भांगरभूंय | प्रतिनिधी
मडगांव : वेरोडें- कुंकळ्ळेंच्या एका बंद घराक उजो लागलो. रांदचे कुडींतल्या रेफ्रिजरेटराक उजो लागून तो सगळ्याक पातळ्ळो. हातूंत सगळें सामान जळून गोबोर जाल्ल्यान लाखांनी रुपयांचें लुकसाण जालें. हे घडणुके विशीं कळटांच कुंकळ्ळी उजो पालोवपी दळाच्या जवानांनी येवन उजो नियंत्रणांत हाडलो.
मेळिल्ले म्हायती प्रमाण, उजो पालोवपी दळाक सकाळीं साडे धा वरांचेर वेरोडा घराक उजो लागिल्ल्याचो फोन आयलो. थंय पावले उपरांत घर बंद आशिल्ल्याचें नदरेक पडलें. उपरांत जवानांनी लायट बंद करुन घरांत प्रवेश केलो. तेन्ना रांदचे कुडींतल्या रेफ्रिजरेटराक उजो लागिल्ल्याचें सजमलें. घर बंद आशिल्ल्यान धुंवर पुराय घरांत भरिल्लो. ताका लागून ऑक्सिजनाचें मास्क लावन उज्याचेर उदक मारून तो नियंत्रणांत हाडलो.
ह्या उज्यांत लायटीच्या उपकरणां सयत आयदणां दवरपाची आलमारूय लासली. उजो पालोवपी दळा प्रमाण शॉर्टसर्किटाक लागून हो उजो लागिल्ल्याची म्हायती मेळ्ळ्या.
कुंकळ्ळी स्टेशन फायर अधिकारी तृप्तेश नायक, अभय लोलयेंकार, प्रभाकर वेळीप, रोहन काणकोणकार आनी विनय वेळीप हांणी ह्या उज्याचेर नियंत्रण मेळयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
