भांगरभूंय | प्रतिनिधी
पणजीः देशभरांतल्यो वेंचणुको ईव्हीएम यंत्रा वरवीं न्हय जाल्यार मतपत्रिके वरवीं घेवच्यो, अशी मागणी घेवन आल्तीनच्या वेंचणूक आयोगाचेर काल मोर्चा व्हरपाचो यत्न करपी आंदोलकांक पुलिसांनी आडायलें. ताका लागून हांगा कांय काळ तणाव निर्माण जाल्लो. निमाणें पुलिसांनी पांच वांगड्यांच्या शिश्टमंडळाक वेंचणूक आयुक्तांक मेळपाची परवानगी दिली.
ह्या आंदोलनांत भानू प्रताप सिंग, सावियो कुतिन्हो, रामा काणकोणकार, तनोज अडवलपालकार हांचे वांगडा हेर कार्यकर्ते हाजीर आशिल्ले.
हे विशीं सर्वोच्य न्यायालयाचे वकील आनी देशभर हें आंदोलन करपी भानू प्रताप सिंह हांणी सांगलें, देशांतले सामान्य जनतेक ह्या यंत्रा विशीं संदिग्धताय आसा. ताका लागून आमी ईव्हीएमा वरवीं वेंचणूक घेवपाच्या आड आसा. सकाळीं आमी आझाद मैदानाचेर बसका घेतली. उपरांत आमी वेंचणूक आयोगाच्या अधिकार्यांक मेळपाक वतना पुलिसांनी आमकां आडायले.
सरकारी अधिकारी जनतेचे नोकर आसतात. जनतेन तांकां मेळप वा तांचे मुखार आपल्यो मागण्यो मांडपांत कांयच बेकायदेशीर ना. आमी वेंचणूक अधिकार्यांक सुमार १ लाख लोकांच्यो सयो आशिल्लें पत्र दितले. हातूंत सगळ्यांनी ईव्हीएमाक विरोध केला. हें पत्र राष्ट्रपतींक संबोधीत केल्ल्यान वेंचणूक अधिकारी तें तांचे मेरेन पावयतले अशी आस्त आसा, अशें तांणी म्हणलें.
रामा काणकोणकार हांणी, आमी शांतपणान आमच्यो मागण्यो मांडटात. तरी पुलिसांनी आमकां आडायले. आमकां वेंचणूक अधिकार्यांक फकत निवेदन दिवपाचें आसा. हातूंत आमी खंयचो कायदो मोडलो म्हणून पुलीस आमकां आडायतात हें मात कळना. हांगा बायलां पुलीसूय नाशिल्ल्यो. दादले पुलिसांनी आंदोलन करपी बायलांक हाताळप ही लजेची गजाल अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
