोग्य आशिल्ल्यानूच गोंयकार सामकेच फुर्याज आसात. पूण आपूण पांया पडून मागता परिस्थिती नियंत्रणा भायर वचपाक दीवं नाकात, अशें डॉ. ऑस्कर रिबेलो हांणी मागलां.
जे लोक दक्षीण गोंयांत रस्त्यार देंवून, बोवाळ घालून आंदोलन करतात तांकां आपूण सांगपाक सोदतां, जे सरकारी दलाल आसात, जे गोंय काबार करपाक उठल्यात ते हे आंदलोन हायजॅक करतले, आपले मनीस धाडटले आनी देवळार वा घुमटेर फातर मार म्हूण सांगून हिंदू- क्रिस्तांव हांचे मदीं घेर्र पेटयतले. ते उपरांत हाचेर पुलीस वा राज्य सरकाराक नियंत्रण मेळोवप कुस्तार जातलें, असो भंय डॉ. रिबेलो हांणी उक्तायला.
बॉक्स
माफी दुबळे व्यक्तीचें चिन्न न्हयः डॉ. रिबेलो
हो वाद सोंपोवप ही वेलिंगकार हांची जापसालदाराकी. आरएसएस आनी भाजपांत कांय अशेंय लोक आसात, जांकां खऱ्यानीच गोंयच्या विशयाचें पडलां. देखून वेलिंगकार हांणी माफी मागची. माफी हें दुबळ्या व्यक्तीचें चिन्न न्हय जाल्यार सक्षम आशिल्ल्याचें चिन्न, हें आपूण वेलिंगकर हांकां सांगपाक सोदतां. आपूण आंदोलकांक सांगपाक सोदतां, रस्त्या वयले उठात आनी तुमचे आंदोलन भितरले भितर चालू दवरात. जर रस्त्यार रावश्यात जाल्यार आंदोलन हायजॅक जातलें आनी घेर्र पेट्टलें, असो हुस्को डॉ. ऑस्कर रिबेलो हांणी उक्तायलो. तशेंच जे राजकारणी आंदोलनांत वांटेकार जाल्यात तांणी आंदोलकांची समजूत काडची, असोय तांणी उलो मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
