भांगरभूंय | प्रतिनिधी
सर्वोच्च न्यायालयाच्या पांच न्यायमुर्तींचो आस्पाव आशिल्ल्या घटनापिठान केंद्रांतल्या एनडीए सरकारान काळ्या पयशांचेर अंकूश लावपा खातीर सुरू केल्ल्या वेंचणूक रोख्यांची येवजण घटनाबाह्य थारावन ती रद्द केल्ल्यान फाटल्या कांय दिसांत ह्या रोख्यांतल्यान खंयच्या राजकी पक्षांचेर फाटल्या चार पांच वर्सांत सारको कितलो धनवर्षाव जालो हाची म्हायती सामकार आयल्या. लोकसभा वेंचणूक जाहीर जावपाचे फाटभुंयेरूच वेंचणूक बाँड येवजणेचें बँड वाजलें आनी सत्तारुढ भारतीय जनपा पक्षा पसून काँग्रेस आसूं वा तृणमूल, द्रमुक वा आम आदमी अशे सगलेच राजकी पक्ष वेंचणूक रोख्यांतल्या मेळिल्ल्या निधींतल्यान कशे मालामाल जाले हे लोकांक कळ्ळें. हाका लागून आतां खंयच्याय एक पक्षा कडेन बोट दाखोवन चलचें ना आनी ज्या विरोधी पक्षांक जे कितें अपेक्षीत आशिल्लें तेंच सारकें तांच्या हातांक लागूंक नाशिल्ल्यान तांची निर्शेणी जावप सभावीक आसा. उरफाटें सगल्यांत चड निधी मेळिल्ल्या भाजपा उपरांत आपल्या पक्षाचे सुवातेर तृणमूल काँग्रेसीच्या वांट्याक चौदाशें कोटींचो निधी कसो आयलो हाचे दुख्ख काँग्रेस पक्ष फुडाऱ्यांक जाता. ताचे वयल्यान तृणमूलाक कांय जाणांनी लक्ष्य केल्ल्याचें दिसता. स, सात हजार कोटींचो निधी मेळोवपी भाजप हातूंत नांवा वेगळो रावला. काँग्रेसी कडेन एखाद दुसऱ्या राज्यांत तांची सरकारां आसतना आनी लोकसभेंत फक्त पन्नास-एकावन्न खासदार आसतनाय वेंचणूक रोख्यांतल्यान सुमार तेराशें कोटींचो निधी मेळूंक नाशिल्ल्यान तांकांय हात सोडून हातूंतल्यान मेकळें जावपाक मेळचें ना.
वेंचणूक रोख्यांची येवजण ही मुदलांत वेंचणुकांनी व्हड प्रमाणांत वापरतात त्या काळ्या धनाचेर अंकूश हाडप हे खातीर आशिल्ली. पूण सर्वोच्च न्यायालयाच्या घटनापिठाक तें पटलें ना आनी येवजण रद्द करतना देणगिदारांची नांवां गुपीत दवरपाचो घोशीत उद्देश लेगीत हे येवजणेक घटाय दिना अशेंय घटनापिठाचें स्पश्ट मत जालां. काळ्या धनाचेर अंकूश लावपा खातीर रोखे हो एकूच पर्यान ना अशें सांगतना घटनापिठान स्वताची सोडवणूक केल्ली आसली तरी ऐन लोकसभा वेंचणुकेचे फाटभुंयेर ही येवजण रद्द केल्ल्यान किदें साध्य जालें हें कळपाक मार्ग ना. तेन्नाचे केंद्रीय अर्थ मंत्री अरूण जेटली हांणी देशांतली राजकी फंडीग परंपरा लक्षांत घेवन वेंचणूक रोख्यांतल्यान निधी मेळचो आनी सहाजीक काळो पयसो आडावचो ह्या उद्देशांतल्यान ही येवजण लागू केल्ली. आतां सर्वोच्च न्यायालयान ती रद्दबातल केल्ल्यान ऐन वेंचणुकेंत काळ्या धनाचो ओघ सुरू करपा खातीर देणगिदारांक आतां रान मेकळें मेळ्ळां अशें समजावपाचें काय कितें हाची जाप मेळपाक जाय. काँग्रेस आसूं वा हेर विरोधी पक्षांक वेचणूक रोख्याचें बींग फुटले उपरांत वेगळेंच घबाड हाताक लागतलें आनी वेंचणूक प्रचारांत ताचो शस्त्रा सारको वापर करपाक मेळटलो ही अपेक्षा आशिल्ली. पूण भाजपाचेर आरोप करपाक वच्चे जाल्यार तातूंत आपली लेगीत व्हडली भागिदारी आसा हेंच स्टेट बँक ऑफ इंडियान देणगिदारांचीं नांवां जाहीर केले उपरांत कळून आयलें, आनी फक्त सारवासारव करपा बगर तांचे कडेन कांय बाकी उरलें ना.
