भांगरभूंय | प्रतिनिधी
मंत्री आलेक्स सिक्वेरा हांणी लक्ष घालपाची केली मागणी
वास्को, प्रतिनिधी: वेर्णा वाठारांतल्या नियोजीत कोयर प्रक्रिया प्रकल्पाक वेर्णा, नागोवा, नुवें, लोटले तशेंच हेर वाठारांतल्या लोकांनी विरोध केला. ह्या प्रकल्पाक लागून जैवविविधतायेचेर बरोच व्हड परिणाम जातलो. तशेंच साळ आनी झुवारी न्हंयचें उदक प्रदुशीत जाल्ल्यान हो प्रकल्प आमकां आमच्या गांवांत नाकाच, अशें म्हणून लोकांनी कोयर प्रक्रिया प्रकल्पाक विरोध केलो. एकेच सुवातेर व्हड कोयर प्रक्रिया प्रकल्प उबारपा बदला दरेके पंचायतीन आपल्या वाठारांत कोयर प्रक्रिया प्रकल्प उबारचो अशें तांणी म्हणलें.
दक्षीण गोंयच्यो विवीध पालिका आनी पंचायतीच्या कोयराचो विलो लावपा खातीर वेर्णा पठाराचेर सरकारा वतीन कोयर प्रक्रिया प्रकल्प उबारपाचो प्रस्ताव आसा. हो नियोजीत प्रकल्प जावचो न्हय म्हणून २०२२ सावन संबंदीत थळावे विरोध करतात. ताका लागून सरकारान हांगाचे एकूच परिस्थितीचो अभ्यास करपाक एक समितीची निवड केल्ली. ते समितीन थंयच्या थळाव्यांचें म्हणणें आयकून घेवपा खातीर भौशीक सुनावणी घेवपाचो अहवाल दिलो. प्रकल्पाक लागून थंय कितें परिस्थिती निर्माण जातली हे विशींचोय अहवाल दिल्ल्याचो दावो थळाव्यांनी केला.
वेर्णा पठाराचेर ३२ झरे आनी तळें आसा. ह्या झर्यां मदल्या कांय झर्यांचें उदक झुआरी आनी साळ न्हंयेंत वता. साळ न्हंयचे उगमस्थान हांगच्यान सुरू जाता. ह्या झर्यांचो लाव हांगच्या थळाव्यांक जाता. तशें थंय प्रकल्प आयल्यार घाणयारें उदक ह्या झर्यांनी मेळून तें न्हंयत वतलें आनी न्हंयांचे उदक प्रदुशीत जातलें असो भंय उक्तायला. तशेंच जैवविविधतेचेर आनी भलायकेचे हाचो परिणाम जावपाचो भंय आसा. हांगा दिसा २५० टन कोयर हाडटले.वरा धा कोयर व्हरपाचे ट्रक येतले. ताका लागून कोयराची घाण वातावरणांत भरून उरतली. हाका लागून लोकांक भलायकेच्यो समस्या निर्माण जातल्यो, असो दावो थळाव्यांनी केला.
हो प्रकल्प अद्यावयात आसतलो. ताका लागून कसलेच तरेचें प्रदुशण जावचें ना, असो दावो गोवा घन कोयर वेवस्थापन मंडळ करता. ह्या दाव्यान खरसाण ना अशें थळाव्यांनी सांगलें. साळीगांव हांगच्या कोयर प्रक्रिया प्रकल्पाक लागून हांगची जैवविविधता आनी लोकांचेर कांय परिणाम जाता हें आमकां खबर आसा असो दावो तांणी केलो. घन कोयर वेवस्थापन महामंडळा वतीन कांय सुवातांची म्हायती चुकिची दिल्या. म्हाळसा देवूळ, हांगचे चर्चसंबंदेचें अंतर चुकीचें दाखयलां.
हे विशीं थळावे आमदार आनी पर्यावरण मंत्री आलेक्स सिक्वेरा हांणी लक्ष घालपाची गरज आसा. अशें थळाव्यांनी स्पश्ट केलें. ह्या प्रकल्पाक आमचो विरोध आसा. हो प्रकल्प दुसरे कडेन व्हरचो अशी मागणी तांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
