भांगरभूंय | प्रतिनिधी
भांगरभूंय । प्रतिनिधी
वास्कोः वेर्णा उद्देगीक वसणुकेंत रस्ते, उदक आनी वीज पुरवण ह्या मुळाव्या सुविधेची सध्या सामकी परवड चल्ल्या आनी सरकारान ताचे कडेन पुरायपणान आडनदर चलयल्या अशें वेर्णा उद्देगीक असोसिएशनाचे अध्यक्ष प्रदीप डिकॉस्ता हांणी पत्रकारां कडेन उलयतना सांगलें.
रस्ते, उदक आनी वीज ह्या मुळाव्यो सुविधा मेळोवन दिवपाची विनवणी आमी सरकारी यंत्रणे कडेन फाटल्या कांय वर्सां सावन करीत आसात मात तांकां ताचें कायंच पडून गेल्लें ना अशें आतां दिसपाक लागलां. सरकार फकत आश्वासनां दिता प्रत्यक्षांत कांयच करना अशें तांणी सांगलें. वेर्णा हांगा आशिल्ल्या वीज उपकेंद्रांतल्या फकत वेर्णा उद्देगीक वसणुकेक वीज पुरवण करपाची येवजण आशिल्ली मात ह्या केंद्रांतल्या पुराय मुरगांव तालुक्याक वीज पुरवण जाता. ताका लागून आमच्या उद्गेगांक जाय तितली वीज मेळना. वेर्णी वीज उपकेंद्र बांदून 20 वर्सा जालीं, तातूंत सुदारणा करपाचें काम अजून जायना अशें तांणी सांगलें.
पयलींच्या एसईझेडचे सुवातेंत नव्यो उद्देगीक वसणुको स्थापन करपाचो सरकाराचो विचार चल्ला. राज्यांत रोजगाराची संद तयार करपा खातीर हो बरो विचार आसा. उदक आनी वीज मेळना जाल्यार नवे उद्देग कशे स्थापन करप शक्य जातलें अशो डिकॉस्ता हांचो प्रश्न आसा. नव्या उद्देग स्थापणुके खातीर सरकार जमीन दितलें मात वीज पुरवणेचो प्रश्न सुटावो करपा खातीर नवी वीज उपकेंद्रां सुरू करपाक जाय. ताचे सरकारान कितें थारायलां अशें तांणी विचारलां. गोंय इलेक्टॉनीक लिमिटेडान कांय पोर्टल सुरू केल्यात. मात तांतूत वेवसायीकपणा दिसून येना. मुळांत जीईएलाचे कार्यक्षमते विशीं दुबाव आसा अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
