भांगरभूंय | प्रतिनिधी
नवी दिल्ली, खबरां संस्था : ह्या वेंचणूक वर्सा, एमएसपी (किसान आधारभूत किंमत), डीबीटी (किसान सन्मान निधी, लाडली लक्ष्मी अश्यो लव दिवपी येवजण्यो) आनी डीए (म्हारगाय भत्तो) वाडिल्ल्यान सुमार १२.५ लाख कोटी रुपया सामान्यांच्या बोल्सांत आयल्यांत.
हें बाजारा खातीर बुस्टर डोस थारिल्ल्यान गिरायकांच्या मागणेंत वाड जावपाची शक्यताय आसा. शार आनी गांवगिर्या वाठारांत लोक चड खर्च करतले अशें मत तज्ञांचें आसा. टीव्ही, फ्रिज, वाहनां, घरां सयत सदच्या गजालींचीं विक्री वाडटली.
हाची झलक मार्चचे विक्रीचो आंकडेवारींतल्यान दिसता. फाटल्या दोन वेंचणुकांच्या डेटा प्रमाण एफएमसीजी, ग्राहकोपयोगी वस्तू, रिअल इस्टेट आनी ऑटोमोबायल मळार वेंचणूक वर्सांत वाड जाल्या. बँक ऑफ बडोदाच्या अंदाजा प्रमाण पक्ष प्रचारांत एक लाख कोटी रुपयांचेर खर्च करतलें. हो पयसो बाजारांत येतलो. ताका लागून विक्री व्हडा प्रमाणांत वाडटली.
वेंचणुको जाहीर जाले उपरांत गिरायकांचो आत्मविस्वास वाडटा
२०१४, २०१९ त वेंचणुको जाहीर जाल्या उपरांत आरबीआयच्या गिरायक आत्मविश्वास निर्देशांकांत सकारात्मक वाड नोंद जाल्या. २०२४ चे वेंचणुकेंतूय होच ट्रेंड रावपाक शकता.
कृषी : केंद्रान एमएसपी ७% न वाडयलो. कांय राज्यांनी ७% बोनसूय दितले. सन्मान निधी आनी फुकट धान्याचो लाव मेळत रावतलो अशी गवाय दिल्या.
एफएमसीजी : २०१४ वेंचणुकेंत जेवणाचे पदार्थ, नूडल्स अश्या गजालींची विक्री नेटान जाली. २०१९ त ११% ते १२% वाड जाली. ह्या वेळार १५% वाड अपेक्षीत आसा.
नोकरदार : म्हारगाय भत्त्यांत ४% वाड जाल्या. हे पयशे नोकरदार वर्गा वरवीं बाजारांत येतले. गिरायकांक उपेगाक पडपी वस्तूंचेर व्हड खर्च जातलो.
रिअल इस्टेट : वेंचणूक वर्स २०१९ त २.६ लाख घरां विकलीं. २.३७ लाख गृहप्रकल्प आयले. अंदूं साडेचार लाख नव्या गृहप्रकल्पांचो अदमास आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
