भांगरभूंय | प्रतिनिधी
वेर्णा: वेर्णा जंक्शनाचेर बिरेस्तारा सकाळीं एका कंटेनर ट्रकाचो अपघात जाल्ल्यान राष्ट्रीय महामार्गार कांय वेळ येरादारीक आडखळ जाली. कोकाकोला कंपनीच्या कोल्ड्रिंक्सच्या क्रेट्सांनी भरिल्लो हो ट्रक वेर्णा उद्देगीक वसणुकेंतल्यान बंगळुरूचे दिकेन वतना जंक्शनाचेर नियंत्रण सुटिल्ल्यान उमथलो. ह्या अपघातांत कोकाकोलाच्यो शेकड्यांनी क्रेट्स रस्त्यार पातळिल्ल्यान सगल्याक पसरिल्ल्यो. ह्या अपघातांत कोणाक कांय जावंक ना. मात मालाचें आनी ट्रकाचें व्हडा प्रमाणांत लुकसाण जालें.
हो अपघात सकाळीं कामार वचपाच्या वेळार जाल्ल्यान महामार्गार वाहनांच्यो लांबचे लांब रांगो लागिल्ल्यो. रस्त्यार पातळिल्ल्यो बाटल्यो आनी क्रेट्सांक लागून दुचाकी आनी चारचाकी वाहन चालकांक तातुंतल्यान मार्ग काडप कठीण जालें. खुबशे कार्यालयीन कर्मचारी आनी प्रवाशांक हे येरादारी कोयंडीचो बरोच फटको बसलो.
हे घडणुकेची म्हायती मेळटांच वेर्णा पुलीस बोगोबेग घडणुके सुवातेर पावले आनी तांणी क्रेनीचे मजतीन अपघात जाल्लो ट्रक कुशीक काडलो.
मजगतीं, कांय प्रवाशांनी आनी थळाव्यांनी रस्त्यार डिल्ल्यो कोल्ड्रिंक्स क्रेट्स आपल्या दुचाकी आनी गाडयांनी भरून व्हरतनाचें चित्र पळोवपाक मेळ्ळें. पुलिसांनी खर बंदोबस्त तैनात करीसर हांगा खुबश्या बाटल्यांचेर हात मारिल्लो. कांय वरांच्या यत्ना उपरांत पुलिसांनी रस्तो मेकळो केलो आनी विस्कळीत जाल्ली येरादारी परत सुरळीत केली. हे विशीं वेर्णा पुलीस अदीक तपास करतात. तशेंच महामार्गावेल्या अशा धोको निर्माण करपी वोल्ताचेर जड वाहनांच्या वेगाचेर नियंत्रण आसप गरजेचें आशिल्ल्याचें मत नागरिकांनी उक्तायलें. समाजीक भानूय दवरप गरजेचें आशिल्ल्याचें एकल्यान म्हणलें. जखमी ट्रक चालकाक मजत करपाक प्राधान्य दिवपाचे सुवातेर लोकांनी बाटल्यो व्हरपाचेर चड भर दिलो. हें चुकीचें आशिल्ल्याचें मत कांय जाणांनी मांडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
