भांगरभूंय | प्रतिनिधी
वेर्णा स्पोर्ट्स क्लबान 17वी अखील गोंय गिर्दोळी पंचायत करंड फुटबॉल सर्त जिखली. फायनलींत ताणें फातोड्डेंच्या डॉन बॉस्को ऑरेटरीक टायब्रेकरांत 6-5 अशा गोल फरकांनी हारयलो.
गिर्दोळी स्पोर्ट्स क्लबान चांदर चर्चीच्या खेळां संकूल मैदानाचेर सर्तीचें आयोजन केल्लें. मॅचीच्या 9व्या मिनटाक सायरस नोरोन्हान गोल करून वेर्णा स्पोर्ट्स क्लबाचें खातें उगडिल्लें. ते उपरांत हन्सलम फुर्तादोन डॉन बॉस्को वतीन बरोबरीचो गोल केलो.
पुर्ण वेळाच्या खेळांत दोनूय क्लब 1-1 अशे बरोबरींत उरिल्ल्यान निकाल लावपाक टायब्रेकराचो आदार घेवचो पडलो. टायब्रेकरांत वेर्णा स्पोर्ट्स क्लबा वतीन अॅण्ड्रस, अजय रोमारियो, सायरस आनी फ्रेझर हाणें गोल केले, जाल्यार डॉन बॉस्को ऑरेटरी वतीन नॅसील, फ्रान्सीस, कॅव्हिन आनी मारियो हे गोल करपाक येसस्वी थारले.
वैयक्तीक इनामांः जुझे सिल्वेरा (फायनलींतलो उत्कृश्ट गोलकीपर, वेर्णा स्पोर्ट्स क्लब), सायरस नोरोन्हा (फायनलींतलो उत्कृश्ट डिफॅण्डर, वेर्णा स्पोर्ट्स क्लब), रोमारियो डा कोस्ता (फायनलींतलो उत्कृश्ट मिडफिल्डर, वेर्णा स्पोर्ट्स क्लब), फ्रान्सीस आंद्राद (फायनलींतलो उत्कृश्ट स्ट्रायकर, डॉन बॉस्को ऑरेटरी, फातोड्डें), रोमारियो डा कोस्ता (फायनलींतलो मॅन ऑफ द मॅच, वेर्णा स्पोर्ट्स क्लब).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
