वेंचणूक प्रक्रिया, लोकप्रतिनिधींचें बदलतें रूप

भांगरभूंय | प्रतिनिधी

दुसऱ्या महाझुजांत 1945 वर्सा अमेरिकेन बाॅम्ब घालून जपानाच्या हिरोशिमा, नागासाकी शारांचो गोबर केल्लो. 1947 वर्सा भारत स्वतंत्र जाल्लो तेन्ना देशाची परिस्थिती बिकट आशिल्ली. आयज दोनूय देशांनी अमृतकालांत प्रवेश केला आसतना फकत 13 कोटी जनसंख्या आशिल्ल्या जपानाचें वट्ट घरगुती उत्पादन (जीडीपी) 5 लाख कोटी (पाच ट्रील्यन) डॉलर तर 142 कोटी लोकसंख्या आशिल्ल्या भारताची जीडीपी ताचे अर्दान म्हळ्यार 2.70 ट्रील्यन डॉलर इतली उणी आसा.
सरकार, प्रशासन चलोवपी प्रामाणिक, प्रतिभावान, दूरदृष्टी आशिल्ले खरे देशभक्त नेतृत्व जशें जपानाक लाभलें ते तोडीचे फुडारपण सुरवेकचीं कांय वर्सां सोडीत जाल्यार आमकां मेळ्ळें ना, हें हाचें फाटलें मुखेल कारण. आयज गुन्यावांचे आरोप लागिल्ले 47 टक्के आमदार आनी 50 टक्के सांसद देशांत सरकारां चलयतात. देशांतल्या राजकारणांत वेंचणूक जिखपाची तांक आशिल्ले गुंड, फटींग, भ्रश्टाचारी, बलात्कारी उमेदवार सगळ्याच राजकी पक्षांक मानवतात हेंय ताचे फाटलें कारण.
त्या खातीर लिंगिक छळ दुबावीत आशिल्ल्या केंद्रीय मंत्र्याचेर कारवाय जावची हे मागणे खातीर महिला पैलवानांक सर्वोच्च न्यायालयांत वच्चें पडटा. ताचे उपरांतूय केंद्रात ‘बेटी बचाव’ भाजप सरकारच्या अधिकारांत आशिल्ले दिल्ली पुलीस दुबाविताक अटक करपाच्या मुडांत दिसनात तेन्ना तांकां परतून धरणे धरचें पडटा. विधानसभेत पॉर्नोग्राफीक क्लीप पळोवपी भाजप आमदाराची अब्रू काडपी कर्नाटक काँग्रेस ताका आतां आपल्या पक्षांत घेवन आपली अब्रू वगडायता.
हालीं मेघालयांत वेंचणुकांच्या वेळार नॅशनल पीपल्स पक्षाचो कॉनरेड संगमा कितलो भ्रश्टाचारी हाचें चित्र सगळ्या प्रचार सभांनी मोदी हांणी पितारलें खरें, पूण निकाला उपरांत ताका तेंको दिवन सरकारांत सामिल जाले. जाची अब्रू काडली तो निर्लज्ज संगमाय युती खातीर राजी जालो. बंगालात धवी साडी न्हेसून आनी रबरी चपलां फरफटायत तत्वनिश्ठा दाखोवपी ममता बॅनर्जीन आदी कम्युनिस्टांक तेंको दिवपी खून, अपहरणाचो आरोपी बाहुबली छत्रसाल महतोक तृणमूल पक्षांत घेतलो. राजकारणांतलो भ्रष्टाचार सोंपोवन क्रांती घडोवपाक भायर सरिल्ल्या आम आदमी पक्षाचे दोन मंत्री भ्रश्टाचाराच्या आरोपां खाला बंदखणीत बसल्यात.
वेंचणुकांचे काळांत गुजरात राज्य सरकारान बिल्किस बानो प्रकणांत खास्त भोगपी अकरा दोशींक कायद्यांत बदल घडोवन बंदखणी भायर काडले तर आतां 2024 वेंचणुकांच्या रणनिती खाला सुशासन बाबू नितीश कुमार आनी लालूपुत्र तेजस्वी यादवान गोपालगंजचे मॅजिस्ट्रेट कृष्णय्या हत्याकांडाचो दोशी आनी हेर अपहरण, खुनांचो आरोपी आनंद मोहनाक कायद्यांत बदल घडोवन बंदखणी भायर हाडलो. राजकारणी सगळे एकाच लेंड्याचे कुडके.
सत्तेत आयले जाल्यार कृशी, उत्पादन, कारखानदारी, सेवा सेक्टर, पायाभूत सुविधा, गरीब कल्याण, सामाजीक न्याय, महिला सशक्तीकरण, रोजगार, शिक्षण, भलायकी सेवा हांचे बाबतींत कसलीं धोरणां आपणायतले हें प्रचार सभांनी जनतेक कळीत करपाचे सोडून नेते फुकट जेवण-खाण, देव, धर्म, जाती, पंथ हांचे आधाराचेर प्रतिस्पर्धींक गाळयो घालीत मतां मागतना दिसतात.
जेन्ना देश, राज्यांची सरकारां चलोवपाची संविधानिक जापसालदारकी घेतिल्ले प्रधानमंत्री, गृहमंत्री, संरक्षणमंत्री, सांसद , दुसऱ्या राज्यांचे मुख्यमंत्री फकत आपल्या राजकी पक्षाक जैत मेळोवन दिवचे खातीर पक्षाचे निशाणीचे बिल्ले, तोपयो, जाकीटां घालून विधानसभा, नगरपालिका वेंचणूक प्रचारांत लोळतात आनी लाखांनी कार्यकर्ते, जनता फुकट बिर्यानी खावन काम- धंदे सोडून प्रचारसभा, रोड शोंत हाजेरी लायता, तेन्ना आमचे अर्थव्यवस्थेंतलो उद्देगीक उत्पादन दर 1.10 टक्को इतलें उणो आनी आमच्या देशाचे तुळेन लोकसंख्या आनी भौगोलिक आकारान ल्हान आशिल्ल्या देशां परस आमची जीडीपी उणी आसली म्हूण अजाप जावपाची गरज ना.
