भांगरभूंय | प्रतिनिधी
मध्य प्रदेश, राजस्थाना सयत पांच्या राज्यांतल्या विधानसभा वेंचणूक प्रक्रियेंतलो पयलो पांवडो आयज मिझोराम आनी
छत्तीसगडांत जावपी मतदानान सुरू जाता आनी 30 नोव्हेंबराक तेलंगणांतल्या मतदानान ही प्रक्रिया सोंपतली. 3 डिसेंबराक निकाल लागले उपरांत लोकसभा वेंचणुकेचे वेध खऱ्या अर्थान देशाक लागतले. ताचे पयलीं आनीक एक म्हत्वाचो टप्पो आमच्या देशांत पुराय जातलो आनी तो म्हणल्यार सध्या सुरू आशिल्ल्या संवसारीक वन-डे क्रिकेट सर्तीचो. संवसारीक क्रिकेट सर्त आनी तातूंत आमचो भारतीय पंगड जी अफलातून आनी दोळे दिपकावपी कामगिरी सध्या करता ती पळयल्यार क्रिकेटीचो जोर पुराय संवसारांत पातळ्ळा अशें म्हणपाक जाता. विधानसभा आनी येता ती लोकसभा वेंचणुके कडेन संवसारीक क्रिकेट सर्तीचो सांगोड घालपाचें कारण इतलेंच खातीर की संवसारांक क्रिकेट शिकोवपी इंग्लंड पंगडाची आनी लोकसभेच्या वेंचणूक रुपी सर्तीत ‘इंडिया’ ह्या नांवा खाला देंवपाक पळोवपी सगल्या विरोधी पक्षांची जाल्ली स्थिती म्हणा वा दुरावस्था सुमार एकूच जाल्या, आनी वस्ताद इंग्लंड पंगडाच्या वांट्याक संवसारीक सर्तींत सध्या जें आयलां तीच स्थिती ‘इंडिया’चेर येवची ना मूं, अशी जावपी चर्चा कानार पडपाक लागल्या.
संवसारीक क्रिकेट सर्तींत वांटो घेवपा खातीर इंग्लंडाचो पंगड भारतांत पावलो तेन्ना चार वर्सां आदीं जिखिल्लें क्रिकेटीचें संवसारीक वस्तादपण राखपाचें उद्दिश्ट बाळगून तांणी आपले मोहिमेक सुरवात केल्ली. पयलेच मॅचींत उपजैतिवंत न्युझिलॅण्डान तांचो माज देंवोंवपाचें काम केलें जाल्यार बांगलादेशा आड कशें तरी जैत मेळयले उपरांत इंग्लंडाक दरेका पंगडान अशें कितें बडोवन काडले की धा देशांच्या गूण तकट्यांत हो पंगड सामको तळाक म्हणल्यार अफगाणिस्तान, श्रीलंका, बांगलादेश आनी नॅदरलॅण्ड हांच्या खाला धुकल्लो गेला. खंयच्याय पंगडान येवचें आनी वस्ताद इंग्लंडाक बडोवचें अशेंच कांयशें चित्र संवसारीक सर्तींत सध्या दिसता आनी फुडले चॅम्पीयन करंड क्रिकेट सर्तींतली सुवातूय व्हगडावपाचो वेळ इंग्लंडाचेर आयला. संवसाराक क्रिकेटीचें धडे शिकोवपी सायबांच्या संवसारीक वस्तादपण राखपा खातीर भारतांत आयिल्ल्या पंगडाची फाटलीं धा वर्सां केंद्रांत सत्ता भोगपी भाजपाची सद्दी उमथून उडोवपा खातीर पांच-स म्हयन्यां आदीं व्हड म्हत्वाकांक्षेन काँग्रेसी सयत चडश्या विरोधी पक्षांनी व्हडलो गाजावाजो करून ‘इंडिया’ ह्या आकर्शक नांवांन स्थापन केल्ल्या पंगडा कडेन तुळा करपाचो मोह ह्या वेळार आवरना. विधानसभा वेंचणुको वेगळ्यावेगळ्या राज्यांनी जाता आसतना भाजपाक शह दिवपा खातीर एकठांय आयिल्ले पक्ष दरेका सुवातेर एकमेकांचेच पांय ओडटात अशें चित्र जेन्ना आमी पळयतात तेन्ना ‘इंडिया’चो फुडार कितें ह्या प्रस्नाची जाप आपसूकच मेळटा. इंग्लंडाची संवसारीक सर्तींत सध्या ‘न भूतो न भविश्यती’ अशी जी हालत जाल्या ती कसल्याय कारणान काय आसना, तशीच हालत एकवेळ सातेक दसकां देशाचेर राज्य करपी काँग्रेस पक्षांतले अंतर्गत मतभेद आनी कोणाचेंच आयकून घेवपाचें ना ही मानसिकता, हाका लागून जावचीच ना अशें आयज हड्ड्यार हात मारून सांगपाक मेळचें ना.
