भांगरभूंय | प्रतिनिधी
2022- 23 वर्सा 3,400 कोटी रुपया केले जप्त
नवी दिल्ली, खबरां संस्था ः वेंचणुकेच्या काळांत काळ्या पयशांचें प्रमाण वाडत आसा. हें भारतीय लोकशाये खातीर धोक्यांचे जावपाक लागलां. खरें म्हणल्यार फुडारी आनी पक्षांनी काळ्या पयशांचो वापर केल्ल्यान मुक्त आनी निष्पक्ष वेंचणूक घेवप कठीण जालां. देखून वेंचणूक आयोगा मुखार हें एक व्हडलें आव्हान थारला. 2022-23 वर्सा जाल्ले 11 विधानसभा वेंचणुकेंत आयोगान 3400 कोटी रुपया रोख आनी हेर वस्तू जप्त केल्लो. 2017-18 वर्साच्या तुळेंत 8 पटींनी म्हळ्यार 835% वाड आसा.
सार्वत्रिक वेंचणुकेच्यो तारखो जाहीर करतना मुखेल वेंचणूक आयुक्त राजीव कुमार हांणी सांगलें जप्त करपाच्या प्रकरणांत व्हड प्रमाणांत वाड जाल्या. असोसिएशन फॉर डेमोक्रेटिक रिफॉर्म्स (एडीआर) हे संस्थेन 2009 वर्साचे लोकसभा वेंचणुकेंत लढो दिवपी सगल्या 6,753 उमेदवारांच्या खर्च सादरीकरणाचें विश्लेशण केलें. तातूंत कांय उमेदवारांनी थारायिल्ले मर्यादे परस चड खर्च केल्ल्याचें मान्य केलां. जाल्यार उरिल्ल्या उमेदवारांचे खातें तपासले उपरांत तांणी थारायिल्ले मर्यादेंतल्यान फकत 45- 50% खर्च केल्ल्याचें दिसून आयलें.
2019 वर्साचे लोकसभा वेंचणुकेच्या खर्चाचो अधिकृत आंकडो 7 हजार कोटी रुपया आशिल्लो पूण सेंटर फॉर मिडिया स्टडीज (सीएमएस) च्या प्रमाण हे वेंचणुकेंत 55 ते 60 हजार कोटी रुपया खर्च जालो.
1999 वर्साचे लोकसभा वेंचणुके खातीर 10 हजार कोटी रुपया खर्च जालो आनी 2004 वर्सा तो 14 हजार कोटी रुपया जालो. 2009 वर्सा हो आंकडो 20 हजार कोटी मेरेन पावलो. जाल्यार 2014 वर्सा वेंचणुकेचो खर्च वाडून 30 हजार कोटी रुपया जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
