भांगरभूंय | प्रतिनिधी
न्यू मार्केट, गांधी मार्केट हांचें नुतनीकरण पावसा उपरांत
मडगांव: मार्केटांतल्या वेपाऱ्यांनी परवानगी दीत जाल्यार नवें सुसज्ज अशी मार्केट इमारत बांदपाची तयारी आसा. सद्या न्यू मार्केटाच्या इमारतीच्या नुतनीकरणाचें काम दोन पांवड्यार करतले. ते खातीर सुमार पावणेदोन कोटींची निविदा जारी करून वर्क ऑर्डर दिल्या. तशेंच गांधी मार्केटाच्या नुतनीकरणाची सुमार 75 लाखांची वर्क ऑडर दिल्या. पावसा उपरांत ह्या कामांक सुरवात जातली अशी म्हायती आमदार दिगंबर कामत हांणी दिली.
मडगांवच्या न्यू मार्केटाच्या दोनूय इमारतींतल्यान उदकाची गळटी जाताली. ताचे वेले कांय पत्रेय पोरूंच्या पावसांत हुबून गेल्ले. मार्केट इमारतीच्या पाख्याची दुरुस्ती मडगांव पालिकेन सुमार 70 लाख रुपया खर्च करून केल्या, आनी ताचो शुभारंभ आमदार दिगंबर कामत हांचे हस्तुकीं जालो. ह्या कामा वेळार न्यू मार्केटाच्या इमारतीकूय पालिकेक आशिल्ल्या रंगा प्रमाण धवो आनी तांबडो रंग दिला.
आमदार दिगंबर कामत हांणी सांगलें, न्यू मार्केटाच्या इमारतींत वेवसाय करपी वेपाऱ्यां कडल्यान इमारतीच्या दुरुस्तेची मागणी जाताली. ते प्रमाण रंगकाम आनी पाख्याच्या दुरुस्तीचें काम करून पुराय केलां. तशेंच पिंपळा पेडार स्टिल्साचे रेलींग तुटिल्लें. थंय नव्या रेलिंगेची उबारणी केल्या.
दामोदर देवस्थान आशिल्ल्या पिंपळा पेडाचे नुतनीकरणा खातीर वेपाऱ्यांनी आनी नागरिकांनी परवानगी दीत जाल्यार ते कामूय नियोजनबद्ध पद्दतीन करतले. तशेंच मार्केटाची नवी इमारत उबारपा खातीर म्हजी तयारी आसा. पूण तें काम जबरदस्तीन करचे नात. वेपाऱ्यांनी परवानगी दीत जाल्यार आनी इत्सा दाखयल्यार नवो सुसज्ज इमारत प्रकल्प उबारतले अशें आमदार दिगंबर कामत हांणी सांगलें.
पावसा उपरांत न्यू मार्केटाच्या नुतनीकरणाचें काम दोन पांवड्यांनी करतले. ते खातीर सुमार पावणेदोन कोटींची वर्क ऑर्डर दिल्या. जाल्यार गांधी मार्केटाच्या नुतनीकरणा खातीर 70 लाखांची वर्क ऑडर जारी केल्ल्याचें आमदार कामत हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
