भांगरभूंय | प्रतिनिधी
लोकसभा वेंचणुके निमतान राज्यांतले सत्तेंतले, विरोधी राजकी पक्ष, मतदारच न्हय जाल्यार पुराय गोंय जागे जालां. साबार
प्रस्नांचेर सरकाराक उजरावपाचो वावरय जाता, लागला, ताचें मतांत रुपांतर जातलें व्हय? एका तेंपार जेतरेन प्रदेश काँग्रेसीचे पयलींचे अध्यक्ष गिरीश चोडणकार, सुनील कवठणकार, गोवा फॉरवर्डाचे दुर्गादास कामत हांचे वरी कार्यकर्ते समाजीक प्रस्नांंचेर रस्त्यार येवन आवाज उठयताले. आदले मुख्यमंत्री मनोहर पर्रीकार हांणी तांकां आंदोलनाची वाट दाखयिल्ली. वेंचणुके निमतान विरोधी राजकी फुडार्यांचोच न्हय सरकारांतल्या आमदारांचो, मतदारांचो आवाज आयकूंक येवंक लागला. संविधान बदलूंक दिवचे नात, धाव्या परिशिश्टांत दुरुस्ती वरवीं व्हड पक्षांतरां जावचीं न्हय हेखातीर कडक तजवीज जातली हें सांगपी आयल्यात. आस्त आसा वेंचणुकेच्या दिसांनी सुरू जाल्लो आवाज सदांकाळ उरतलो. त्या आवाजा पासत गोंय वाटावलां. सरकार चुकता तेन्ना सरकाराचेर बडी मारपाक, तांचेर अंकूश दवरपाक आवाज उठोवपी विरोधक जाय. वेंचणुके वेळार लोकांनी, विरोधकांनी उप्रासायिल्ल्या, नदरेक हाडून दिल्ल्या विशयांतल्यान, मांडिल्ल्या प्रस्नांतल्यान सरकारी यंत्रणा, प्रशासनांत सुदारणा जातली अशें दिसपाक लागलां.
आडवेळार आयिल्ल्या पावसांत पणजी बुडली तेन्ना ती पुराय उदका खाला गेल्या अशें चित्र देश पांवड्यार फोट्यांनी, खबरांनी पावलें. खबरो, फोटे छापून येता म्हणसर पणजेच्या रस्त्यांचेर भरिल्लें उदक देंवले, पणजी आनीक नेटान धांवपाक लागली. प्रदेश काँग्रेस अध्यक्ष अमीत पाटकार हांच्यो फाटल्या वर्सा पणजे पावसाच्या उदकांत शिरकल्ल्यो गाडयो, पिकअपी हालीं प्रचाराक गोंयच्या खांची कोनशांनी भोंवता आसतल्यो. भाजपाचे प्रचाररथ जशे भोंवतात तशेच काँग्रेसीचेय, गाडयांचेर स्क्रीन लावन भाशणां केल्यार शारांनी लोकां मेरेन पावतात? गांवांतल्या तिठ्याचेर, मार्केटांनी तरी स्क्रिनीचेर भाशणां आयकुपाक गर्दी जाता? वेंचणुकेच्या गर्देची गणितां गिरीश, सुनीलाक जमतलीं, पदयात्रा तांचे बगर कोण काडटले?
विरोधकां बराबरीन सत्तेंत आशिल्लेय आपल्या मतदारसंघांतलो पडून उरिल्लो वावर मुख्यमंत्र्यांक वेंचणूक प्रचारा वेळार दाखोवंक लागल्यात. मतदानाचो दीस सोंपलो की दोन दीस विसव घेवन मुख्यमंत्री डॉ. प्रमोद सावंत गरजे प्रमाण प्रशासकी पांवड्यार बसका घेवन पावसा आदींच्या वावराचो नियाळ घेतले. वेंचणुकेच्या आंगणात चड वेळ रावले, भोंवले तरी प्रशासन सामकें मोडून पडचे ना हाची वेवस्थाय जाल्ली आसली तरी सरकारी अधिकारीय वेंचणुकेच्या वावरांत आसात. वेंचणूक आचारसंहिता आशिल्ल्यान कामकाजाक कळाव लागता. मतदानाचें पर्व सोंपतकीच आचार संहिता सदळ करून पावसाळ्या पयलींच्या कामकाजाक, पयशांचो विलो लावपाक वेंचणूक अधिकार्यांची मान्यताय घेवची पडटली.