सर्वोच्च न्यायालयान लोकसभेच्या तोंडार दिल्लो हो निवाडो अर्थांतूच कितलो मेरेन सारको आसा हो लेगीत एक चर्चेचो विशय थारला. ज्या देशांत सुमार 98 कोटी मतदार मतदानाचो हक्क लोकसभा वेंचणुकेंत वापरतले थंय काळ्या धनाचो जावपी वापर आडावप हाका सर्वोच्च प्राधान्य मेळपाची वा पर्यायी अशी वेवस्था जावपाची गरज आसतना जी कांय वेवस्था आसा तीच मोडीत काडिल्ल्यान आतां काळ्या धनाचो जाय तसो वापर करपाक देणगिदारांक रान मेकळें जालां असोच हाचो अर्थ काडटले. वेंचणूक रोखे हो काळें धन आडावपा खातीर एकूच पर्याय ना अशें सांगतना कांय नवे पर्याय लेगीत फुडें येवपाची गरज आशिल्ली. पूण तें आपल्या कार्यकक्षेंत येना अशें सांगपाक लेगीत सर्वोच्च न्यायालय मेकळें आसा. ताका लागून नवो पर्याय येवपा खातीर नवें सरकार अधिकारार ये मेरेन आमकां प्रतिक्षा करची पडटली आनी तो मेरेन काळो पयसो आपलें काम करपाक शकतलो. काळ्या धनाक लगाम घालपा खातीर वेंचणूक रोखे ही सगल्यांत पारदर्शक प्रक्रिया आशिल्ली अशें आतांय मानतात. आतां देणगिदारांची नांवां जाहीर केल्ल्यान कांय फरक पडलो वा ह्या उपरांत तो पडटलो अशें मानपाक मेळचें ना. हाचे कारण म्हणल्यार मेळिल्लो हो निधी खंयच्याय पक्षाक लिपोवपाक मेळचो नाशिल्लो. वेंचणूक आयोग आसूं वा राजकी पक्षांच्या हिशेबांत आयच्या काळांत हो निधी कसो लिपोवप शक्य आसा हें कळना.
भारतीय जनता पक्षाचे केंद्रीय फुडारी सद्या होच दावो करतना आमी पळयतात. वेंचणूक रोख्यांतल्यान मेळिल्ल्या वट्ट निधींतलो सुमार सत्तर टक्के निधी जर विरोधी पक्षांचे तिजोरेंत गेला जाल्यार भाजपाचेर आरोप करपाचो कसलोच नैतीक अधिकार काँग्रेस वा हेर विरोधी पक्षांक ना. हो तांचो दावो अतिशयोक्तीचो म्हणपाक मेळचें ना. वेंचणूक रोख्यांतल्यान भारतीय जनता पक्ष खंडणी रॅकेट चलयता असो आरोप राहूल गांधी हांचे सयत जायते विरोधी पक्ष फुडारी करपाक लागिल्ले. पूण देणगिदारांच्या नांवाची वेळेरी जाहीर जाले उपरांत मात तांच्या ह्या शस्त्राची धार बरीच कमी जाल्ली दिसता. देणगिदारांचे वळेरेंत राहूल गांधीच्या तथाकथीत वळेरेंतल्या अब्जाधिशांचीं नांवां नाशिल्ल्यान ताची चड पंचायत जाल्या. उद्देगपती अडानी आनी अंबानी हांची नांवां नाशिल्ल्यान बशिल्ल्या धपक्यांतल्यान राहूल गांधी अजून सावरूंक ना अशें दिसता. आयतारा मुंबयंत आपल्या भारत जोडो न्याय यात्रेचो समारोप करतना तांणी केल्लें मुद्दे विरयत भाशण लोकसभा वेंचणुके खातीर पक्ष कार्यकर्त्यांक कशी प्रेरणा दितले हें कळना. वेंचणूक रोख्यांतल्या काँग्रेस पक्षाक मेळल्ले सुमार तेराशें कोटीच्या निधीचीय आयज सगले कडेन चर्चा आसा. भाजपाक मेळिल्ल्या वट्ट निधीचे तुळेंत पन्नास टक्के इतलो निधी काँग्रेस आनी तृणमूलाक मेळपाक शकता जाल्यार भाजपा कडेन वांकडे नदरेन तांकां पळोवपाक मेळचें ना. ममता बॅनर्जी हांणी अजून हाचेर कसलीच प्रतिक्रिया उक्तायिल्ली ना. सर्वोच्च निवाड्या उपरांत वेंचणूक रोख्यांचो विशय ताकाच लागून ल्हवू ल्हवू फाटीं पडत चल्ला आनी वेंचणुकेच्या वेळार काळो पयसो जाय तितलो वापरपा खातीर मात रान मेकळें मेळ्ळां अशें म्हणपाक जाता.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
