भांगरभूंय | प्रतिनिधी
नवी दिल्ली, खबरां संस्था ः 16 अब्ज ऑनलायन क्रेडेन्शियल्स (पासवर्ड) लीक जाल्ल्याची खबर आयले उपरांत इंडियन कॉम्प्युटर इमर्जन्सी रिस्पॉन्स टीम-इनान (सर्ट-इन) सायबर सुरक्षा विशीं लोकां खातीर नवी मार्गदर्शक तत्वां जारी केल्यांत. ते प्रमाण सोशल मिडिया ते ईमेल आनी बँकिंग मेरेन सगळ्या गजालीं कडेन संबंदीत पासवर्ड बदलपाचो सल्लो सर्ट-इनान दिला. सायबरन्यूज हे संकेतथळान पासवर्ड लीक जाल्ल्याची म्हायती दिली.
लीक जाल्ल्या डेटांत पासवर्ड, युजरनेम्स, ऑथेन्टिकेशन टोकन हांचो आस्पाव आसा. तशेंच अॅपल, गुगल, फेसबूक, टेलिग्राम, गिटहब आनी जायत्या व्हीपीएन सेवां वरवीं लीक जाल्लो मेटाडेटाचोय आस्पाव आसा.
सर्ट-इनान म्हणलें, “हो एक एकत्रीत डेटासेट आसूं येता. 16 अब्ज क्रेडेन्शियल्सांनी पोरणें वा पयलींच बदलिल्ले पासवर्ड आनी युजरनेम्स लेगीत आसूं येतात. पूण, आमी सायबर सुरक्षा जतनाय घेवंक जाय. लोकांची म्हायती, खाजगी डेटा सुरक्षीत उरचो हाचे खातीर मार्गदर्शक तत्वां जारी करतात”.
सर्ट-इनान सोमारा मार्गदर्शक तत्वां जारी केल्यांत. तातूंत दरेकल्यान आपले पासवर्ड बेगोबेग अपडेट करचे अशें सांगलां. तातूंत वेगवेगळ्या प्लॅटफॉर्मांचेर मल्टी-फॅक्टर ऑथेन्टिकेशन (एमएफए) सुरु करपाची सुचोवणी केल्या. तातूंत लोकांक शक्य आसल्यार पासकी (PassKey) वापरचो अशेंय सांगलां. तशेंच लोकांक आपलो अँटीव्हायरस स्कॅन करपाचो आनी मालवेयरा पसून राखण करपा खातीर आपलीं सिस्टिम अपडेट करपाचो सल्लो दिला.
कंपनी आनी संघटनां खातीरय सर्ट-इन ची मार्गदर्शक तत्वां
सर्ट-इनान कंपनीं आनी संघटनां खातीरय कांय मार्गदर्शक तत्वां जारी केल्यांत. ते प्रमाण, एमएफए चालीक लावप, युजर्सचा अॅक्सेस मर्यादित करप आनी intrusion (घुसखोरी) detection systems (IDS), एसआयईएम (ecurity Information and Event Management) वापरपाचोय सल्लो दिला. हाचे वांगडाच कंपनींनी तांचे डेटाबेस भौशीकपणान उक्ते जावचे नात वा म्हायती लीक जावची ना हाची खात्री करची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