वेंचणूक अधिकार्यांचो म्हत्वाच्यो बसका सोडल्यार हेर बसकांची ऑनलायन वळेरी लागतली. ऑनलायन वा व्हिडियो कॉन्फरन्सिंगांतल्यान बसका घेवप आनी चलून, भोंवन प्रत्यक्षांत कितें चल्लांं तें पळोवप हातूंत वेगळेपण आसता. खूब दिसा उपरांत कला अकादमीत हालींच पावतकीच कला आनी संस्कृती मंत्री गोविंद गावडे हांकां आडवेळ्या पावसान अकादमीचे खंयचे सुवातीत उदक खंय, कितलें, कित्याक सांठून उरलें तें कळ्ळां आसतलें. कला अकादमीत पांख्यारच न्हय फाटले वटेनच्या मेकळ्या जाग्यार कोयराच्यो, लोखंड आनी लांकडाच्या वस्तीच्यो राशी पडून आसात हें तांकां दिसचें ना? कला अकादमी भोंवतणचो वाठार पयलीं परस पांचवोताल्ल जाला, धव्या तांबड्या चाफ्यांच्या झाडांचेर चाफींय व्हड प्रमाणात फुल्ल्यांत. दर्यासंगमाचेर गुलमोहराचें झाड केसरी जाता, लोकांक येवपाक वचपाक नवी वाट जाल्या, नाटकां, कार्यावळी, तियात्रांचो आस्वाद घेवपी आसात हें पळोवन, आयकून ते खोशी आसतलेच.
कला अकादमीचें गळपी पाखें, भिजिल्ल्यो वण्टी, हेर वाठारा विशीं मुख्यमंत्र्यांक गोविंद गावडे हांणी आपली चिंतना विचार ई मेल, वॉटसअॅपान कळयिल्लीं आसतलीं. स्मार्ट सिटींतलो परशुराम पुतळो, योग संकूल ते माय तापता तेन्ना शितळसाण दिवपी कांपाल वॉक वे कला अकादमी आनी लागसरच्या वाठारांतल्या वातावरणाचेर परिणाम जावंक शकता हें तांकां कळटलेंच. तांचें तंत्रिकी शिक्षण तेखातीर उपेगाचें. स्मार्ट पणजेतलें स्मार्ट पणजे मार्केट पळोवन तसलें मार्केट म्हापशेंकारां खातीर दिवपाचें उतर दिवपी काँग्रेसीचे उमेदवार रमाकांत खलप हांकां मार्केटांत म्हापशेंकार, समेस्त गोंयकार मेळ्ळ्या आसतले. पणजेतलें स्मार्ट मार्केट स्मार्ट सिटीचो पयलो पांवडो, लागसारच्या आयनॉक्स थिएटरा वरी थिएटर म्हापश्यां आसा? वेंचणूक जातकीच ताळगांव, पणजे, म्हापशेंच्या कोनशा कोनशांनी रमाकांत खलप भोंवतले? मार्केटांत तांचे वांगडा आशिल्ले नगरसेवक तांच्या प्रभागांनी वर्साक कितले फावटी वतात हें तांकां खबर आसा?
फक्त वेंचणूक लागीं येतकच, उमेदवारी मेळटकच आपल्या वाठारांत येवपी म्हापालिका, नगरपालिकेच्या नगरसेवकांक, पंचायत वांगड्यांकय लोकसभा वेंचणुकेन जागे केलां हें सत. वेंचणूक उदरगत हाडटा, येणावळय दिता व्यक्ती, गांवांक, शारांक. 2024 लोकसभा वेंचणूक राजकी पक्षांच्या कांय वरिश्ठ फुडार्यांक आतां घरा बसात, घरकान्न, पूत, धुवो, सुनांच्या वेंचणुके पासत मार्गदर्शक जायात हें गोंयांच न्हय देश पांवड्यारय नकळटां सांगपी.
