भांगरभूंय | प्रतिनिधी
मडगांवां फॅसिलिटी सेंटराचें उक्तावण
मडगांव: काँग्रेसीच्या राष्ट्रीय मोहिमे प्रमाण मतदार वळेरेंतलीं बनावट नांवां उक्ती करपाचें काम चिराग नायक हांणी मडगांवां केलें. सद्या वेंचणूक आयोग भाजपाच्या हातांतले बावलें जालां. विवीध संस्था भाजपाच्या पाख्या खाला काम करीत आसून कसलीच पारदर्शकताय उरिल्ली ना अशें विरोधी पक्ष फुडारी युरी आलेमांव हांणी म्हणलें.
विरोधी पक्ष फुडारी युरी आलेमांव हांणी मडगांवचे काँग्रेसीचे फुडारी चिराग दत्ता नायक हांच्या समाजीक आनी राजकी मळा वेल्या कार्याची तोखणाय केली. मतदार वळेरी शुद्धीकरणा सयत मडगांवच्या लोकांक मजतीचो हात दिवपी चिराग हांचे तांणी अभिनंदन केलें. गोंय सरकारान लोकां कडेन आडनदर केल्ली आसतना नायक हांणी लोकां फाटल्यान उबे राविल्ल्याचें तांणी म्हणलें.
काँग्रेस वांगडी, येसस्वी वेवसायीक आनी समाजसेवक आशिल्ल्या चिराग नायक हांच्या मडगांव फॅसिलिटी सेंटराच्या उक्तावणा वेळार उलयतना आलेमांव हांणी म्हणलें, गोंय पांवड्यारूच न्हय जाल्यार राष्ट्रीय पांवड्यारूय आतां सत्ता बदलपाची गरज आसा. गोंयांत कोळशाचो विस्तार करपाचेर भर दिवपी हें सरकार लोकांच्या हिता कडेन आडनदर करीत आसा. तशेंच मत चोरीच्या आरोपांक लागून वेंचणूक आयोगाची प्रतिमा इबाडल्या अशें आलेमांव हांणी म्हणलें.
मडगांव फॅसिलिटी सेंटराक लागून लोकांक सरकारी येवजण्यो आनी विवीध कामां खातीर एकेच सुवातेर मजत मेळटली. चार मतदारसंघांतले बनावट मतदार उक्ते केले. आतां मडगांवांतूय अशे प्रकार चिराग नायक हांणी मुखार हाडल्यात अशें अमीत पाटकार हांणी म्हणलें.
ह्या वेळार चिराग नायक हांणी म्हणलें, शिक्षण, भलायकी, खेळां, महिला सक्षमीकरण बी मळार मजत करपाचो आमचो यत्न आसा. हे कचेरेक लागून म्हाका दरेका कडेन पावपा खातीर एक माची मेळ्ळ्या. मतदार पडटाळणी मोहिमेंत मोटो भाग आसा. एका घरांत 40 मेरेन मतदारांची नोंद आसा. मडगांवां सुमार 1650 मतदार अशे दिसून आयले जे हांगा रावनात. कांय सप्तकां पयलींची ही संख्या आशिल्ली. पूण वळेरी तपासतना ही संख्या सुमार 2800 वयर पावल्या. आतां हें प्रकरण आमी चड लोकां मुखार हाडटले. जेणे करून अशे फटीचे मतदार उक्तडार येतले अशें नायक हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
