वेर्णा स्पोर्ट्स क्लबाक ‘सेंट अॅनी’ करंड

भांगरभूंय | प्रतिनिधी

सागाच्या सहकार्यान फोंडा फुटबॉलर्सान आयोजीत केल्ली अखील गोंय सेंट अॅनी आंतरगांव महत्सोव करंड फुटबॉल सर्त वेर्णा स्पोर्ट्स क्लबान जिखली. सर्तीचें आयोजन गोरवां सांबाळ मैदानाचेर केल्लें.

वेर्णा स्पोर्ट्स क्लबान सिंकेरी स्पोर्ट्स क्लबाक 3-0 अशा गोल फरकांनी हारयलो. पयल्या अर्दांत जैतिवंत क्लबान 1-0 अशी आघाडी घेतिल्ली. पयल्या अर्दांतलो हो गोल क्लिफ्टन रिबेलोन केलो. ते उपरांत दुसऱ्या अर्दांत हिल्टन फर्नांडीस आनी इमामसाब गुलेदगुदा हांणी एकेक गोल केलो.

वैयक्तीक इनामांः हिल्टन फर्नांडीस (फायनलींतलो खेळगडो, वेर्णा स्पोर्ट्स क्लब), शाहीन शेख (उत्कृश्ट डिफॅण्डर, सिंकेरी स्पोर्ट्स क्लब), शॅल्डन परेरा (उत्कृश्ट मिडफिल्डर, वेर्णा स्पोर्ट्स क्लब), कृश नारोजी (उत्कृश्ट स्ट्रायकर, सिंकेरी स्पोर्ट्स क्लब), रॉयल मोनिझ (उत्कृश्ट गोलकीपर, वेर्णा स्पोर्ट्स क्लब).

इनामां भेटवण सुवाळ्याक गोंय फुटबॉल असोसिएशनाचे अध्यक्ष कायतान फर्नांडीस मुखेल सोयरे म्हणून उपस्थीत आशिल्ले, जाल्यार डॉ. केतन भाटीकार मानाचे सोयरे ह्या नात्यान हाजीर आशिल्ले. तशेंच अर्जुन पुरस्कार जैतिवंत ब्रह्मानंद शंखवाळकार, विन्सेंट फर्नांडीस आनी संदीप ओपकार हे मानेस्त लेगीत उपस्थीत आशिल्ले.