करदात्यांच्या महसुलांतले करोडो खर्च करून घडोवन हाडिल्ल्या वेंचणूक प्रक्रियेंत भोवमत मेळोवपी पक्ष फुडलीं पांच वर्सां सरकार चलयतलोच हाचीय शास्वती आसना. लांच आनी तपास यंत्रणांची भिरांत दाखोवन आमदार फोडप, तांकां लिपोवप, सरकार कोसळावप, नवे स्थापप, उपरांत कोर्ट खटले, वर्स उपरांत सर्वोच्च न्यायालयान कायद्याचो दोंगर कोंरातून निवाडो दिवप, न्यायालयीन आदेशांत खोटायले तरी सत्ता शाबूत उरिल्ले खातीर एका पक्षाच्या कार्यकर्त्यांनी निर्लज्जपणान मिठाय वाटून, फुगोट्यो मारत रस्त्यार नाचप आनी आयज राजकारणांत कसलीच नितिमत्ता शिल्लक उरिल्ली नासतना दुसरे पक्षान नितिमत्तेचो विजय जालो अशी काणी सांगप हे सगळे सवंग प्रकार चलता आसतना राज्यांतले सरकार, प्रशासन रामभरो से उरता.
राजकारणांत धर्म हाडप हे वागार बशिल्लेवरी. वाग कितलोय माणसाळ्ळो आसलो तरी केन्ना खायत हाची शाश्वती आसना. इस्लामिक देश पाकिस्तानांत इमरान खानाच्या तहरीक- ए- इन्साफ राजकी पक्षाचे कार्यकर्ते आतंकवादी जावन अल्लाह- हू- अकबर च्यो जेहादी घोषणा दित हिंसेचें तांडव करताले तेन्ना तांचे मुखार देशाची सेना शक्तिहीन दिसली. आमच्या देशांत रामनवम आनी हनुमान जयंती दिसा भाले, तलवारी, पिस्तुलां घेवन काडिल्ल्या मिरवणुकांचो शेवट मारामारी, दंगली, उजो लावणींत जाता तेन्ना ताचेर बेगोबेग नियंत्रण करपाच्या कामांत आमचीय पुलीस यंत्रणा अशक्त दिसली. धार्मिक उन्माद हाता भायर गेल्यार आतंकवादाचे रूप घेंव शकता हें सत्ता-लालसेन केन्ना श्रीराम तर केन्ना बजरंगबलीच्या नावान उन्माद पातळावपी हिंदुत्ववादी राजकी पक्षानीं लक्षांत घेवप गरजेचें.
भोव लजेची गजाल म्हळ्यार जेन्ना कर्नाटक वेंचणूक प्रचारांत सत्ते खातीर देव, धर्म आधारीत ध्रुवीकरण जातालें तेन्ना विस्तारवादी, वंशवादी, रंगभेदवादी, धर्मांतरणवादी अशे इतिहासिक लांच्छन लागिल्ल्या ब्रिटनांत राज्याभिषेकाच्या समारंभात हिंदू, मुस्लिम, शीख, बौद्ध, ज्यू धर्मगुरूंचो आस्पाव आशिल्लो आनी तांणी आपापल्या पवित्र ग्रंथांतल्या कवनांचें वाचन केलें. आपूण हिंदू धर्म आचरण करपी अशे जगजाहीर करपी ब्रिटनच्या मूळ भारतीय पंजाबी- हिंदू पंतप्रधानान समारंभात ख्रिस्ती धर्मग्रंथातल्या वचनांचें वाचन केले, त्यावेळार हांगा धर्मनिरपेक्ष संविधानिक लोकशाय भारत गणराज्यातले प्रधानमंत्री बजरंगबलीच्या नावान तर गृहमंत्री मुस्लिमांचे आरक्षण निरस्त करतले ह्या आश्वासनाचे बळार आपल्या पक्षा खातीर मता मागताले.
धर्मनिरपेक्षता, सर्वधर्म समभाव, सर्वसमावेशिकतेचे धडे विश्वगुरू जावपाक भायर सरिल्ल्या भारताक आता ब्रिटना कडल्यान घेवचे पडटले, अशें दिसता. आयज थंयच्या सरकारांत भारतीय पंजाबी मूळाचो हिंदू प्रधानमत्री ऋषी सुनक, मूळ गोंयकार ख्रिश्चन गृहमंत्री सुवेला ब्राव्हरमन तशेच नायजेरीयन मुळाची कृष्णवर्णी केमी बडनोक आनी इराकी मूळाचो मुस्लिम नदीम झहावी मंत्री आसात. ब्रिटनची वट्ट जनसंख्या 6.73 कोटी. ताच्या तीनपट म्हळ्यार 20 कोटी इतली फकत मुस्लिम जनसंख्या आशिल्ल्या भारतांत संसदेच्या दोनूय सदनांत तांचे प्रतिनिधीत्व करपी एकटोय मुस्लिम सांसद आयचे घडयेक नासप हे आमच्या संविधानिक लोकशाय प्रणालीक सोबून दिसना.

दीपक लाड
पर्वरी