इंग्लंडाच्या अपेशाचीं कारणां कसलींय आसूं, पूण जें उद्दिश्ट दोळ्या सामकार दवरून पांच म्हयन्यां पयली ‘इंडिया’ आघाडी स्थापन केल्ली ते आघाडेंत बिघाडी जावपाक केन्नाच सुरवात जाल्या. पांच राज्यांतल्या विधानसभा वेंचणुकांचो निकाल लागले उपरांत काँग्रेसी सयत समाजवादी, जनता दल युनायटेड, आम आदमी पार्टी, तृणमूल ह्या पक्षांचे फुडारी एकमेकां कडेन दोळे मोठे करून पळयतात अशें चित्र दिसलें जाल्यार तातूंत अजाप दिसचें ना. राष्ट्रवादी काँग्रेसीचे शरद पवार, समाजवादी पक्षाचे अखिलेश यादव हांचे सयत सीताराम येच्युरी, ओमर अब्दुल्ला आनी व्हडले फुडारी विधानसभा वेंचणुकांच्या तोंडार तयार जाल्ल्या खर मतभेदांचेर हुस्को उक्तायतना दिसतात. आमी हाचो अप्रत्यक्ष कांय जायना फायदो उठोवपाक भारतीय जनता पक्ष सज्ज जाल्लो दिसता. राजस्थान आनी मध्य प्रदेश हीं दोन व्हडलीं राज्यां जिखपाचो भाजपाचो यत्न आसा. विरोधकांच्या झगड्यांतल्यान तांकां लाव जावप अपरिहार्य थारला. ‘इंडिया’ आघाडेचे प्रगतीक सगल्यांत व्हडली आडमेळ कोणे तयार केल्या जाल्यार ती आघाडेंतलो सगल्यांत व्हडलो पक्ष आशिल्ल्या काँग्रेसीन हें स्पश्ट दिसता. आम आदमी आनी तृणमूल काँग्रेस पक्षाचे फुडारी स्वताच व्हडल्या घोटाळ्यांत आडकल्यात ही वस्तुस्थिती आसली तरी काँग्रेस पक्ष लेगीत धुयल्ल्या तांदळां सारको नितळ थोडोच आसा. मात काँग्रेसीच्या मनांत वेगळेंच कितें तरी शिजता. राजस्थान आनी मध्य प्रदेश जिखपा खातीर आमकां सध्या कोणाचीच गरज लागची ना अशीच कांयशी तांची धारणा जाल्ली दिसता आनी हीच धारणां घडये काँग्रेसीक ह्या दोनूय राज्यांत म्हारग पडपाक शकता. जाका लागून लोकसभा वेंचणुकेंत तांकां सावरप लेगीत कुस्तार जावपाक शकता.
मुंबयंत ‘इंडिया’ची बसका जावन दोन, अडेज म्हयने उलगले आसतले. मात फुडले बसकेची तारीख अजून थारना. ताका लागून आघाडेचे कांय फुडारी हुस्क्यांत पडल्यात. किमान समान कार्यावळीच्या नांवान सगलाेच ठणाणाच दिसता. विधानसभा वेंचणुकांतूय सुवातो वांटपा विशीं सौम्य भुमिका घेवपाचें थारिल्लें आसतना कोणूय आपापल्यो सुवातो सोडपाची तयारी दाखयनाशिल्ल्यान ‘इंडिया’चो सध्या इंग्लंड जाल्लो दिसता. विधानसभा वेंचणूक प्रचारांत एकमेकांक गाळयो-शाप दिले उपरांत लोकसभा वेंचणुके खातीर एकठांय येवचो अशीच ‘इडिया’ची कार्यावळ दिसता. पूण निकाल हांगचे थंयचे जाल्यार तातूंतल्यान कांय वेगळें घडपाची शक्यताय न्हयकारपाक जायना. भाजपाक जाची अपेक्षा आशिल्ली तशेंच कांयशें घडटा. लोकसभा वेंचणुकेंत निदान भाजपा सामकार जबरदस्त अशें आव्हान तयार जावपाची शक्यताय उणीच आसा. मध्य प्रदेशांत काँग्रेस आनी समजावादी हांचें मदीं सुवातो वांटपात समजिकाय जाल्ली जाल्यार घडये ‘इंडिया’चें अस्तित्व तिगोवप सोंपें जातलें आशिल्लें. समाजवादी पक्षा कडेन भाजपाक तोंड दिवपाची तांक आसतनाय तांचे कडेन आडनदर करीत काँग्रेस आपलोच मार्ग आपणायतलो जाल्यार ताणें कोणाचे हीत सादतले हें कोणाकूय सांगपाची गरज ना. काँग्रेस आनी समाजवादी पक्षांतले मतभेद हाका लागून आनीक वाडटले आनी तातूंत ‘इंडिया’ आघाडेची वीण चड सैल जायत वतली. काँग्रेस फुडाऱ्यांची अखिलेश यादवा विरोधांतली बयानबाजी, नितीशकुमार हाचो काँग्रेस विरोधांतलो निशाणो तशेंच हेर घटक पक्षांच्या फुडाऱ्यांची वादग्रस्त विधानां हाका लागून आघाडेंतले बरेच पक्ष एकमेकां पसून पयस वचपाक शकतात. मात ताचें कोणाक कांयच पडून गेल्ल्याचें दिसना. काँग्रेसीक ताचो व्हडलो फटको बसपाक शकता. कोणें सांगचें, विधानसभा वेंचणुकाचें निकाल लागतले तेन्ना घडये आयच्या इंग्लंडा भशेन ‘इंडिया’ खातिरूय वेळ गेल्लो आसतलो.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
