भांगरभूंय | प्रतिनिधी
मुख्यमंत्री : सरकारा कडल्यान होमिओपॅथीक उर्बा
भलायकी सुविधांचो मुळाव्या केंद्रां मेरेन विस्तार
‘आयुष’च्या माध्यमांतल्यान भलायकी उपक्रम
भांगरभूंय । प्रतिनिधी
दिवचल : सरकार होमिओपॅथीक उर्बा दिवचे खातीर ठोस पावलां उखलता. गोंयांतल्या गांवागांवांनी ह्या मळार फुडें सरून स्वताचें वेलनेस सेंटर सुरू करचें. ते खातीर सरकार अर्थीक मजत दिता. गोंय सरकारान नव्यान स्थापन केल्ल्या आयुष विभागाच्या माध्यमांतल्यान वैजकी शिक्षण, संशोधनाचेर आदारीत उपचार पद्दती आनी प्रतिबंधात्मक भलायकी उपक्रम अदीक सक्षम करचे खातीर सरकार बांदील आसा, अशें मुख्यमंत्री डॉ. प्रमोद सावंत हांणी सांगलें. सांखळे संवसारीक होमिओपॅथी दिसा निमतान आयोजीत केल्ले कार्यावळींत ते उलयताले.
गोंयांत 30 वर्सां आदीं फकत जीएमसींत डायलिसीस उपचार केंद्र आशिल्लें. मात, आतां ही सुविधा मुळाव्या भलायकी केंद्र आनी खाजगी हॉस्पिटलांनी लेगीत उपलब्ध आसा. हाका लागून किडनीचें दुयेंस आशिल्ल्या दुयेंतींचो आंकडो खूब प्रमाणार वाडला, हें स्पश्ट जाता, अशें मुख्यमंत्र्यान सांगलें.
सांखळेच्या साई नर्सींग इन्स्टिट्युटांत गोवा होमिओपॅथी कौन्सील आनी श्री कामाक्षीदेवी होमिओपॅथी मेडिकल कॉलेज हांच्या जोडपालवान संवसारीक होमिओपॅथी दीस 2026 निमतान कार्यावळीचे आयोजन केल्लें. हे कार्यावळीक मुखेल सोयरे म्हूण मुख्यमंत्री हाजीर राविल्ले.
कार्यावळी वेळार भलायकी मळाचेर उल्लेख करपा सारको वावर करपी होमिओपॅथी दोतोर आनी तज्ञांचो सत्कार केलो. होमिओपॅथाचो जनक डॉ. सॅम्युएल हॅनिमन हांणी स्थापन केल्ली उपचार पद्दती फाटल्या 271 वर्सां सावन समाजाची सेवा करता अशें तांणी म्हणलें.
गोंयांत होमिओपॅथीचो प्रसार करचे खातीर डॉ. बिपीन साळकार आनी गोवा होमिओपॅथी कौन्सील हांच्या यत्नांचें कवतूक केलें. प्रतिबंधात्मक भलायकी सेवा आनी एकात्मीक वैजकी पद्दतीचेर दितात तो भर हो सकारात्मक आशिल्ल्याचें ह्या वेळार सांगलें.
मुख्यमंत्र्यान सांगलें, देशांत प्रधानमंत्री नरेंद्र मोदी हांच्या फुडारपणा खाला 2014 सावन आयुष भलायकी सेवेचो विस्तार जाला. केंद्र सरकारान स्वतंत्र मंत्रालय स्थापन केलां. होमिओपॅथी उपचार पद्दतींत कसलेच वायट परिणाम जायनात. होमिओपॅथी विशीं लोकां मदीं विस्वास निर्माण करपाची गरज आसा. आदीं आनी आतांच्या दुयेंतींक पळोवपाच्या दिश्टीकोनांत बदल जाला. आदल्या काळांत होमिओपॅथी दोतोरांचो आंकडो खुबूच उणो आशिल्लो, मात आता तो वाडटा. मुळाव्या भलायकी केंद्रांत लेगीत होमिओपॅथी दोतोर उपलब्ध आसतात. खूबशे दुयेंती तांचे कडेन उपचारा खातीर येतात. तेच वांगडा तांचे कडल्यान विस्वासान उपचार करून घेतात, अशें तांणी सांगलें.
गोंयांत तीन दसकां आदीं जीएमसींत डायलिसीस उपचार केंद्र आशिल्लें. हो आंकडो आतां 116 चेर पावला. उत्तर आनी दक्षीण गोंय जिल्हो हॉस्पिटला सयत तीन कडेन डायलिसीस उपचार केंद्रां आसात. मात, आतां ताचो विस्तार मुळाव्या भलायकी केंद्रां मेरेन पावला. डायलिसीस पसून आपली राखण करचे खातीर प्रतिबंधात्मक तपासणी करप गरजेची आसा. गोंय सरकार सगल्यांच्या कल्याणा खातीर वैजकी शिक्षण घटमूट करप, संशोधनाचेर आदारीत उपचार पद्दतींक उर्बा दिवप आनी प्रतिबंधात्मक भलायकी उपक्रम चालीक लावपाक बंदीक आसा, अशें मुख्यमंत्र्यान सांगलें.
हे कार्यावळींत विवीध सत्रांनी तज्ञांनी मार्गदर्शन केलें.
‘वैजकी सुविधांचो योग्य उपेग करचो’
‘चेक बाय डॉक्टर्स’ ह्या उपक्रमाक बायलां कडल्यान बरो प्रतिसाद मेळटा. ह्या उपक्रमा खाला आतां मेरेन 40 वर्सां पिराये वयल्या सुमार 40 हजार बायलांची भलायकी तपासणी केल्या. हातूंतल्या तीन ते चार टक्के बायलांक फुडली तपासणी तशेंच उपचारां खातीर दोतोरां कडेन संपर्क केला. लोकांनी प्रतिबंधात्क भलायकी सेवे कडेन लक्ष दिवचें तशेंच आशिल्ल्या वैजकी सुविधांचो योग्य उपेग करचो, असो उलो मुख्यमंत्री डॉ. सावंत हांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
