भांगरभूंय | प्रतिनिधी
तांचेर अणुबाॅम्ब घालपाक जाय. मागीर तांकां अक्कल येतली, अशीं मुक्ताफळां सगल्यांनी आयकल्यांत आसतलींच.
जपानाचेर अणुबाॅम्ब घालतकच कितें जालें तें ह्या अपुरबुद्दांक खबर ना, काय आपूण सांगता तें आयकनात, तांकां मुळा सावन सोंपोवपाची सुप्त इत्सा बी आसा? असोच एक अर्थीक अणुबाॅम्ब सध्या आमचे इश्ट डोनाल्ड ट्रम्पान घाला. ताचो फटको पुराय संवसाराक बसला. करता एकलो आनी भोगता सगले, तसलोच हो प्रकार. हें हजारांनी किलोमिटर पयस जालां, आमकां ताची बाधा जावची ना, असोय विचार करपी बरेच सुशिक्षीत लोक आसात. चीनांतल्या कोरोना वेळारूय आमी सुरवातेक घाळ राविल्ले. मागीर एकदां कीट पेट्टकच ताचें होमखण जावपाक वेळ लागूंक ना. अमेरिकेन आपल्या देशांत येवपी म्हालाचेर (निर्गतीचेर) चड शुल्क लायतकच संवसारांतल्या शॅर बाजारांनी खवदळ जालो. बाॅम्बे स्टाॅक एक्स्चेंजीक 19 लाख कोटी रुपयांचें लुकसाण जालां. हें मुखार वाडटलें, अशें जाणकारांचें म्हणणें. शॅर, म्युच्युअल फंडा विशीं जांकां खबर आसा, तांकां नेमकें कितें जालां, ताचो अदमास आयला आसतलोच.
भुरगेपणार बापायचे फाटीक लागून कुराड हाडटकच तिची धार तपासपाक पोरसांतले केळमे कापपाचो प्रकार अमेरिकेच्याच एका अध्यक्षान केल्लो. सध्याच्या नव्या अध्यक्षान वेगळें कितें करूंक ना. तांणी सरसकट सगल्याच देशांचेर शुल्क लायलां. अमेरिकेचें चलन गडगंज म्हणटकच तांणी थोडो पसून कर, शुल्क वाडल्यार हेर देशांक अर्थीक लुकसाण जाता. हाचो फटको बशिल्ल्या देशां मदीं ट्रम्पाक इश्ट मानपीय देश आसात. मजा म्हणल्यार, आॅस्ट्रेलियेच्या मालकीच्या दोन जुंव्यांचेरूय 10 टक्के शुल्क लायलां. एका जुंव्यार दोन हजार लोक रावतात. ते निर्गत करपा सारकें कांय करिनात. दुसऱ्या जुंव्यार पेंग्वीन्स रावतात. तांकां बाबड्यांक एक्स्पोर्ट, इंपोर्ट असलें कितें खबर आसत अशें दिसना. अमेरिकेक कांयच निर्गत करूंक नाशिल्ले देश पसून हे ‘रेसिप्रोकल टेरीफ’ वळेरेंत आसात. अमेरिकेच्या वेपार धोरणांत एकूय पळवाट उरपाक जायना म्हूण आमी हर्ड आनी मॅक्डोनाल्ड जुंव्यांक शुल्क लायलां, अशें अमेरिकेचे वाणिज्य मंत्री सांगतात.
1991 त सोवियत युनियन फुटून ताचे 15 देश जाले. हाचे फाटल्यान अमेरिकेचो हात आशिल्लो अशें म्हणटात. रशिया तेन्ना दुसऱ्या क्रमांकाचेर आशिल्ली. आतां चीनान तो जागो घेतला. साहजिकूच अमेरिकेच्या दोळ्यांत तो खुपता आसतलो. चीनान अमेरिकेचेर घाल्लें 34 टक्के शुल्क फाटीं घेवंक ना जाल्यार बुधवारच्यान तांचेर आनीक 50 टक्के शुल्क लायतले, अशी शिटकावणी दिवपी ट्विट राष्ट्राध्यक्ष डोनाल्ड ट्रम्प हांणी केलां. दोनूय देशां मदीं वेपारी झुज जावपाचे हे संकेत न्हय मूं? चीनाच्या कम्युनिस्ट पक्षाचें मुखपत्र, द पीपल्स डेली दिसाळ्यान म्हणलां, ‘अमेरिकेच्या शुल्काचो परिणाम जातलोच, पूण अशें कितें मळब कोसळून पडचें ना. आमी निमाणे मेरेन लढटले. 2017 त अमेरिकेन अशेंच केल्लें. पूण आमी लढले. चेंपण जितलें चड सोंसता, तितलो मनीस बळिश्ट जाता.’ ते वटेन चीनी विदेश मंत्रालयान आमी संवसारा खातीर दारां उक्तीं करीत रावतले, अशें म्हणलां. सोशल मिडिया सयत हेर सगल्या मळांचेर स्वताचें अस्तित्व निर्माण करपी, दुसऱ्यांक किंकोत करपी चीन अशें म्हणटा हें अजाप. अमेरिकेचो निधी मेळोवपी 20 कंपनीं कडेन चीनान उलोवणी केल्यांत. तांकां आमंत्रणूय दिलां. हातूंत ट्रम्प हांचो लागींचो वांगडी आशिल्ल्या एलोन मस्काची टेस्ला कंपनीय आसा! जो देश अमेरिकेक ह्या प्रस्नाचेर परत्याक परतें दितलो, ताचे कडल्यान थारिल्ले परस चड शुल्क घेतले, अशी शिटकावणी ट्रम्प हांणी दिल्या. आमी चीन सोडून सगल्या देशां कडेन चर्चा करपाक तयार आसात, अशेंय तांणी सांगलां. अमेरिकेंत म्हारगाय ना. आमच्या आदल्या फुडाऱ्यांच्या (घडये थंयचे नेहरू, गांधीजी) चुकीच्या धोरणांक लागून चीना सारक्या देशांक अमेरिकेचो फायदो घेवपाची संद मेळ्ळी, असो दावोय तांणी केला. कितेंय जालें तरी अमेरिकेक मात पसून लुकसाण जावचें ना, अशेंय तांणी म्हणलां. शुल्क वाडयिल्ल्यान अमेरिकेक सध्या अर्थीक फायदो जातलो खरो, पूण, फुडाराक कितें जाता, तेंय पळोवचें पडटलें. चीन, जपान, द. कोरियेची भुमिकाय म्हत्वाची थारतली. कारण तांणी एकमेकां कडेन व्हड प्रमाणांत वेपार करपाचें थारायलां.
अमेरिकेन हाचे पयलींय संवसाराक हादरे, धपके दिल्यात. 2008 चे मंदीक लागून सगल्यांचे शॅरबाजार पडिल्ले. अमेरिकेंत 25 लाखां वयर नोकऱ्यो गेल्ल्यो. संवसारांतल्या हजारांनी लोकांक घरदार विकचें पडिल्लें. हातूंतल्यान भायर सरपाक 5 ते 6 वर्सां लागिल्लीं. आतां भारताचेर 26 टक्के शुल्क लायलां. हाचो खास करून भांगराच्यो वस्ती, रत्नां, इलेक्ट्राॅनिक्स म्हाल, शेतकी उत्पादनां, गाडयो हांचेर परिणाम जावं येता. हें वेपारी झूज बेगीन सोंपलें जाल्यारूच हेर देशांच्या हिताचें थारतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