संविधानांत बदल करून कायदो घटमूट केले बगर पक्षांतरां आडावंक जातलीं? कोणे दिलो गोंयांक राज्य पांवडो? तेन्नाच्या केंद्रांतल्या काँग्रेस सरकारान, शिल्पकार पयलींचे मुख्यमंत्री प्रतापसिंह राणे. राज्य पांवड्याचे विरोधक आशिल्ले रमाकांत खलप आयज काँग्रेस पक्षाचे (इंडिया) चे उत्तर गोंयचे लोकसभा उमेदवार. कारगीलविरांक ते संविधानाची म्हायती दितले? खाणबंदी सर्वोच्च न्यायालयाच्या निर्णया खातीर आयली, म्हापसा अर्बन बँकेच्या कारबारा विशीं रिझर्व बँकेन सरकाराक नदरेंत हाडून दिलें हो इतिहास फाटल्या वीस वर्सांतलो. मतदारांक तो तशेंच केंद्रीय मंत्री श्रीपाद नायक हांच्या कामकाजाची म्हायती वॅबसायटीर मेळटा.
गोंय ल्हान राज्य, सगल्या समाजाचीं वळख एकामेकांक आसा. मागासवर्गीय गोंयकार आयज करोडपती जाल्यात, उच्च शिक्षणान गावडा, कुणबी, वेळीप करोडपती जावंक ना?
मुखेल प्रस्न आसा स्थलांतरणांतल्यान आयिल्ल्या मतदारांचो, ते विशीं हुस्को आदले मुख्यमंत्री पर्रीकार हांणी परगटायिल्लो. लोकसभा वेंचणुके निमतान तोच वेगळ्यावेगळ्या रुपांनी जागे जाल्ल्या मूळ गोंयकारांनी मांडला. मूळ गोंयकारांचे अर्थकारण स्थलांतरीत मतदारांच्या हातांत वता? सरकारी येवजणीचो फायदोय तांकांच अती मेळटा? सरकारान जापो
सोदून काडच्यो.
गोंय उदरगतीचे वाटेन धांवता, प्रतापसिंह राणे, रमाकांत खलप हांच्या सपनांतल्या मोपा विमानतळाचो एक वांटो मार्गाक लागला. विमानतळ दोन वांट्यांनी पुराय करपाची मूळ येवजण, येवजणी प्रमाण वावरय चालीक लागला. मोपा विमानतळान गोंय वाटायलां अशें म्हळ्यार अतिताय जावची न्हय. गोंयचें पर्यटन, वेपार, वेवसाय मोपा विमानतळा वेल्यान फुडें व्हरतना दक्षीण गोंयच्या विकासाक नवी दिका दिवची पडटली. दाबोळे विमानतळाचो विस्तार, नवनिर्मणेचो वावर आनी ल्हान नवो विमानतळ कसो जातलो? स्मार्ट पणजेवरी म्हापशें, मडगाव, मुरगांव, पेडणें मतदारसंघ स्मार्ट जातले? बांदकामां, अतीक्रमणांची स्वतंत्र यंत्रणे वरवीं म्हायती घेवन सैम, भोंवतण सांबाळून पांचवेताल्ल (ग्रिन-ऑक्सिजन-मार्ग) रस्ते बांदपाचो सोपूत घेवचो पडटलो. त्या रस्त्यांनी नितळसाणी वांगडा उदक, सावळी, खाणा जेवणांच्यो सुविधा शिस्तीन मेळपा पासत तजवीज जावची वेंचणुके निमतान जागे जाल्ल्या गोंयाक विश्वासांत घेवन. माणकुलें गोंय उदरगतीच्या मार्गा वयलें एक नखेत्र हें गोंयांत आयिल्ल्या पांचनखेत्री प्रचारकांक दिसता तें हांगाचे सवस्तकायेक लागून. गोंयच्यान प्रधानमंत्री नरेंद्र मोदी हांचे कडेन देशांची सत्ता येता ही आस्त दाखोवपी उतरां संवसारांत गेल्लीं तीं सवस्तकायेंतल्यानच. ते सवस्तकायेचो हुस्को जागे जाल्ल्या गोंयकारांनी उक्तायला?
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
