वेंचणूक अधिकारी बदल्ले

भांगरभूंय | प्रतिनिधी

आयज प्रशिक्षण; जि. पं. आचारसंहिता दोन दिसांनी

भांगरभूंय । प्रतिनिधी

पणजी : जिल्हो पंचायत वेंचणुको थारिल्ले प्रमाण 13 डिसेंबराक जातल्यो. ते खातीर लागपी वेंचणूक आनी सहाय्यक वेंचणूक अधिकारी नव्यान नेमल्यात. आदल्या अधिकाऱ्यांक जिल्हो पंचायत वेंचणुकेच्या कामांतल्यान मेकळे केल्यात. आयतारा वव्या अधिकाऱ्यांक प्रशिक्षण दितले, आनी ते उपरांत दोन दिसांनी आचार संहिता लागू जातली.

10 सप्टेंबरात जारी केल्ल्या आदेशांत म्हालांतल्या उपजिल्होधिकाऱ्यांक वेंचणूक अधिकारी म्हूण नेमिल्ले. तशेंच मामलेदारांक सहाय्यक वेंचणूक अधिकारी म्हूण नेमिल्ले. हे अधिकारी आतां मतदार वळेरेच्या पडटाळणीच्या कामाक नेमिल्ल्यान जिल्हो पंचायत वेंचणूक फुडें धुकलतले अशी चर्चा चलताली. मजगतीं वेंचणूक आयोगाच्या गोंयांतल्या मुख्य वेंचणूक अधिकाऱ्यांनी जिल्हो पंचायत वेंचणूक फुडें धुकलचे खातीर गोंय सरकाराक पत्र लेगीत बरयिल्लें. मात सरकारान थारिल्ले तारखेकूच वेंचणूक घेवपाचें निश्चीत केलां.

राज्य वेंचणूक आयोगान शुक्रारा नव्यान वेंचणूक अधिकारी नेमल्यात. हे वळेरेंत उपजिल्होधिकाऱ्यांचे सुवातेर उपसंचालक पांवड्या वयल्या अधिकाऱ्यांक नेमल्यात. तातूंत वेगवेगळ्या खात्यांचे उपसंचालक, सहाय्यक आयुक्त हांचो आस्पाव आसा. जाल्यार सहाय्यक वेंचणूक अधिकारी म्हूण बीडीओंक नेमल्यात. ह्या सगल्या अधिकाऱ्यांक आयतारा 16 नोव्हेंबराक वेंचणुकेच्या कामाचें प्रसिक्षण दितले. अर्ज स्विकारप, छाननी करप ह्या सगल्या गजालींचें प्रशिक्षण दिले उपरांत सोमारा वा मंगळारा मेरेन वेंचणुकेची आचारसंहिता येतली.

वेंचणूक फुडें धुकलपाचो विचार ना. वेंचणुकेची तयारी ऑगस्ट सावन चलताली. मतदार वळेऱ्योय तयार आशिल्ल्यो. ते उपरांत गोंया सयत कांय राज्यांनी मतदार वळेऱ्यांची पडटाळणी सुरू करपाचो निर्णय भारतीय वेंचणूक आयोगान घेतलो. पूण राज्य वेंचणूक आयोगान ह्या गजालींचो कसलोच परिणाम गोंयांतल्या जिल्हो पंचायत वेंचणुकेचेर जावचो ना, हें स्पश्ट केलें.

सध्या भाजप, काँग्रेस, गोवा फॉरवर्ड, आरजीपी, मगो, आम आदमी पक्ष ह्या सगल्यांनीच जिल्हो पंचायत वेंचणुके खातीर उमेदवार सोदपाचें काम सुरू केलां. भाजपान आपली वळेरी लागीं लागीं निश्चीत केल्या. हेर पक्षांनीय उमेदवार सोदपाचें काम सुरू केलां.

राज्य वेंचणूक आयोगान वेंचणुकेची तारीख 14 ऑक्टोबराक जाहीर केली. ते उपरांत मतदार वळेरी 29 ऑक्टोबराक उजवाडायिल्ली वळेरी स्विकारल्या. मात वेंचणुकेचें वेळापत्रक अजून जाहीर जावपाचें आसा. ज्या दिसा जिल्हो पंचायत वेंचणुकेचें वेळापत्रक जाहीर जातलें, त्याच दिसा सावन आचारसंहिता लागू जातली. उमेदवारी अर्ज भरपाची तारीख आनी मतमेजणेची तारीख लेगीत स्पश्ट जातली. शेनवारा 13 डिसेंबराक मतदान जातलें. उत्तर गोंयांत 25 जाल्यार दक्षीण गोंयांत 25 मतदारसंघ आसात. वेंचणुके खातीर आरक्षण जाहीर जालां. रोटेसना प्रमाण जाल्ल्या आरक्षणाक लागून जिल्हो पंचायतीचेर वेंचून येवपी खूबश्या म्हालगड्यांचे मतदारसंघ तांच्या हातांतल्यान गेल्यात. ताका लागून हे खेपे नवीं मुखामळां व्हड प्रमाणांत वेंचून येतलीं.